CARA PANDANG BENAR ================== Sateuacna sim kuring nyuhungkeun dihapunten, ngadamel judul 'cara pandang benar'. Sim kuring anu pangabisa basa Sunda-na pas-pasan ngaraos teu tiasa mendak padanan kalimat 'cara pandang benar'.
Maksad cara pandang benar, nyaeta cara pandang pikeun jalma anu keur ngajalanan jalan spiritual. Umat Islam mah geus teu aneh ku jalan spiritual teh da unggal poe oge netepan sholat 5x, ditambah dzikir jeung do'a. Tingkat lanjutna aya 'suluk' nyaeta jalan khusus nuju ka cahaya gusti nu maha suci. Atuh dina agama lain oge aya, samisal samadhi (neangan hening, konsentrasi), meditasi, retreat, atawa basa arabna uzlah. Jalma anu nyukcruk jalan spiritual perlu cara pandang benar supaya teu sasab jeung efektif tur optimal dina jalan spiritual. Ari lawan cara pandang benar teh nyaeta ilusi atawa delusi, angan-angan, khayalan, anu kabehanana sifatna subjektif. Tong Nafsirkeun =============== Pikeun jalma anu keur uzlah, meditasi, samadhi, tong nafsirkeun pangalaman batin atawa pangalaman anu karandapan. Alusna, tingali wae naon ayana. Misalna: manggih tapak suku gedena sameter deukeut situs prabu Siliwangi. Terus ditafsirkeun eta tapak suku prabu Siliwangi anu ngadatangan deui eta tempat. Eta tafsiran mawa sasab. Faktana aya tapak suku. Urang teu apal eta tapak suku saha. Tapak suku di hareupeun imah urang can tangtu tapak suku urang sorangan. Loba pisan kamungkinana. Kunaon atuh bet ditafsirkeun eta tapak suku teh tapak suku prabu Siliwangi? Kulantaran geus aya kahayang ti jalma anu nafsirkeun yen prabu Siliwangi datang ngalindungi tatar Sunda. Eta kahayang mawa ilusi, mawa khayalan. Tapak suku mah nya ngan saukur tapak suku, teuing tapak suku saha teu nyaho ari can kapanggih buktina mah. Teu kudu ditafsirkeun. Tong Aya Kahayang Goreng/Sasab ============================== Jalma anu uzlah, dzikir, meditasi, samadhi; kudu boga niat bener. Niat anu paling bener nyaeta pikeun mersihkeun kokotor tina batin. Ari kokotor batin misalna: tamak/rakus, rasa kuciwa, amarah, ujub/sombong, riya, loba kasieun. Kaasup kokotor batin lamun anu meditasi/samadhi/dzikir, hayang panggih jeung luluhur, hayang jadi jalma suci, hayang beunghar, hayang kasaktian. Eta kabeh teh kokotor batin. Jadi lamun urang salah niat meditasi/samadhi/dzikir/uzlah; malah bisa nambahan kokotor batin, lain ngurangan. Tina niat, kahayang anu sasab, engkena bakal mawa kana proses meditasi/samadhi/uzlah anu leuwih sasab deui. Misalna: pas keur meditasi ningali cahaya jiga matahari terbit ti kulon, lain ti wetan. Langsung dianggap pertanda. Padahal nya eta kamungkinana loba pisan. Dina batin urang sok aya pangalaman historis samisal trauma, amarah jeung lain-lain. Lamun urang meditasi, eta pangalaman historis bisa kaluar dibedahkeun supaya batin urang bersih tina trauma historis. Teu jarang eta kaluarna trauma historis teh sok aya pangaruh visual kana pikiran urang. Misalna asa ningali cahaya, atawa karasa aya gempa (padahal euweuh) atawa awak kukurunyudan. Eta kabeh gajala normal sacara jaringan syaraf jeung pikiran dina diri urang. Tong disambung-sambung, ditafsirkeun kaditu kadieu kulantaran saencana urang geus aya kahayang anu sasab, jadi pangalaman jaringan syaraf/pikiran urang disambungkeun jeung kahayang; jadina ilusi. Makhluk Alam Lain ================= Boh dina Islam, boh dina agama lain, geus dibewarakeun ayana makhluk alam lain saperti jin jeung malaikat; atawa istilah lain: makhluk halus/ririwa jeung dewa. Tapi urang teu boga data anu akurat kumaha macemna, misalna kumaha rupa-rupa species wangsa jin? ngan dina hadits dicaritakeun aya jin anu kadaharana teh kotoran jeung tulang; kaasup kadaharan jin anu kieu teh nyaeta sasajen ti jalma anu mere sasajen. Aya oge jin anu mangrupa fisik jiga oray, aya anu jiga serangga. Loba pisan. Jadi tong aneh, di tempat-tempat anu sok dihaturkeun sasajen ku jelema teh memang sok jadi loba makhluk halus da atuh diparaban, ngan teuing nu kumaha, anu kelas ningrat atawa kelas galandangan wangsa jin-na. Makhluk halus/jin/ririwa mungkin wae milih tempat-tempat anu maranehna resep ngumpul ngajadikeun imah atawa kampung manehna anu oge lokasina 'tumpang tindih' (beda dimensi?) jeung alam/wilayah kahirupan manusa. Lamun tempatna hirup maranehna ku urang diganggu, diancurkeun; nya wajar weh lamun maranehna ambek atawa ngamuk atawa ngalakukeun kajahatan ka manusa anu geus ngaganggu. Jalma wae mun kampungna rek katarabas jalan tol atawa rek dijadikeun bendungan kudu direlokasi heula. Atuh meureun wangsa jin/makhluk halus/ririwa oge sarua kudu direlokasi heula, ku jalma anu bisa komunikasi jeung wangsa anu kitu. Tapi anu penting, lamun pangaweruh urang teu lengkep, teu pati apal ka alam makhluk halus, ulah sok direka-reka; komo disambung-sambung jeung prabu Siliwangi anu dipihormat ku urang Sunda, jadi kabawa citra anu sasab. Sok mangga geura ditafakuran pan prabu Siliwangi teh raja anu bijak; asa moal mungkin ngalakukeun amarah anu jahat nepi ka nilasan jalma ku cara mere supata (kutukan). Meureun eta pamanggih teh kulantaran sabagean masyarakat Sunda hayang nyalindung ka raja anu adil jeung kawasa, kulantaran asa teu walakaya deui ngalawan karakusan jalma di jaman ayeuna. Tapi lamun carana sasab, kulantaran teu boga pangarti/pandangan anu bener, kadituna oge jadi mawa sasab kana pamikiran masyarakat. Salah sahijina mere citra goreng ka prabu Siliwangi. Wallahu'alam Febi Ahmad Hazairin ===================
