Ass,wr,wb,
Kok karak kaliang jo rakik maco indak pulo
batinggakan di Palembang, indak bagai juo doh, asa lai Tuan salamaik sampai di
Bogor baliak.
Nan paralu pasan ambo ciek di tanggal 24 jo 25 Juli ko
terpenuhi, tarimo kasih banyak.
Ambo barangkek dari palembang jo Kijang nan pakai roda
sasudah sumbayang jumahaik 23 Juli, tantu liwaik lintas timur yo ndak
Tan.
Wassalam,
M.St.Bangsawan
----- Original Message -----
Sent: Friday, July 16, 2004 11:01
AM
Subject: [EMAIL PROTECTED] buah tangan
Assalmu’alaikum Wr.Wb.
Bak kato-kato urang tuo juo, bajalan babuah tangan, malenggang babuah
batih, karano kapatangko ambo lai pulo manjalang kampuang, tantu ado saketek
banyakno carito nan dapek ambo sampaikan, kok lai paguno asamo kito ambiak,
kok indak samo dibuang dibulakang.
Partamo, satantangan kondisi jalan, kapatangko pai jo pulang ambo lewaik
Lintas Timur, kondisi jalan lai rancak, tapi ado juo nan kurang elok, khususno
antaro dan antaro Tulang Bawang jo Kayu Aguang dan Palembang jo Banyu Lincia,
disiko jalan balubang-lubang, tapaso kito balambek-lambek, tapi kalau oto lai
lai gadang, jalan balubangko dilanuyauno sajo. karano lubang lai indak dalam
bana. ciek-ciek iyo lai pulo lubang nan agak dalam. Kalau dapek handakno di
jalan antaro Tulang Bawang sampai ka Banyu Lincia ko iyo siang hari, karano
barito nan didanga, daerahko tamasuak pasawangan, wakatu ka balaik ka Jakarta,
ambo dicubo diambek dek anak-anak mudo 6 urang didaerah antaro Kayua Aguang jo
Tulang Bawang, wakatu itu ambo ari sadang pukua 11 malam, tapi indak ambo
acuahkan, ambo pacapek lari oto, . Sasudah di Jakarta, tadanga diambo maso
tatangkok pulo babarapo urang nan marampok di Jalan.
Kaduo, ari akaik, sahari sabalun Pemuli Pres/Wapres, ambo lai babau-babau
jo urang kampuang, sungguahpun kampanye alah balarang, nan kami iyo bacarito
juo kian kamari, tamasuak carito sia nan kadipiliah. kan indak dilarang
bacarito doh, apo lai antaro kamanakan jo mamak, rang mudo jo nan tuo.
Alhamdulillah, nan dimukasuk lai sampai, nan di ama lai pacah.
Katigo. dek lai agak lamo dikampuang, disampiang tugeh utamo takarajokan,
mako lai pulo nan taturuk, tamasuak batamu jo Mamak nan dari Batusangka, baitu
pulo nan di Pitalah Bungo Tanjuang. Inti carito jo Niniak Mamak ko, iyo indak
lari dari masalah urang awak kni ko doh, utamono masalah Kapemimpinan urang
awak sarato kahidupan anak mudo deikampuang. Iyo lah banyak bana ragi nan
barubah. hasia kaji iyo nak dipasamokan diawak nan di kampuang jo nan di
rantau untuak mambangkik batang tarandam, rasono indak mungkin urang lain nan
mangajangi nan lapuak, nan mampabarui nan usang.
Kaampek, wakatu di kampuang lai pulo ambo dibaok maanta marak pulai,
kabatulan nan baralek adolah urang Sariak (Sungai Pua) . Nan ambo hadok-i
wakatu maanta adolah, :
- Baantakan siang ari (kalau dikampuang ambo iyo malam ari)
- Nan maata adolah laki-laki jo padusi (kalau dikampuang ambo iyo
laki-laki sajo)
- Makan bajamba pakai pinggan (talam), sambano ciek sajo, baitu pulo
parabuangno (kawa) samacam sajo. (dikampuang ambo iyo bajamba, sambano
paliang indak 6 macam, parabuang 6 macam pulo,)
- Pasambahan nan dibaokkan :
- Pasambahan tantang duduak dari Sipangka
- Pasambahan ka makan jo parabuang dari Si Pangka
- Pasambahan manyampaikan muasuk (takana di hati takilan di mato) dari si
alek
- Pasambahan maanta marak pulai (dari si alek)
- Pasambahan mam pitaruahkan marak pulai(dari si Alek)
- Pasambahan maisi carano / adaik (si alek mintak kapado si Pangka untuak
mangatangahkan carano, nan batutuk jo kain Dalamak, Carano dipalegakan ka si
elek, tiok alek manyuruakkan pitih ka dalam carano tu) Dek karano ambo indak
ado parsiapan sabalaunno (indak tau) mako tibo carano dimuko ambo, ambo
rosok saku, ambo gamgam tangan, basuruakkan pulo tangan kadalam carano
(padohal indak barisi) sasudah itu iyo capek sajo ambo kisakan ka nan lain,
(dikampang ambo iyo indak ado doh adaik maisi caranoko)
- Baru sambah kapulang dari si alek
- Sasudah makan jo minum, kami babaliak katampaik masiang masing, sarato
jo marak pulai (marak pulai indak tingga doh.)
- Malamno baru dintakan pulo baliak marak pulai karumah anak daro
(pangiriangno laki-laki agak salapan urang, nan padusi banyakno 6 urang,
biasono nan padusi ko tingga baduo urang untuak pangawani marak pulai, tapi
kapatangko alah diubah pulo, babaliak sadono, nan tingga adolah anak ketek
sabagai sandaran tabuang 2 urang.
Dek lah banyak pulo nan dicaritokan, elok dicukukkan dulu sampai disiko,
nan lain untuak nan kadatang.
Wassalmu'alaikum Wr.Wb.
Bandaro Labiah
Khusus kapado Tuan H. M. St. Bangsawan, tarimo kasi banyak ateh jamuan di
Palembang, salam pulo ka kaluarga di Palembang, tagah ka babaliak indak jadi
singgah, karak kaliang jo rakik maco indak pulo batinggakan.
Yahoo!
Messenger - Communicate instantly..."Ping" your friends today! Download
Messenger Now
____________________________________________________ Berhenti/mengganti
konfigurasi keanggotaan anda, silahkan ke:
http://rantaunet.org/palanta-setting
___________________________________________________
|