“JIVEM UDOK”
*Pri.Ivo da C.Souza
Prostavnna: Udkache prosn utpon’n zalyat: udok komi zalam. Kityak zayt?
Udkache lott asat sobhar zagyanr, thoym lok moron veta. Techporim thoddya
zagyanr udok na, thoynsoruy lok tanin morta. Udkachi goroz amkam asa. Povitr
Pustok “Jivya Udkachi” amkam khobor korta. “Jivem Udok” kitem? Jezu Jivem
Udok dita (Ju 4:10). Tem udok koslem zayt?
Samaryekarnn ostori bayntlem udok kaddtastona, Jezu Galileya-k aple vatter
aslo, to udok magta. Ponn to Judev zaun, ti ojap zata (v.9). Jezu tika
“jivya udkachi” khobor sangta. “Devachem dennem” ani “jivem udok” kitem?
Devachem dennem “soddvonn” zaum yeta, “bhaylya fatrancher boroyleli Somurth”,
“Jezu”, vo Povitr Atmo zaum yeta. “Jivem udok” kitem? Tem “soddvonn”,
“sasnnik jivit” vo “Povitr Atmo” zaum yeta (polle Ju 7:37-39). Don vegllim
dennim vo ekoch dennem tem? Jezu ekach dennyachi khobor korta? Tacho orth
kitem? Jezun aplya poylya jivitachya vanttyant Povitr Atmyachi khobor korunk
na, ponn dusrya vanttyant kelya. Tor hangasor Jezu Somurthichi, ji atam Jezu
sovem atthaplya, khobor korta. Ponn Juanvachya Xubhvortomanant taka dusro
odik khol orth asa, to mhollyar “Povitr Atmo”: “Devachem dennem” atam jivont
Jezu (polle Ju 3:16) ani tacho Povitr Atmo. “Jivem udok” atam “Povitr Atmo”.
Aplya mornna-Jivontponna uprant Jezu bhorten aplo Povitr Atmo dita (polle Ju
7:39). Jezu mhonnta: “Hanv diyin tem udok piyetit, tankam kodinch tan lagchi
na” (Ju 4:14). “Konnak tan laglya, zalyar tanni mhojexim yeunchem ani udok
piyeunchem” (Ju 7:37). Povitr Pustokachi xikovnn hi: “Zonneklyan Jezu
Kristachya nanvan Snan gheunchem, ani tumkam Povitr Atmyachem dennem
melltelem” (DI 2:38; 1 Kor 12:13). Soryan nhoy, bogor Atmyan amim bhorlelim
mon’xam zaunk zay (Ef 5:18). Prarthonn korun, bhavarthan (Ef 3:16; polle Lk
11:13), gitam gavun, Devachem Utor (“Atmyachi torsad”, Ef 6:17) dhorun,
Jezuchem Mas-Rogot xevun amkam Povitr Atmyachem dennem mellta (Ef 5:19).
Izaias provadyan hem bhakit kelelem (Iz 44:3: “Tanel’le zom’nir hanv udok
soddtolom, suklole bhuyncher udkache vhall vhanvoytolom”). “Jivya udka”
vorvim amkam Devachya mogachya Atmo mellta (Rm 8:15; Ga 4:6), mon’xa-soymachya
vondovnnyancher ap-dopkhavnni (Rm 8:13), bhorvanso , bhitorlem boll, novya
mon’xacho akar (Ef 3:16).
Azkal amche projechya jivitant Povitr Atmyachi mon’vruti asa, ti amim
uzvaddaunk zay. Povitr Atmo amchya kallzamni jiyeta (“tachya kallzantlyo
jivya udkachyo zhori ghosghoxit vhanvtelyo”, Ju 7:38), ami tachem jivem
mondir (1 Kor 6:19), to amche sovem jiyeta, jen’na ami Jezuk chikttun ravtat
(Rm 8:9.11). Ten’na udkachi zhor sasnnik jivit diit vhanvta (Ju 4:14),
“jivya udkachi zhor futt’teli” (Jn 7:38). Povitr Atmo amkam “Abba, Bapa”
mhonnunk oddta (Rm 8:15; Ga 4:6), bhorvanxyan bhorta (Rm 15:13), amchya
jivitant “follam” dakhoyta (Ga 5:22), “sasnnik jivitak” vhorta (Ju 4:14; Ga
5:5). Ho bhorvanso amkam sasnnik jivit dita (Ti 1:2), Povitr Atmya vorvim
ami novim mon’xam zatat (Ti 3:5), svorginche dayji vortotat (Ti 3:7), amkam
novem-sasnnik jivit mellta (Ga 6:8).
Sompadnni: Sorvxevttim, amchem Kristi jivit mhollyar Povitr Atmyan
choloylolem jivit, hachi amim govayki diunk favo. Amche sorvbhonvtim amche
jivitache chalin hem amim thavem korunk zay. Jivit ovghodd, Povitr Atmo
amchem jivit lohu korta, jeporim Jezun amkam bhasaylam: “Mhojem zum sompem,
lohu mhojem ojem” (Mt 11:30). To amchya patkancho bhar kaddta, amkam
dadhosponn-sukh-somadan dita…
