http://groups.yahoo.com/group/gulf-goans/message/33573 SON’VARACHIM SUNGTTAM: DKA-chea Tisrea Konknni (Romi Lipi) Sahitya ani Sonvskruti Sommelonantlean mhaka kitem zannvolem? - Jose Salvador Fernandes Fattlea Son’var-Aitarak, mhonnche Febrerache 19ver ani 20ver, 2011 Ponnje Kala Academychea vattarant ani vosreamni, mottea dobajean ani ghonnghonnan Dalgado Konknni Akademin (DKA) ‘Tisrem Konknni (Romi Lipi) Sahitya ani Sonvskruti Sommelon’ ghoddoun haddlem. Dalgado Konknni Akademichem hem tisrem Sommelon. Fattlea don Sommelonamni zaunk na ti zanniv mhaka hea Sommelonantlean zali.
1. Tisrem Konknni (Romi Lipi) Sahitya ani Sonvskruti Sommelonak poilea disa hajir zalolo Konknni lok khub sonsnnikayecho aslo. Eksarko oddech vorancho mukhel dobazo… Tea dobajeant kitlimxinch ulovpam… Him ulovpam ho Konknni lok sumara bhailem chint diun aikotalo. Dusrea utramni, tanchi man hevtten-tevtten ghunvonastona tanchem mon, Konknniche Romi lipie vixim khubxeo gozali ani ghodda-moddi aikopant gul’l zal’lem. 1987 vorsa Rajbhas Kaido chalik lagtoch Konknniche Romi lipiek koslea onitink tondd diunchem poddlem tem tanchem vaddlolem mon curiosity-n aikotalem. 2. 1987 vorsa Rajbhas Kaido pas zatoch, Konknniche Romi lipiecher kosli ani koxi-kat onit zali ani zata ti, hea Tisrea Konknni (Romi Lipi) Sahitya ani Sonvskruti Sommelonak poilech pavtt hajir zalolea Konknni lokak poilech pavtt kollun ailem. 3. Tisrea Konknni (Romi Lipi) Sahitya ani Sonvskruti Sommelonachea dusrea disa, mhonnche Febrerache 20ver, 2011 don vixoyancher sotram zalim. Poilo vixoy, ‘DISPOTTEA JIVITANT KONKNNI’. Tache up-vixoy asle, Avoy Bhaxechem Vhoddponn ani, Ghora-ghoramni Konknni. Dusrea sotracho vixoy aslo – ‘KONKNNI BHAXECHO VISTAR.’ Tache up-vixoy asle – Borovp Vistarachem Sadon ani Vachpantlean Bhaxecho vistar. Hea don-ui sotramni pon’nas tok’ke odik tornnateamni bhag ghetlo. 4. Dalgado Konknni Akademin ghoddoun haddlolea hea Tisrea Konknni (Romi Lipi) Sahitya ani Sonvskruti Sommelonant poilech pavtt, chodd nhoi zalear thoddea tori Gõychea Kolejimni Konknni xikoytoleamni bhag ghetlo! 5. Dalgado Konknni Akademin hache adim, mhonnche fattlim don vorsam don Sommelonam ghoddoun haddlim. Punn hem Tisrem Konknni (Romi Lipi) Sahitya ani Sonvskruti Sommelon anik eka karonna khatir agllem-vegllem tharta. Hea Sommelonant ‘Kovi Sommelon’-acho aspav kelolo. Hea ‘Kovi Sommelon-ant Gõychea xivay, Mumboi ani Mongllurchea-i kovimni bhag ghetlolo. Hea Kovi Sommelonant bhag ghetloleam modem tornnateancho ankddo chodd aslo. Romi lipientlea kovitank dorzo na mhonntale ti fott mhunn hea ‘Kovi Sommelon’-antlean zanniv zatalem. Romi lipientlea kovim khatir oxim Kovi Sommelonam ghoddoun haddlim zalear, fuddarak kovi mhunn fuddem sorunk ani ghoddonk tankam ek machi melltoli mhunn zannvotalem. Kiteak, tea Kovi Sommelonant bhag ghetlolea tornnateanchi kovita borovpachi kola, tank ani sador korpachi vichitr xoyli ugteponnim disun yetali. 6. Dalgado Konknni Akademin ghoddoun haddlolea Tisrea Konknni (Romi Lipi) Sahitya ani Sonvskruti Sommelonachea xevottachea dobajeak, Gõy Sorkarache Bhouxik Bandkam Khateache Montri Churchill Alemao Mukhel Soire mhunn hajir asle. Gõyant Konknnik Rajbhaxecho dorzo mellcho mhunn apnnem kitem-kitem kelem tem tannim boroch mitt-masalo lavun sanglem. Itlench nhoi, Vidhan Sobhent nivddun ailolea urlolea 39 zannancho apnnak tenko mell’lo zalear apunn Romi lipiek Rajbhas Kaideant bosounk raji asa mhunn tannim sanglem. Dusrea orthan, je meren tankam Vidhan Sobhent nivddun ailolea urlolea 39 zannancho tenko mellcho na, te meren te Romi lipiek Rajbhas Kaideant aspavpacho kainch khottpott korche nant. Oxea vellar monant ek vichar ubo zata – sorkar uddoytolo zalear he rokddech sangateancho tenko toyar kortat; punn Romi lipiek Rajbhas Kaideant aspaunk te kiteak sangateancho tenko toyar korinant? Eleisanvam velar, motam zoddun gheunche khatir Romi lipiek Rajbhas Kaideant aspaunk te bhas ditat tea velar, “her 39 zannancho apnnak tenko mell’lo zalear hanv Romi lipiek Rajbhas Kaideant aspavtolom” oxem mhunn konn kiteak sangona? Xakek upkaronaslolim vaingim tim, oxench mhonnchem poddta! Jose Salvador Fernandes