Vichitr Goenkar
Borovpi: Daniel F. de Souza
"Ajeeb hai Tum Goa ke Log " Bharotacho poilo Prodhan Montri Ponddit Jawarharlal Nehru hannim amchea Goenkar bhav-bhoinna vixim udgarlolim him fanki utram. Goenche suttke somoiar tannim he udgar soddlole. Aiz 44 vorsam uprant Goenkaranchem vichitrponn titlench khol ani thav kaddunk zaina titlench asa. Tatunt kainch bodol zala oxem mhojea monak bilkul disona. Teach karonnak lagun jedna Goenkaram vixim kiteim ami aikotanv ani boroitanv tedna amkam Prodhan Montreachea voir ullekh kellea omor utrancho soroll ugddas ailea viret ravonam. Gellea kaim soman-amni him utram mhojea monant mhaka tonchtat.
Goenkaranchi vichitrponnachi khunna ani vagnnuk amkam aiz amchea somazant chantte pavlak melltta. Goeantuch nhoi punn je-je kodden sonvsarachea chearui konxeamni Goenkar ximpddon asat thoinsor. Ti ratchi vo disa-uzvadda ponntti gheun sodhchi goroz nam. Fokot tuje dolle ani kan matr ugte asonchi goroz. Halinchea disamni mhoje nodrek poddilleo Goenkarancheo kaim vichitr ghoddnnuko niallun hanv voir ullekh kellea utrancho vapor kortam. Agost 2005, mhoineant sonvsar bhor ximpddollea Goenkaramni Amerikek tem Afrikek ani Portugalak tem Australiak ani her desamni legun World Goa Day (Sonvsarik Goenkarancho Dis) vhodda ghonghonnant monoilo mhunn ami potrancher, ani kheritponnim maulli ghoranim (website) disa-dispottim vachlam ani azun meren vachunk mellta. Ho WGD London-cho Bab Rene Barretto Goenkarank uskavn soglleak zagrutai nirmann korun ghoddun haddunk xoklo. Agostache 20ver ho World Goa Day monounk karonn mhollear tea disa amchi Konknni bhas Bharotache ghottneche 8ve vollerent samil korun tika ek raxttrik bhas mhunn manieotai dilli to dis. Tea khatir hea disachem mhotv sambhallunk ani to dis iadostik korunk hem pavl Rene Baban fuddakar gheun marlolem. Hi ek bori khobor. (Adim hanvem GULAB masikacher vachpeank hachi barik-sarik khobor eka lekhant dilea, vachpeank ugddas astolo).
Heach WGD disa sonvsar bhor Goencheo sonvskrutik kariavolli, ani toxench Goenchem ghosta-chem jevonn, nach, mellave adi ghoddun haddle. Konknni bhaxechea nanvan ho dis amche sonvsarak ximpddolle Goenkar ektthaim ieun khoxalkaien sartat dekun heach utsovacho hetu monant dhorun hanvem Goanet hea mauli ghorachea mailing listar zonn eklea niz Goenkarak ek kallzant savn ulo marlo. Ani ho ulo mhollear tankam zor khoroch kallza-monant savn Konknni bhaxecho mog asa zalear tannim Romi Konknni bhaxechim don masik-am ek GULAB ani dusrem THE GOAN REVIEW, ek Goeant ani dusrem Mumboint savn porgott zatat, tanche vorgonnidar zaunk. "Dor eka desantle 25 legun NIZ GOENKAR zor aiz GULAB ani THE GOAN REVIEW hea don Romi lipi Konknni masikanche vorgonnidar (subscribers) zale tor - Konknni Romi bhas anik kaim vorsank sorospotichea (literature) rupan masikam vorvim jivi urunk anik ogllem boll mellttolem mhunn mhaka thir bhorvonso asa." Oxem-i bi hanvem mhojea uleant mhonnlolem.
Tea fudem hea masikanche vorgonnidar koxe zaunche ani donui masikanchea Sompadpea lagim koso potr-vevhar korunk sompork sadcho heo soglleo bariksanni hanvem mhojea uleant nivollponnim dilleo. Vorgonnidar zaun tancho tenko aslear him donui Romi Konknni masikam togonk xoktolim ani jerul Romi Konknni bhaxe pasot vaurtolim mhunn hanvem thoim soroll sangun dillem. Masikam jivim aslear Romi bhas jivi urunk anik nett ietlo hemvui bi spoxtt kellem. Punn kaim disam uprant hanvem hea donui masikanchea Sompadpeak vicharlem, kitle amche GOENKAR KONKNNI BHAXECHE MOGI vorgonnidar zaleat kai mhunn. Tacho zobab aikon hanv thondd zalom!! Je Goenkar sonvsar bhor KONKNNI BHAXECHEA NANVAN festam, nach ani sonvskrutik kariavolli korunk fuddem sorlole, ani apunn Konknni bhaxechea mogan lastam mhunn Internet-avelean pokeo dharu nasleleo FOTTAXEO martale, kotta tanchem, tantlo ekloi GOENKAR vorgonnidar zaunk toear naslo. Hacho amchean koso somzut gheunk ieta zait ?? Khorench zai kai amkam Konknni Romi bhas jivi urleli?? Vichitr Goenkar
Halinch Goeant soglea xharamni Bab Rajendra Talak hachem Aleesha hem Konknni cholchitr cholta. Hem poilench Konknni film zaka Rajki Film Puroskar favla. Setembrache 4ter mhojea kuttumba ani kaim ixttam sangatan hanv Vasku Shivam cinema ghorant tem polleunk gelom. Tea show-ak lok khub komi aslo. Cholchitr chalu astana, hanvem tancho ankddo mezlo. Sogllim mellun 55 lok aslo. Tanche modim 8 bhurgim. Hantlo, amchoch pongodd 10 zonnancho aslo. Mhunnttoch mukar anik kitem sangunk zai? Konknni bhaxechem film
.Goeant cholta
.ani tem polleunk holant Konknni ulovpi Goenkar nam!! Tem cholchitr Mhapxeam Alankar cinema ghorant choltalem tedna thoim tich got. (Hi khobor mhaka thirponnim eka Mhapxenkara koddlean mellllea).
Ami Goenkar Amchem Noxib, Nirmonn, Sukhachem Sopon, Bhuierantlo Monis adi, cholchitram uprant borim Konknni filmam ienant mhunn garannim ghaltanv. Punn jedna Aleesha sarkem dorjedar film amchea xezarchea vosreamni cholta tedna ami Goenkar khoim nidhun astat kai?? Amkam Goenkarank be-moriadik, unnea dorjeachim ani rit-rovis naslolim Hindi cholchitram polleunk vochpachi omollxik laglea. Dekunuch jedna Hindi cholchitram choltat tedna cinema ghora bhair lok urponjimni thoim asta. Ani kallea bazarant legun tiketti vikot gheun lok him filmam polletat. Barik nodren pollelear chodd-xe thoim Goenkaruch tuka nodrek poddttole. Khorem mhollear hea Aleesha sarkea cholchitrak lutt-khett zaun Goen-karancho pattimbo aspak zai aslo. Punn kotta
.oxem zalem nam
hem Amchem Noxib mhonnpachem. Vichitr Goenkar
Goenkar ami bhaxe ani tiche lipi pasot rostear ietanv, morcha kaddttanv, roste addaitanv, martir mortanv, pattosar ravun vhodd garannim ghaltanv, bhaxonnam kortanv, tiatramni voznadik kantaram gaitanv, punn Aleesha sarkim Konknni filmam ietat tedna tacher amchem durlokx veta. Aleesha filmuch kiteak? Kitle amche niz Goenkar je apunn bhaxe pasot kitem-i korunk kobul asat mhunn boddai martat te amchim Konknni potram (V/Ixtt), ani her Konknni masikam vikot gheun aplea ghora vhorun vachtat kai? Tor masikam ani potranch kiteak?? Aiz Goeant kitleo Konknni audio/video siddi utponn zatat, tor kitle amche modle Goenkar asot kai je heo original proti vikot gheun ghora vhorun aikotat vo polletat? Dubhava viret zaitech astole. Hacher hanv kosloch vad nirmann korina. Punn kotta, soglech original vikot gheun vhortat oxem nhoi
.sogleam niz Goenkaramni, je apunn bhaxeche bhokt mhonnttat tannim, zor fokt original siddi zanv visiddi gheunk ek nichev kello tor aiz Goeant vaddot veta to Video Piracy-cho denvchar jivo urcho naslo. Tacho nas zatlo aslo. Hancho nas korunk zai
.nam zalear kaim urbhebhorit amche bhav lakhamni duddu riskar ghalun aiz audio/video siddi toear kortat ani Konknni kolakarank uttejon ditat tancher niraxi zaun apli khattli-pottli ubharun posro bond korcho vell ietolo. Hatunt hartolo konn? Producer poile suvater, vhoi. Punn vhoddli har zatli amche bhaxechi ani tiche udorgotichi.
Asa kai thoim konn niz Goenkar mhojea uleak aplo kan diun mukar ietlo ani bhaxe pasot aplo mog nhoi fokot vontthamni punn khaxea kornneam udexim somazak dakhoitolo? Nam zalear mhaka bhirant dista...mhozo...Vichitr Goenkar... Semprak vichitruch urtolo.!
GULAB-achea boreponnan/October 2005.
**********************************************
Daniel F. de Souza
Konkani Writer & Freelance Journalist
C/3, IInd Floor, Elvira Apts.
Near St. Andrew's Church
Vasco - Goa 403 802
INDIA. Tel: + 91-832-2510714
Mob: 9822163329
e-mail :[EMAIL PROTECTED]
:[EMAIL PROTECTED]
" GOD DID NOT MAKE MEN PERFECT, HE MADE THEM PILGRIMS AFTER PERFECTION."
***********************************************
http://www.goa-world.com
http://www.live365.com/stations/61664 Live Konkani Music
http://www.mahableshwar.com/
Addresses:
Post message: [email protected]
Subscribe: [EMAIL PROTECTED]
Unsubscribe: [EMAIL PROTECTED]
List owner: [EMAIL PROTECTED]
URL to this page:
http://www.yahoogroups.com/group/gulf-goans
| Gulf coast real estate | Gulf shore al real estate | Gulf shores condo |
| Gulf shores real estate | Asian manufacturer | Gulf coast condo |
YAHOO! GROUPS LINKS
- Visit your group "gulf-goans" on the web.
- To unsubscribe from this group, send an email to:
[EMAIL PROTECTED]
- Your use of Yahoo! Groups is subject to the Yahoo! Terms of Service.
