Tanggal 26 Februari 2005 pribados ngawitan midamel seratan ngeunaan
Walisongo. Ngalangkunan waktos 3 tahun dina ping 28 Februari 2008,
eta seratan teh dianggit deui ku alpukahna saderek Wal Suparmo
kalayan dimuat dina Serat Kabar Suara Merdeka. Eta guaran Walisongo
teh, estu seratan sim kuring sorangan, hasil panalungtikan pribadi
tina sababaraha referensi sareng pustaka nu aya di Leiden sinareng
Den Haag.
Aya gerentes tumaros dina sanubaring ati, naon margina umat Muslim
umumna ngaraos gerah sinareng hemeng, upami ngadangu yen Sunan
Walisongo teh estuning asli urang Tionghoa. Padahal Kangjeng
Rosululloh Nabi Muhammad SAW kantos cumarios sareng nganjurkeun ka
umatna supados motekar ngulik elmu pangaweruh, sanaos dugi nagara
Cina (Al-Hadits). Kanggo urang Indonesia mah, geuningan henteu kantos
marios ka nagri Cina, jalaran Urang Tionghoana kuanjeun nu parantos
sarumping ka Indonesia.
Pamadegan kitu teh kantos diungkab ku Prof Slamet Mulyana dina
bukuna "Runtuhnya Kerajaan Hindu-Jawa dan Timbulnya negara-negara
Islam di Nusantara." Namung dina tahun 1968 buku eta diwagel sumebar
ku Pamarentah, jalaran masalah eta kalintang pekana, aya pakuat
pakaitna sinareng masalah SARA. Kunaon kitu atuh?
Mangga tiasa dilenyepan, geuning nu munggaran ngadegkeun karajaan
Islam di Jawa teh taya sanes dalah urang Tionghoa. Malahan nu wiwitan
jumeneng Sultan na ge pan urang Tionghoa nu jenengan Chen Jinwen
alias Raden Patah, alias Panembahan Tan Jin Bun/Arya (Cu-Cu).
Walisongo atanapi Walisanga teh ngandung hartosna salapan (songo)
Wali. Nanging aya oge nu kagungan pamadegan sanes, yen Songo teh
asalna tina kecap tsana nu hartosna mulia dina bahasa Arab. Pamadegan
sanesna nyebatkeun rehna songo teh awit kecapna tina sana dina basa
Jawa nu pihartoseunnana "tempat".
Sadaya para Wali teh kagungan gelar Sunan nu hartosna guru agama
atanapi ustadz. Nanging kecap Sunan saleresna mah dicandak tina kecap
Suhu/Saihu, nu ngandung hartos guru dina dialek basa Hokkian, jalaran
marantenna teh taya sanes nyeta guru-guru Pasantren Hanafiah ti
mazhab Hanafi. "Su" singketan tina kecap "Suhu". "Nan" hartosna
kidul. Marantenna teh taya sanes nyeta panganut mazhab Hanafi nu asal
muasalna ti wilayah Tiongkok palih kidul.
Peryogi kauninga, rehna kecap "Kyai" teh nu kiwari seueur digunakeun,
taya sanes sesebatan kanggo Guru agama Islam. Dina jaman Jepang
katompernakeun mah masih keneh dianggo pikeun sesebatan Lalaki
Tionghoa Totok, sapertos panggilan "Encek".
Aya deui hiji hal nu mugia janten uninga, rehna anggoan muslim nu
disebat Gamis tea nu sok diaranggo ku kaom muslim Indonesia dina
waktos ibadah netepan utamina upami bade netepan jamaah di Masjid.
Anggoan eta teh mani sarimbag pisan sinareng anggoan tradisional asli
China. Kitu deui baju Koko sareng ketu bodas atanapi nu disebat topi
haji tea, eta ge saleresna mah kawit buitna teh ti China, jalaran di
nagara Islam mah atanapi Timur Tengah anggoan kitu teh teu aya.
Aya paripaos kanggo nyucruk galur nu kapungkur mapay laratan sajarah,
Walisongo teh diadegkeunnana ku alpukahna Sunan Ampel dina warsih
1474 M. Aya salapan Waliyullah dina Walisongo teh nyaeta nu disebatan
dihandap ieu:
Sunan Ampel alias Bong Swie Ho
Sunan Drajat alias Bong Tak Keng
Sunan Bonang alias Bong Tak Ang
Sunan Kalijaga alias Gan Si Cang
Sunan Gunung Jati alias Du Anbo Toh A Bo
Sunan Kudus alias ZhaDexu Ja Tik Su
Sunan Giri adalah cucunya Bong Swie Ho
Sunan Muria
Maulana Malik Ibrahim alias Chen Yinghua/Tan Eng Hoat.
Sunan Ampel (Bong Swie Ho) alias raden Rachmat dibabarkeunnana teh
dina warsih 1401 di Champa (Kamboja kiwari). Mantenna sumping ka
tanah Jawa dina warsih 1443. Dina waktos harita di Champa kalintang
seueurna urang Tionghoa Muslim anu marukim di dinya. Dina warsih 1479
Sunan Ampel ngadegkeun Masjid Demak. Oge mantenna pisan nu ngarancang
pikeun ngadegna karajaan Islam wiwitan di Jawa nu puseur dayeuhna aya
di Bintoro Demak. Lajeng diistrenan Raden Patah alias Chen Jinwen
Tan Jin Bun salaku Sultan munggaran. Mantenna teh putera pituin ti
Cek Kopo di Palembang.
Urang Portugis ngalandi Raden Patah teh ku sesebatan "Pate Rodin Sr"
salaku "Persona de grande syso" (insan nu kalintang wijaksana)
atanapi "Cavaleiro" (bangsawan nu mulia). Nanging bawiraos kitu,
urang Walanda mah kirang percanten upamai Sultan Islam wiwitan di
Jawa teh bibit buitna urang Tionghoa. "Ma enya sultan Islam wiwitan
teh urang Tionghoa?". Karaguan eta, balukarna Residen Poortman 1928
mancen tugas ti pamarentahan Walanda nu kedah ngayakeun panalungtikan
nu saestu: Naha leres Raden Patah teh urang Tionghoa?
Poortman dipasihan tugas kedah ngagaladah Kelenteng Sam Po Kong,
sareng ngasab alias nyita sagala naskah basa Tionghoa, nu yuswana
parantos 400 tahun langkung. Seueurna nu dicandak teh kirang langkung
tilu padati. Arsip-arsip Poortman eta teh dikutip ku Parlindungan nu
midamel buku sajarah karajaan Islam wiwitan. Salajengna, buku eta teh
seueur disitir ku Tuanku Rao sinareng Slamet Mulyana, nu pada-pada
maridamel buku.
Nu ngabukteuskeun yen Raden Patah teh leres-leres urang Tionghoa,
tiasa ditingal sareng diaos dina Serat Kanda Raden Patah nu kagungan
gelar Panembahan Jimbun. Dina babad Tanah Jawi disebat salaku
Senapati Jimbun. Kecap Jin Bun (Jinwen) dina dialek Hokkian ngandung
hartos "manusa kuat".
Raden Patah kagungan putu nu dijenenganan Sunan Prawata alias Chen
Muming/Tan Muk Ming, nyaeta Sultan pamungkas ti Karajaan Demak.
Mantenna kagungan ambisi kanggo nga-islamkeun sadaya masyarakat pulau
Jawa. Saupami pamaksadannana hasil, tiasa janten mantenna
janten "Segundo Turco" (Sultan Turki ka II), atanapi sapertos sultan
Turki Sulaeman I, nu tos kasohor komara sinareng kajembarannana.
Sumber utami:
D.A. Rinkes: The heiligen van Java.
Jan Edel: Hikayat Hasanuddin.
B.J.O. Schrieke, 1916 The Admonitions of Sen Bari: a 16 th century
Javanese Muslim text attributed to the Saint of Bonang, the Haque:
Martinus Nijhoff.
De Graaf and Pigeaud: De eerste Moslimse Vorstendommen op Java
Islamic states in Java 1500-1700.
Amen Budiman: Masyarakat Islam Tionghoa di Indonesia.
Prof. Slamet Mulyana: Runtuhnya Kerajaan Hindu-Jawa dan Timbulnya
Negara-negara Islam di Nusantara.
Mang Ucup
Email: [EMAIL PROTECTED]
Homepage: www.mangucup.net
------------------------------------
Yahoo! Groups Links
<*> To visit your group on the web, go to:
http://groups.yahoo.com/group/kisunda/
<*> Your email settings:
Individual Email | Traditional
<*> To change settings online go to:
http://groups.yahoo.com/group/kisunda/join
(Yahoo! ID required)
<*> To change settings via email:
mailto:[EMAIL PROTECTED]
mailto:[EMAIL PROTECTED]
<*> To unsubscribe from this group, send an email to:
[EMAIL PROTECTED]
<*> Your use of Yahoo! Groups is subject to:
http://docs.yahoo.com/info/terms/
