From: mailto:[EMAIL PROTECTED]
Sent: 25 Januari 2005 7:14
To: [EMAIL PROTECTED]
Subject: "Gompo Ka
Tibo!"
Hari tu hari Sotu (Sabtu), di kampuang ambo nan
banamo Tiaka, Kecamatan
Guguk, Kab. 50 Kota alias Pikumbuah Mudiak, urang bagalegoh
bak cando ado
nan ka tajadi.
Ambo sadang manyandang badia angin, kawan Ambo
Simon sadang mangapik
tangkai panciang, kami sadang bajalan ka arah Batu
Biliak. Basirobok lah si
Bidin (Zainal Abidin nan santiang mangaji tu) di
pamatang.
"Baa kok heboh bana di Kantua Karang Taruna,
Bidin? Ka manga urang beko?"
Tanyo ambo ka Bidin.
Baa jawek Bidin sambia tasasak, karano itiak nan
dikubalokannyo alah masuak
ka sawah urang nan bapadi,
"Gompo ka tibo, gompo ka tibo!" Kecek
Bidin. Sasudah tu Bidin balari
mangaja itiaknyo tu.
"Baa pulo ko, Mon? Gompo nan ka tibo baa kok
eboh bana urang sakampuang,
dari Karang Taruna sampai induak-induak lah mulai
segeh dari tuasa (waktu
asar)? Becak bagai hilia mudiak dinyo?" Tanyo
ambo ka kawan ambo tu.
"Antahlah." Jawek Simon. Dek karano
pangana kami alah ka ikan sipareh di
Batu Biliak sarato balam nan alah acok tabang
randah disinan - mangkonyo
ambo mambao badia - mangko masalah gompo tu ndak
takana bana dek kami do.
Ruponyo malam tu, alah tapasang tenda sakuliliang
tangah lapang "Sparta"
di
desa Tiakar tu.
Suaro orgen tunggal pun mulai tadanga. Lagu
"Kasiak Tujuah Muaro" tadanga
sayuik-sayuik sampai.
Batanyo ambo ka Mak Iyuh Gosoh nan sadang mambuek
kopi di lapau, ado acara
apo, Mak Yus?
"Gompo tibo." Baitu pulo keceknyo.
"Gompo apo ko Mak Yus? Manga kok baorgen
urang?" Tanyo ambo manyasak.
"Iyo, Nedi Gompo kasiko malam ko. Sabonta lai
tibo nyo tu, lopau batutuk
dulu, ambo iyo nak mancoliak pulo Nedi Gompo
tu." Jawek Mak Iyuh Gosoh mantap.
"Konciang, Nedi Gompo nan tibo, ambo sangko
gompo nan sabonanyo."
Ruponyo gompo nan dikecekkan urang tu Nedi Gampo!
:)
