Avoi Duvechim Zogdim
Mhoji bolaiki bigodlea dekun dotoranni maka gymant nam vochpacho hukum ghatla ani zata titlem cholunk sanglam taka lagon hanv sokalcho ani sanjezcho ordem or taktiken choltam (brisk walking), hanv Karamachea ek pontar rautam ani mhoje offisantanlo, zanche motoran hanv kamak vetham to Karamachea dusrea pontar rauta. Mhojea ghara thaun Karamachea dusrea pontar paupak, taktiken chollonk maka sumar vis minttam lagtat taka lagun, Karama Parka (Karama park) boutim char tori taktiken boudeo martam uprant, mhojea ixtta borim offisant vetam. Sodanche porim aizui hanv Karama parka boutim taktiken boudeo marpak survat kortanch, mhoji nodor davea vhatten goleantlean yetolea dogma ostoreamcher podli, pollelearuch gomtalem ostoreo avoi ani du mhunnon, avoi matxe orde piraie voir asli, todi motti ani motvi, du tor model koxi, ekdom fitt ani sundor, trackpant ani tight blouse ghallun asli, purai angacho akkar distalo, aiche khallacho khuimchoi tornato cholyeak poleun anvdo giltolo aslo, nama baba nam mhojea monnant toslem khainch vait evunk nam, maka, hea dissani mhojea duvensa bodol anik kainch evzonam. Avoi sodul (baggy) kalsanv ani sodul blouse nesson asli, kopde bore presache, “Nike” ani moche-ai “Nike” (just do it), style ani nhexonna vorvim ghomtalem, astik mhunnon, lagim-sor yena fudem, borea deodorant-tacho zum zum mhojea nakant xirkolo. Tim mhojea mukaruch taktiken cholunk laglim, mhoje fuddem yeche adim lagtalem avoi duve bitor ek ghombir bhasa bhas zatali, du avoiche fuddem tidkin cholunk lagli tednam mhojea apurbayechi Konkanni bhas tim ulloitalim ti mhojea kannar poddli, hanv tottaklom, Goykaram ani Karamant Konkanni uloitalim ? Zaitea tempan rostear Konkanni ulloilolim hanvem aikolim, jivak borem-xem dislem ani tanche fatofat hanvui cholunk laglom. Tanchi oxi bhasa bhas hanvem aikoli Avoi : Jenny (nanv boddollam) tuka bildingantlem bair sortanch hanvem ek prosn vicharlolo, aikolam tuvem ? Du vogich rauli tori avoi duvechea fatlean danvun vicharta; Jenny, Rati tuje sangata bildingeche fatlean “kusur pusur” (cozily talking) kortalo to cholo konn ? Tori chedum vogich rauta, ani avoi fuddem vicharta, rau go, to ek voros fattim tujea ekvisvea vhad disachea somoropak aslo nhoi ? Jenny tidkin mhonnta: Hoi to aslo ani tuka zanna zaunk zai to konn to ? To mhojo nouro ani ami don vorsam zalim mogan aslear. Avoicher mollob koslon podlem, thoddo vell thuimch oggi ubi rauli anik hanv lagim pavonam fuddem (tancheo ghozali aikunk hanvem mhoje chalir todo break lailo), avoi danvun porot duve barobor cholunk lagli. Avoin fuddem oxem mhunnlem; Shee to tuzo nouro ? Tejeakin boro anik konn mellunk nam go tuka ? Tachea kensank pollelear to tufanak sampodlolo koso dista, kalsanv tachem bonka-kuleam sokol asta, kanant mundreo (earings), ontak ani kitem toplam, tea bair dolleam voir mobailak signal mellunk antina bosoilam dista, anik khuim kitem kitem toplam mhunn Dev zannam, tondantlean chimnni koxi dunvor bhair sorot asta, khotornak koidea porim bendantlean sogleo sank’lleo (chains) lambtat, hatamcher tattoo, anik kitem go bai, oslo nouro ? Lok amkam hanscho nam ? Goyant mhoje ixttinicho kai boro cholo asa, sobauvan boro, boro xinkla ani zoddtai bi boro, bhatt bensui assam, anik kitem zai ? Monant hanv hansunk laglom, avoi borich comic asli (good sense of humor), titlem mhnnosor du ragaborit zavun avoik vicharta; Logn zatolem hanv vo tum, hanvem nirnnoi ghetla, ani hanv to sambaltolench, end of discussion. Avoi: Rau go bai, to kitem kam korta ? Kitlem zoddta to ? Du todi niraxi zaun mhunnta: To hotelant kam korta ani sangata MBA korta Avoi hansun: Hotelant, saiba bogos aggo, tum Citi bankant (nanv boddollam) officer assam, ani to waiter ? Shee baba, he choyecher khuimcho denvchar bosla ? Du tidkin mhunnta: To khonnui zaum hanv tacho mog kortam Avoin apli ulloupachi chal boddolli, dusrea vatel duvek somzaunk sodta ani mhunnta; Jenny tum zannam tujo bapui khalzacho moriz mhunn, ani hi khobor tachea kannar poddot zalear taka dhokko boscho nam, tuka tanchi khainch porva nam ? Jenny hansun mhunnta: Daddik hanvem soglem sanglam, zaito sozmaucho poddlo punn akkerek tannen manun ghetlam, to rund monacho ani chintnamcho monis, tuje baxen oxir monacho nhoi ! Avoik ekdom tiddok choddta, ani oxem mhunnta; Tor bapui ani duve modem boro sombondh asa ani maka avoik bhair udoilea ? Punn tuvem te choleak sodchemch podtolem, mog mhullear kitem tem zanna tum ? Magir rodtollem. Du raga borit zavun mhunnta; Tum tujea adlea mogeak, tuje ixttinichea govak, soddun daddy lagim logn zalli mhunn makai toxemch kor mhunn-tai ? Tujea adlea mogeachea puta sangata naka logn za mhunntai ? Bap-re-bap ho tor atom bomb futlo, baan ekdom avoichea khalzak toplo ani kontiborit rodulli (in tears) zavun duvek vicharlem; Jenny hem soglem tuka konnem sanglam ? Jenny-n sotoch korun zap dili: Daddin Avoi attam hollu hollu cholunk lagli, ekdomuch ragan tambdi zaun mhunnok lagli; Tujea daddik dhakoitam, taka khuim oll ghalunk zai to hanv zannam. Avoichem ullovop aikon maka hanxo suntlo, titlem mhunnsor hanv avoiche lagi paulom, hanv hanstam tem polloun soglo rag mhojer xevtillo ani oxem mhunnlem; Hansta kitem ? Tukai oll ghalum gheupachi khoxi asa kitem ? Chintinastanna mhojea tondantlen toddim Malayalam utram bhair sorlim; chapad kuduchu ? Ti thuimch ubi ravun mhojea tondak polloun, “bloody stupid malbari” oxem mhunnlem, hanvem anik porti zap divunk nam karan mhoje lagim anik Malayalam utram naslim ani thuimsorlo chollot raulom. Mhojea Malayalam utranni maka vatailo, nam nor sure maka khuim tori oll podtach aslo ! Hanv zanna tumi zaite zann “chapad kuduchu ?” mhunnge kitem tem vichar kortat astole, tacho ort mhullear “jevon zalem ?” NB: Mhoji khalti vinnounni Goykaram thaim, umetim ani urben amchi maim bhas Konkanni ulloyeat, mhoje sarkean khonnem-ai aikolem zalear khiam zaina, tumi ulloit rauchem Freddy Agnelo Fernandes ________________________________ The content of this electronic communication is intended solely for the use of the individual or entity to whom it is addressed and any others who are specifically authorized to receive it. It may contain confidential or legally privileged information. If you are not the intended recipient you are hereby notified that any disclosure, copying, distribution or otherwise placing reliance on the contents of this information is prohibited and may be unlawful in certain legal jurisdictions. If you have received this communication in error please notify the sender immediately by responding to this email and then delete it from your system. ________________________________ ______________________________________________________________________ This email has been scanned by the MessageLabs Email Security System. For more information please visit http://www.messagelabs.com/email ______________________________________________________________________