http://groups.yahoo.com/group/gulf-goans/message/33721 SON’VARACHIM SUNGTTAM:
Ponnjechi Protixtta Khuim Sanddlea? Faleam Marsachi 13 tarik. Gõyche Rajdanint aslolea Ponnje Mhapalikechi vinchnnuk. He Mhapalikeche xime bhitor 30 vordd aspavtat. He Mhapalikeche vinchnnukent mukhelponnan don zome ekameka add vinchnnuk loddounk toyar zaleat. Ek zomo asa to, adlo Mukhel Montri ani sod’deacho Ponnje Motdarsonghacho amdar ani Virodhi Pokxacho Fuddari Manohar Parrikar hacho. Dusrea zomeacho fuddari, Xikxonn Montri ani Taliganv Motdarsonghacho amdar Atanasio (Babush) Monserrate. Fattlea panch vorsanchea kallant Ponnjeche Mhapalikent Montri Monserrateachem raj chol’lam. Dusrea utramni, fattle khepek Ponnje Motdarsonghacho amdar Manohar Parrikar hachea zomeak haroun Montri Monserrateacho zomo Ponnji Mhapalikecher raj cholounk jikun ailolo. He khepek, Virodhi Pokxacho Fuddari Manohar Parrikar ho Xikxonn Montri Monserrateachea zomea add petton uttla, ani khuinche-i poristhitint virodhi zomo Ponnji Mhapalikeche vinchnnukent nivddun yevcho nhoi mhunn toklek il’leo chodd miryo ghalun vavurta. Kiteak? Kaim dis fattim, Ponnji Mhapalikeche vinchnnukechea goddboddant astana, Montri Monseratte-an ek gozal jahir keli – Vidhan Sobhechi fuddli vinchnnuk Ponnji Motdarsonghantlean loddoupachi ! Konn tori aplea kannsulacher thapott vazoupachi khottpott korta oxem Virodhi Pokxacho Fuddari Manohar Parrikarak dislanch astelem. Mhunnon, he khepek Ponnji Mhapalikeche vinchnnukechea vevharant tannem ghalunk naka aslem titlem-i boll ghalam, ani ‘Panaji First’ zomeachea bavttea khal vinchnnuk jikpache khottpott choloyleat. Ponnji Mhapalikeche udexim fattlea kallant Ponnji bhroxttacharachea konddant poddlam… oxem Ponnjechea protixttit nagrikank disunk laglam khoim. Dekun, fuddarak ho bhroxttachar vaddot-matot vecho nhoi mhunn addaunk tannim ‘Panajiites Intitiative for Change’ (PINC) nanvacho ek zomo ghoddla. Ho zomo soroll Xikxonn Montri Monserrate-a add ubo zala. BJP, Raxttravadi ani opokx umedvaram modlea 29 zonnank vinchun kaddun tannim tankam tenko dila. Tantuntlea tantum, ‘Forum for Good Governance’ nanvacho-i ek zomo toyar zala. Punn ho zomo BJP-cheach vangddeancho, ani to Ponnji Mhapalikeche vinchnnukent BJP-k tenko diunche khatiruch ghoddoyla mhunn aikunk yeta. Hea sogllea modli vichitr gozal mhonnlear, ‘Panajiites Intitiative for Change’ (PINC) nanvachea zomeachi. Hea zomeant Ponnjentlea protixttit nagrikancho aspav asa mhonntat. Punn potrancher ailolea tanchea jairatincher nodor marlear tantum Ponnje bhaile-i lok asat mhunn disun yeta. Punn ti gozal kuxin dovorun, PINC-acho niyall kelear, hea zomeak Ponnjechem fuddarachem boreponn suchlam hi ek bori gozal. Punn dusre vatten, nitoll-nivoll proxasonnak anvddetelea hea protixttit loka modem, Ponnji Mhapalikeche vinchnnuk loddounk konnuch yukt vo laikicho umedvar na kai kitem oso proxn monant ubo zata. Hea zomeantlea kaim vangddeamni, Ponnjechem boreponn monant dovorun vinchnnukent pavl ghalolem zalear, he vinchnnukek-ui vegllo rong yevpacho. Ponnjechem boreponn monant dovorun haka-taka tenko divop, ani svota apunnuch tea boreponna khatir soroll fuddem ani mukhar sorop hantum khubso forok asa. Punn PINC-an he vinchnnuke ninitan ghetlole bhumikecho orth koso gheum yeta? PINC-a modem vinchnnuk loddoupache tankicho eklo-i umedvar na oxem somzupachem? Vo tanche modlo konn-ui umedvar vinchnnuk loddounk fuddem sorta taka hea zomeacho tenko na oso orth kaddpacho? PINC ho zomo, Ponnji Mhapalikeche he vinchnnukent opokx mhunn vinchnnuk loddounk ubo zalolea Gõyam bhailea Tukaram Chinawarr nanvachea umedvarak-ui tenko dita! Mhonnche, Gõyche Rajdanint atam on-Gõykar-ui vinchnnuk loddounk fuddem sorleat, ani amche protixttit Gõykar tankam tenko ditat. Kiteak? Tea vorddant vinchnnuk loddounk ek-ui Ponnjecho nagrik na mhunn? Vo Ponnjechea nagrikank tea vorddantlean vinchnnuk loddoupachi kopxi na mhunn? Atam aste-aste korun, Gõyam bhaile-i lok Gõyche vinchnnukent denvunk lagleat, ani vinchnnukent motdan-ui korunk lagleat hacho somoz kitem mhunn kaddpacho? Hi poristhiti, Gõyant fuddarak kitem porian zaum yeta tachem chodd nhoi zalear, thoddem tori promannan chitr spoxtt korta. Vichar korpa sarki gozal hi! - Jose Salvador Fernandes CHOTRAI: Sodam porim Prachit Kallar 'Aitaracheo Katkutleo' uzvaddak yevncheo nant. Vachpiamni nond korun ghevnchem. SON’VARACHIM SUNGTTAM: Dor Son'varak chalu dovortole Goa-world.com moderator