Somazacho Kai Khasgi Jivitacho Arso? . Sat-att vorsam adli? Khobor nam. Punn khori gozal. Tea vorsa Kala Academyn te karyavollint mhaka aspaun ghetlo. Kosli karyavoll? Mhalgoddea tiatristan dilole tache tiatr borpavollicher tornnatteamni aple vichar manddop, ani novea tiatristache tiatr borpavollicher mhalgoddea tiatristan aple vichar manddop. Ubi-addvi borpavoll uzravop. Taka Sahitik Somikxa (Literary Criticism) mhonntat. Mhaka tea mhalgoddea tiatristache XXX borpavollicher sahitik somikxa korunk dili. Sahitik somikxa korta tednam, borovpi konn, to kitlo famad, taka kitlo rag yeta, to kitem mhonntolo, to kitlo podvedar, adi. osleo gozali matui monachea pordear haddpacheo asonant. Hanvem tea mhalgoddea tiatristachi borpavoll sobhemazar oxe ritin uzrayli, xevttim te borpavollichea tiatristak mhoji molavnni mhollear apnnak dilolo suko mar koso dislo! Apunn nanvosto tiatrist, ani hannem mhaka oso lojek ghalo? oxe torechem chitr tachea mukhamollar mhaka vachunk melltalem. Taka mhozo XXX thaun rag ailolo hem-ui mhaka tachea osovostponnavelean thavem zalem! Mhojea motancher taka aplim motam manddunk soeg dilo tednam, tannem te borpavolli vixim kitem mhonnchem? Borpavollicho vixoy soddun to mhojer vikh vonklo. Titlench nhoi, aplea fuddle tiatrant tannem mhoje add git-ui gaylem. Mhaka vaitt disunk nam. Kiteak, tea tiatr borovpiak sahitik somikxecho orthuch khobor naslo. Oslea nennarank kitem mhonntolom? Tiatr somazacho arso mhonntat. Sarkem. Punn aichea kallar, hea somazachea arxeant dusreachim khasgi-i rupam dakovpacho vevhar chol’la to kitlo tea arxeache faskent bosta vo bosnam tem pollevop gorjechem. Az tiatrache machier, kaim gavpi aplea gavpantlean thoddea lokachea khasgi jivitak, bomblechea dentta sokoilea utramni sobhemazar challo martanam distat. Ani tannem oxe ritin gaylolea gitak lok fivnnio ani tallio marun taka ubarun dovortat. Tednam hea gavpiank apunn tiatrache machier khub kitem borem korta ani lokak tem avoddta mhonn tancho goir-somoz zata. Punn tanchim him, lokachea khasgi jivitancher gaylolim gitam molaun pollelear, tantum gitacho ek-ui gunn asonam. Lokak avoddta ani lok porot-porot apoyta mhonn dusreachea khasgi jivitak bott dakovpi gitam ghoddop, ani tim sobhemazar gavop hem khuinche su-sonvskrutayeche faskent bosta ti mhaka khobor nam. Zonn ekleak tachem khasgi jivit asa. Tea jivitant to khasgi jem kitem korta taka svota to zababdar asta. Tachem khasgi jivit sobhemazar ugtem korop hi xiklolea, sovorlolea ani borea sobhavachea mon’xachi chal ani rit nhoi. Tiatrache machier, dusreachem khasgi jivit sobhemazar ugtem korta tem, tiatr vosreantlea choddan-chodd lok avddonam mhonn tanchea mukhamollavelean zannvota. Jea thoddeank tem avoddta tech lok fivnnio ghalun dusreacho abru varear ghalpi gitam gavpiak porot-porot apoytat. Tantuntlean he lokachea monancho panvddo-i kollun yeta. Ani tankam gitantlean bhik ghalpi tea gavpiacho-i vichar korpachi sokoilea panvddeachi tank disun yeta. Tiatrache machier oxea sokoilea dorjechea gitanchem gavop zata, taka-i lagun 120 vorsancho itihas aslole tiatr machiek yeunk zai aslolem titlem mhotv yeunk nam. Apnnachea hatant asloli tiatr machi koxi-kat somazachea borea khatir vaporchi hi gozal tiatrache machier gaytoleank ani nhestoleank onnbhovan khobor asunk zai asli ti nam dekun, az 120 vorsancho itihas asloli tiatr machi kole-sonvskrutayechea mollar jitli girest zaunk zai asli ani pikunk zai asli titli girest zaunk nam, ani pikunk-ui nam mhonn khontin mhonnchem poddta. Tiatr ho prokar amchea puray desantlo agllo-vegllo prokar. Toslo prokar amchea desantlea dusrea khuincheach rajyantlo lok korinam. Dusrea utramni, tiatr hem amchem khaxeleponn asa. Hea khaxeleponnachem khaxeleponn tiatr borovpiamni, digdorspiamni ani te machier gitam gavpiamni somzun gheunchi goroz asa. Hi goroz somzole zalearuch, tiatr machievelean lokak zai tem divpachem sokoilea dorjeachem bond zatolem. Tiatracho dorzo apo-ap voir sorunk pavtolo.
