Melolea Fattlean Konn Morona
Kamachi ghora portotana sodanch ti, pustoklayen (library) vetali. oHeraldo, disalem hatant ghetali ani meloleanchi voleri pan (obituary) poilem, vachtali. Barik-sarik nodor disalachear firaylea uprant, tika zai asloli mhahiti thoim aslear, begintlo lhanxo kadern(note book) kaddun kitem tori ti boroitali. Tigeli hi sodanchi chal-rit, bhitorlea kebinant ravun, pustoklay-odhikari (librarian) barik nodren sogllem datayen polletalo. Lino B. Dourado Tichem logn mogachem aslem. Eka gunnest bhurgea sovem don vorsam ticho mog zaun, ti logn zal’li. Eka disa, tichea jivak borem disona zalem. Ti voizak mellunk gheli. Lognachea tin vorsamni ticho kusvo ballkan zopt kela mhunn, voizan tika vhodd khuxalkayechi khobor dili. Tinnem aplea ghorkarak fonavelean kollit kelem. Ballok zolman ail’lea vori, tigelea ghorkaran tagelea offisan, khollbollayechi uel’li marli. Offisachem kam’ soddun tech vellar to, ghora yevnk mhunn gaddi rostin choloitolo. Fuddle mottorik overtake kortana, samkara velean yetle trokkoracher tannem gaddi marun, aktak somplo. Tichea kusvean rochtolem ballok chovtto mhoynno tantalem. Ghorkarachi ek omor ugddasachi nixani mhunn, rochtolea ballkachi bhouch zotnay ti ghetali. Dusre pavtti logn zaunk tigelim ghorchim, tika vinonti kortalim. Eksurponnanchea jivitak ti niraxi zatali kori. Dusre votten, ghorkarak dil’lo niz mog tika dusrem logn zaunk monam kortalem. Dusrea daddleacho mog, tiche jivitan zolovpak, tika naka aslo. Ek dis ghorachi bel vazli. Voilea rumantli bhair sorun panvddeavelean denvtana ticho pãym nisrun ti vhoir thavn sokla apptoli. Tichea kusveak mar bosun tika gorbpat (miscarriage) zalo. Ticho sonvsar dukhan buddlo. Dukhachea kupamni tichea jivitak odik dukhavollichem pager marlem. Ghorkarachi ekuch nixani na zali. Hem chint-chintun tika manxik (mental) duens zaun, kitlech mhoynnem tika toklecho ilaz korcho poddlo. Salant umkotolea ghorkaracho fottuvak polloit, eksuponnachim panch vorsam pixea porim tinnem sarlim. Ken’na, ken’na ticho ghorkar tichea thaim uloitalo oxem tika distalem. “Chol, tujem eksurem jivit nopoit kor. Mhaka visor. Dusreponni kazar za!”, ghorkara moga vonn, dusro daddlea koddlean mog melltolo vo nam hinch chintna tika thar dinaslim. Survatek, tichem eksurponn ani tornne jivit nyallun, tigelim ghorchim ani soyrim tika portean logn zaunk forsar kori. Punn atam tech soyreank apnnalem eksurponn uktem korunk, tika loz distali. Ani dekhunuch, sodanch ti kamanchi portotana, pustok-ghoran vetali, ani oHeraldo disalear konn tori tornni ostori sompli zalear polletali. Somploleachi piray, tichea pirayek sor zata zalear, sompil'lea ostorechem moronn zatoch, tigelea ghorkarak tin disam uprant, pezmanchi vo dukhest buzvonn divnk vetali. Veche adim fonavelean, ghanvchea loka thaim barik-sarik khobor kaddtali ani somplolea ostorichi apunn iskolantli vo kolejintli ixttinn mhunn sangun, randponn bogtolea daddleachem kalliz jikhun ghetali. Ghorabeachi poristithi xiktali. Oxem korun tinnem, tin-char kodden dusrem logn korpachi goro uddouncho proytn kelo. Punn yexvont zali nam. Eke kodden, dogaim bhurgim vaddlolim zalear, dusre kodden ekuch bhurgem, punn pangllem. Tisre kodden ghorabeachi avoy anturnar poddloli. Ho kit-kit tika naka aslolean, vollok bhaili dukhest buzvonn funkott vetali. Punn tinnem, aplem khaxellea karya (mission) soddun divnk nam. Ani ek dis oxich ti pustok-ghorant disallem vachtana, tiche nodrek justuch tichea pirayechi ek ostoriche mornnachi jaharet vachli. Somplolea ostorek bhurgim naslim, nhoi mhunn sasumaim/pai. Bhav ani bhoinn nam. Ghorkanni vinnem, tiche bhaxen fuddarak, somplolea ghorkannicho ghorkar ekmulo ghorant. Tinnem sollsollit begantlo note-book kadlo punn hatak pen sampddunk nam. Pustok-ghorant sorvbhonvttim asloleanche dolle add korun, tinnem jahret aslolo kagddacho kuddko pinzlo ani lohu begint lottlo. Bhair vochun, tech ganvan ravpi tiche eke ixttinnink mobilar fon korun somplole ostorechi vaspus keli. Tin disam uprant just, sanglolea pott’tear vorun gaddi tamboili. Gaddientli dhenvlli ani nit vochun ghorachi bel vazoyli. Bhitorlean, panvlancho avaz mukhi daraxim pavttoch bond zalo, ani dar ugttem zalem. Dar ugoddpi, bhitorle kazgi kuddiche sande dispa sarkeli pattol mottvi nightie nhesloli tornni ostori apnnale mhattevele lamb kens nytaer ghalit, daran ubi aslole on-vollki (stranger) ostori konnank sodta tem vicharlem. Vicharlolea proxnank thotakun zap dili “Darling, tuka konn mellunk aila”, Pejamanche buttanv ghalit daddlo monis salant ailo, ani darant ubi aslole ostorek pollevn bhouch ojeapun mhonnlem. “Tum??? Ani hanga?? Yeo, yeo!!! Bhitor sor!” Borich pornnim ixttinn zal’lea vori tannem tika ghorant bhitor sorunk porvongi dili. Ti bhitor sorun apnnale kule sofar tenkounche adim, somplolea ostorecho ghorkar kai mhunn vicharlem ani tannem oi mhunn zap ditoch, taka ghott veng marun dukhest buzvonn dili. “Je toren tunvem mhaka vollkilam, tea toren khuim tori adim amchi vollok zalea dista.” “Goddie tunvem mhaka pollevnk na asot. He dukhest char dis soddun, hanv tuka sodanch polletam” “Sodanch? Ani khoimsor?” “Amche sorkari library-nt” “Tor tum te library-cho librarian.” “Oi” “Polle, tuji mogall ghorkarnn mhoji vhodd ixttin. Ami, Navelim Our Lady of Perpetual iskolant sangatak dhavi pas kelea. Tem Moddganv Chougule Kolejin gelem ani hanv Nuvemche Carmel Kolejin. Hangasor amchi ixttagott sandli. Okosmat, porchea paper-ar mhoje ixttinnichi dukhest mornnachi khobor vachli ani tuka buzvonn divn dislem, ani tech borobor ek vinonti.” “Vinonti? Kosli ti?” “Hanv ek vidva. Mhozo ghorkar somplear panch vorsam somplim. Mhaka bhurgem nam. Survatek mhojea ghorcheamni mhaka zobor bollan dusrem logn korunk vinoytalim. Tea vellar mhojea ghorkaracho mog, mhaka dusrem kazar zaunk addkoli haddi. Hanv keddnach dusrem kazar korchena mhunn nichev kel’lo. Punn, halinchea disamni mhojem eksurponn mhaka sotayta, tea khatir tuka vaitt disona zalear, tum somadan zatoch, mhonnchem; tuka dislem dusreaponnim kazar zaunchem, hanv raji asam tuzo sangat zhoddunk.”, ani salant aslolea tache somplole ghorkannichea fottvak polloit, tachea zababak ravli.” “Tum fattim pavllem!!!” “Mhonnchem? Hanv tujem somzunk na” “Mhojea ghorkannichi meleli kudd, semiterin mattient damplea uprant, amche sonvoim pormonnem ganvchea lokache, ixtt-mitr ani soireanche buzvonn ghevn hanv simitirichea darar ubo ravlolom. Xeboram lokam modim nigtench tuka dar ugddun bhitor ghelam tem, mhoji adli ek ghott ixttinn. Lokache ghordden mhaka veng marun dukhest buzvonn ditana, tinnem mhojea kanan funklem Tum eksuro nam. Hanv tuka sangat ditelim. Vhoili paddos kosllun poddta kai dislem. Tonddan poddlolem hains (bait) bhitor aslolea ixttinnin hat ghalun kaddlea vori zalem. Tachi bail somplear ek suman zalem na. Rokddoch tannem, dusrem kazar zavpacho nirnnov ghevn tim ekthaim jiyevnk suru kelem. Mellolea fattlean konnuch morona. Mortolo ek pavtti morta punn jiyetolo monis xembordam morta, hem tika pottlem. Mottorin bosli. Fattli vatt pollevpi harxean (rear mirror) apnnalem rup pollelem, ani amurki hansun tondd-tonddantuch gunngunnli. Doryan khub masli asa. _/_/_/_/_/_/_/_/_/_/_/_/_/_/_/_/_/_/_/_/_/_/_/_/_/_/_/_/_/_/ _/ _/ tambdimati: the Goa review is a community blog of original _/ art, writing, music, news and commentary from and about the _/ smallest state in the subcontinent. check out the newest _/ member of the Goanet family daily at _/ http://www.tambdimati.com. _/ _/_/_/_/_/_/_/_/_/_/_/_/_/_/_/_/_/_/_/_/_/_/_/_/_/_/_/_/_/_/