Girest Gõyant Gorib Chodd
By Stanley Vaz
Ponnje: Amchem mannkulem Gõy kitlem girest; soimbachea daizant tem
xrungarlolem asa. Tea xivai soglle dhadosponnan jiyetat mhonn konnui
boddayeo marleo zalear hea girest Gõyant dor 15 mon'xam fattlean 1 monis
niradari asa mhonn sangtat. Hem amcho sorkar mandun gheta mhonn gomta.
Gõyant dor eka ghorabachi yennavoll 75 hozar rupia asun poryan dor 15
mon'xam fattlean eklo monis durbollkayen jiyeta mhonnlear ojap korpa
sarki gozal. Hea batmidaran jednam Gõychea somaz kollyan Khatean vochun
he vixim bariksannen khobor ghetli tednam eka unchlea odhikarean mahiti
dili 'Dayanand Surokxa Yevzonne' khal pensanv gheupi ani pensanv magun
orz korpi lokachi sonkea vaddot asa mhonn gomlem.
He yevzonne khal nond kel'leank tem khatem adar naslolea mon'xak 500
tem 1200 rupia dor mhoineak dita. He yevzonnechem boreponn ghetoleancho
ankddo 1,12,481 itlo asa. He yevzonnechem boreponn gheunk disandis lok
magnni korit asa. Sod'deak orz korpeanchea don hozar lokachea
daklleanchi topasnni chalu asa mhonn odhikari sangta. Heo soglleo orzo
chalu vorsachea Abril ani Mai mhoineant aileat.
Gõy rajeacho lok 14 lakh 57 hozar asa. Desachea her rajeanchi
loksonkheank sor kelear Gõychi loksonkhea fokt 0.12% zata. Itle unne
loksonkechea Gõyant gorib lokacho ankddo 1 lakh 12 hozar asa. Mhonnlear
hi khont korpa sarki gozal oxem hea khateacho sonchalok manun ghetat.
He yevzonne khal labh ghevpi lok 60 vorsam odik pirayechea nagrikank,
opangull, vidva ostoreo (widows) adi aspav asa. Punn hem boreponn ghevpi
lok khorench Gõykar vo Gõy bhailo hacher spoxttikoronn korpak
khoincheach odhikarea kodde uloitana korunk xoklo na.
Dor vorsa sorkar Dayanand Somajik Surokxa Yevzonne khal 100 krutt odik
rupia khorch korta. Punn hea duddvanchem boreponn konna-konnak pavta ani
konnak mellta hea vixim poryan te-tea odhikareank proxn kelo tacher
khulaso korunk khoimchoch odhikari xoklo na hem hea potrkaran tem
kocherint bhett ditoch onnbhovlem.
Moddganvcho ek xrextt nagrik Xri Agostin Pereiran potrkara lagim
uloitana sanglem ki adar nasloleank adar diupak sorkaran ankleli hi
yevzonn khorench tokhnnai korpa sarkim. Punn teach borobor sorkaran he
duddu he yevzonne khal vantt'tat tacher apli koddok dekh-rekh dovorpak
zai. He yevzonnecho labh soglleankuch mellunk zai. Punn chodd korun
Gõykar gorjevont lokak oxem Xri Pereira fuddem sangta.
http://www.v-ixtt.com/client/details.asp?id=4583&cid=3
