Episode 81 : Jalma Turun gunung ti Muria
Waktu Jalma neruskeun latihanana di Gunung Muria; Anggraeni ngalayanan sagala kaperluan Jalma kalawan talaten; naon wae kaperluan Jalma disadiakeun ku Anggraeni; tapi kacirina Anggraeni teu pisan ngarasula atawa keuheul ka Jalma; malahan mah kaciri gumbira pisan; nepi ka Jalma sok rada teu ngeunah rasa lantaran Anggraeni enyaan bageur pisan. Na hiji mangsa Ki Padma rasa nitah Anggraeni anakna supaya ngadep ka manehna; atuh Anggraeni rada kaget, lantaran geus lila oge Bapana tara manggil manehna. Bari rada heran Anggraeni datang ka payuneun ramana. “Duh Ama; aya naon ama ngangkir putra ? padahal tos lami ama tara pisan ngangkir Putra ? diantep we kuring ngalayanan Kang Mas Jalma ?” “Hahahaha, kadieu sing deukeut Enung; ama aya picaritaeun ..” Saur Ki Padmarasa bari daria pisan sarta pinuh ku kanyaah. (Enduk disundakeun jadi enung). “Ieuh Enung … pan Enung teh ayeuna geus nincak dewasa; geus waktuna laki rabi, cing mun Ama nanya ka Enung, naha Enung daek ditikah ku Kang Jalma ?” Sajongjonan mah Anggraeni hareugeueun, beungeutna karasa panas lantaran asa era dibarung atoh; eta mani ku togmol pisan ramana nanya ka manehna tapi ahirna bari rada ngageter Anggraeni ngawaler ka ramana :”Duuuh Ama … patarosan Ama teh sanyatana teu kedah diwaler deui ku kuring; kapan unggal dinten oge ku Ama katingali kuring teh ngalayanan Kang Mas Jalma.” Ki Padmarasa :”Enya eta ge, jadi hartina Enung narima lamun Jalma dijadikeun salaki ?” Anggraeni unggeuk, bari bareureum beungeut. “Naon sababna, Enung daek narima ? Kumaha mun Kang Jalma geus boga papacangan ? Atawa malah geus laki rabi ?” Ki Padmarasa neruskeun pananyana mani nyecer. Rada pias beungeut Anggraeni, tapi teu lila geus kitu pok nyarita tatag pisan :”Ama, sapertos nu kauninga, kapan salami ieu teu acan pernah kuring manggihan lalaki sejen , salian ti Kang Mas Jalma ? tos kitu kapan Kang Mas Jalma sakitu gagahna ? Sakitu sholehna ? mun neangan tea mah, asa hese neangan lalaki nu saperti kitu ? Nya atuh lamun kuring katarik teh, pantes; atuh cenah Kang Jalma geus boga papacaangan; salami Kang Mas Jalma nampi kuring; teu aya wagelan; kapan lalaki mah wenang boga pasangan leuwih ti hiji ?” Ku jawaban Anggraeni sakitu, Ki Padmarasa gumbira pisan; terus we ngulapkeun pananganana tanda Anggraeni meunang kondur harita. Terus we Ki Padmarasa ayeuna mah nemonan Jalma nu keur sila di kamarna bari meleng jeung nyalurkeun enersi di sakuliah organ2na. Terus we Ki Padmarasa uluk salam nu gancang pisan dijawab ku Jalma. “Jalma. Kumaha kaayaan ujang na waktu ieu ?” “Alhamdulillah Ama, badan teh asa hararampang pisan; tanaga iasa sakarep isun disalurkeunana.” Hanca
