Dog Bhav Deva Pav Ghelea mhoynneancha 29ver Dubai zalear, 30ver Kuwait desan Milagres de Chandoracho tiatr ‘Mother’s Day’, Konknni rong machier haddleat. Hea donui zageancher, Gõyche dortoreche put PWD Montri Churchill Alemao Dubai zalelea proigak Mukhel Pavnem tor, Kuwait desan Amdar ani adle Poroytok Montri Micky Pacheco Mukhel Soire mhunn hajir asle. Tiatr thoddea vellancho kormununk. Kollakar asat te, apnnank dileli bhumika machier rongoytat ani lokam koddlean abru zhoddun ghetat. Bori bhumika kel’lea kollokarank tiatr pollennaram koddlean abru mellta ani tanchi vankanni, khobranchea tintear gaztta. Hech samonan ami vichun kaddlolea Amdar-Montri, apli rajkarnni bhumika bhes bori kortat. Tanchea tiatrache navn ‘Divide and Rule’, oxem asta. Adav nastona choddav nam. Barik zhorintlean kollun ailam, Dubai zalolea ‘Mother’s Day’ tiatracho proig eka Montrachea despezar zalo zalear, Kuwaitcho proig eka adlea Montrean, ak’khoch khorch aplea khandar ghetlo. Itlo khorch korpan kitem tori kharan ani punn asa. Ami sogott somzotat, Churchill ani Micky dusman kai mhunn. Tem fokot paperancher chappun yeta. Tanchem mellop Gõyant nasta. Punn kupam vhoir choltolea vimanan tanchem mellop zatana, amkam adlea dog Gõyche famad rajkarnanchi yad zata. Ani te mhonllear somplele adle Mukhel Montri Dayanand Bandodkar ani virodhi fuddari Dr. Jack de Sequeira. Te dogui Gõyche Vidhan Sobhent eka-mekacher tapun ani eksarke gorom zavn bhasbhas kortana, dusrea amdarancher tortoro yetalo mhunn sangtat. Ek-ek pavtti tancheo tapsani ani karanday xime bhair pavtali teddna, Vidhan Sobhechea Sabhapatik chalu asleli sobha bond dovorchi poddtali. Tonddak tondd zaun keddna-keddnai distalem tanche hat eka-mekacher ubarpache poristithir pavttat kai mhunn. Punn tanchi khori rajkarnni bhumikechem chitr, Vidhan Sobhentle korrodorin te dogui sangatan bhair sortona distali. Korridorin eka-mekak bhettoch, ixttagotticho hat divn eklo mhontalo. “Kitem udoilem re tuvem” ani dusro zap ditalo. “Lokak dislem ami khorench zogoddtat kai mhunn” Hoi! Toslench nattkachem bhutt atancha Amdar-Montreank laglam. Mother’s Day tiatrak mukhel pavnne koxe hajir zaunche khatir dogui Gõycha dortoreche put Qatar Airways vimanan 1st class tiketicher uddni kheli. Tanchi bhett zali. Hatak hat mellun ulovpam zalim. ‘Ugddas dor. Bhair ami dusman. Hench nattok oxench chalu asum di. Tum mhoji patt korpichina ani hanv tuji. Mellta tem borrobor lutun khaya’. Mogachano, adle Mhukel-Montri Dayanand Bandodkar ani virudhi fuddari Dr. Jack de Sequeira ek vhodd huxarkayen ani promanninkponnan Gõychem rajkaronn choloylem. Punn tannim keddnach Gõy luttpachem nhoi mhunn dusreank lutunk divpacho vavr ani yevzonneo toyar korunk nant. Gõycha poilea Mukhel Montrachem nanvuch suchoytalem, ‘Daya-Anand’. Taka khub durbolleanchi doyea (daya) asli ani goribanchem boreponn zanvchem khatir tannem zaiteo yevzonneo (schemes) ankleo ani durbolleanchea tonddar ‘anand’ haddlolo. Punn jeddna, Xri Bandoddkaran Gõy Maharastra vilin korunk yevjilem teddnam mat tannem nanv ganaylem ani ‘khalnayak’ zalo. Lino B. Dourado
