Fikmin #dot dot dot" Keur anteng nulis make Word. Dot, dot, dot. Curuk nakolan tombol titik tilu kali. Na ari gurawil teh. Tilu titik ngantet, harirup sorangan. Diulang deui. Pating gurawil deui. Pagegeye. Bari jiga nu ngiceupan. Beu, boa aya jurigan. Panasaran, nyusud ku Google. Euh, cenah aya mesin koreksi otomatis aktif. Paingan. Sugan teh diheureuyan onom. Naha ngan tilu, teu kurang, teu leuwih. Nyusud deui ka Google. Ngungkaban sababaraha Kamus jeung Tatabasa. Geus kasapukan cenah. Mun elipsis cukup ku tilu titik. "Tah eta ge Ang, tetekon. Cekap titu titik elipsis mah. Teu kedah seueur teuing. Tangtos nu maca ngartoseun!" sora Kang Godi ngaharewos. Dilieuk ka tukang, geuning taya sasaha. Beu, Kang Godi ngaririwaan.
