Manolah Af, Tarimolah simpati ambo atas perjalanan hiduikmu sanak. Hiduik adolah panggung sandiwara, kato sebuah lagu. Sinetron lah caro kini Semogalah dikau tetap tabah. Amin Salam dari subarang jauah ajoduta/57/usa.
Wady Afriadi <[EMAIL PROTECTED]> wrote: Tantang diri Ambo; si WADY AFRIADI ================================== Yth. Dunsanak kasadonyo; Izinkanlah ambo tagalak sengeang saketek, ha ha ha... HA HA HA.... Mancaliak judul posting ambo, pastilah dunsanak batanyo tanyo, "Ha, apo pulo nan kadisampaikan paja ko nan ka mambuek urang resah sadonyo..." Baitu mungkin tanyo sado dunsanak dalam hati. Mungkin (ambo agak GR juo saketek) alah cukuik tarkenal pulo ambo di palanta ko... Jikok si Wady Afriadi nan mambuek posting, mangko urang panasaran nak ka mambukak, "apo pulo nan dikecekkan paja tea ko?" baitu mungkin pikiran dunsanak. Memang sanang juo jadi urang terkenal ko! Bandiangkan dengan seseorang banamo Darmizal, misalnyo. Bialah alah masiak inyo dek duduak di palanta ko, anyo ciek jo duo urang nan mananggapi keceknyo. Jikok dunsanak iyobana lai urang awak nan tau jo ereang gendeang, tantu alah bisa manangkok mungkasuik ambo mambukak wacana2 nan kontroversial itu... :) Namun baiaklah Mak, sagan juo ambo baicak icak taruih. Elok dikatokan sajo sia diri Ambo nan sabananyo. Supayo jaleh pulo sisiaknyo dek dunsanak sakalian, tantu pulo latak pusa-pusanyo. Namo Ambo iyo sabananyo WADY AFRIADI. Tapi kok sempat dunsanak singgah kadaerah2 dakek kampuang ambo, nan banamo Tiaka, Kecamatan Guguak, Limupuluah Koto, Payokumbuah mudiak, jan dicari namo si WADY disinan... Namo Ambo sabananyo dihimbaukan urang di kampuang yaitu si AF. Ha ha ha... Iyo bana namo urang awak bana kan? Bialah ambo jalehkan saketek asa kato WADY tu nan dilakekkan ka ambo sabagai namo dek urang gaek. Arti kato "Wady" tu kecek urang adolah banda aia. Tapi arati nan itu mungkin indak tantu dek gaek ambo katiko maagiah ambo namo. Alasan gaek ambo maagiah namo tu adolah karano kato Wady tu barasa dari gabungan kaduo inisial namo urang gaek ambo. Nan Ayah ambo banamo DAHYUNIS. Sadangkan Ibu ambo banamo SYAWALIS, dek karano lahia dakek hari rayo mungkin. Jadi kutiko baintaian maso dulu, acok baliau baduo ko manyambuang2kan namo, dek ati sadang babungo-bungo. Sahinggo dapeklah kato tu. Pernah basobok dek ambo kain ketek usang, nan batulih jo jahitan tangan nan sabana rancak, tapi dek lah usang, tantu ndak rancak tampaknyo lai. Di kain saputangan tu memang tatulih namo Wady tu. Ruponyo itu kenang2an maso baliau2 ko dulu nampaknyo. Gaek kaduonyo indak pernah mancaritokan sarupo itu ka ambo do. Ambo sajo maambiak kasimpulan surang dari bukti2 nan ado. Ayah Ambo nan banamo Dahyunis, bainisialkan sbg Dy, sadangkan panggilan Ibu ambo nan acok dihimbau urang "Wal. o...Wal...? Dima kau ko?" Disingkek jadi Wa sajo. Mangko jadilah kato Wady tu, dan bukan kato Dywa (iko ndak sanereh tadonga do). Jan sasek pulo sanak, baranam kami badunsanak, pangka namo Wady kasadonyo! * Tantang kagiatan ambo kini, iyo maaja di SBI Madania, tapi cuma guru eskul (honorer). Ha ha ha.... Alah buluih Pak Guru Online Rangkayo Mulie dek ota ambo. Katiko inyo batanyo visi jo misi, baa ambo ka manjawek? Tantu indak bakaik2 jo ambo do. Tapi Rangkayo alah tibo rabo daulu, baliau putuihkan langsuang kalua dari Urangawak. Salain maaja eskul musik di Madania, ambo maaja pulo di tampek lain. Ado sebuah klinik untuak anak2 autis di Puri, Jakarta Barat, dan ambo maaja musik pulo disinan. Kadang2 alah samo2 galak2 sengeang sajo kami dalam baraja, karano gurunyo ampia samo akanyo jo anak2 autis tu..! Muriknyo autis, gurunyo tea, Ha ha ha... Salain itu, ambo acok juo mangamen di tampek urang baralek, bamain talempong sarato mahambuih bansi, mairiangan rang mudo nan manari piriang. Malagu sakali-sakali. Lagunyo indak ka asak dari itu ka itu sajo, "Malam Malam Baiko", "Ondeh Ondeh Laruik Sanjo", "Anak Sipasan dalam Rimbo", sarato "Bugih Lamo." Kaampek lagu tu alah apa dek ambo dilua kapalo, ndak paralu dunsanak maragukannyo! Pernah ambo andak mancubo mambaokan lagu nan lain, dek bosan pulo awak itu kaitu sajo, mangko ambo apa2 lah lagu "Malang Bacinto" nan dilaguan dek Elly Kasim. Baru ka sabarih ambo mulai balagu, langsuang disagah urang, "Hoi...! Apo lagu tu?!!! Urang sadang baralek, anak daro jo marapulai sadang basandiang duo, 'Malang Bacinto' nan angku laguan. Ndak sasuai tu do!!!" Mangko langsuang lah ambo maaliah capek, batokok talempong maagiah intro, babaliak ka lagu "Anak Sipasan dalam Rimbo" juo baliak. Alah duo taun ko Ambo makan di tampek urang baralek tu. Palaminan nan acok mahimbau sanggar dimano ambo acok dipanggia, adolah Palaminan "Djus Masri", "Ganto Sori", sarato "Des Iskandar" sakali-sakali. Nan paliang acok adolah Djus Masri, ambo lah kenal elok jo Ibuk Djus tu, urang Batusangka, nan barumah di Kemanggisan, Jakarta Barat. A..., numpang lewat saketek yo sanak... Baurusan jo pariuak bareh juo ko. Jikok ado dunsanak nan ka maadoan acara2 nan agak baibo-ibo saketek, sarupo "Malam Inaugurasi", "Malam Renungan terhadap Kampung", dan acara2 semacamnyo nan butuh suasana sadiah, mangko imbau sajo lah Ambo untuak main bansi..! Masalah pitih panjapuik, jan gaduah bana. Alah sadang ka ongkos dek ambo, sarato pambali rokok Samsu saketek, alah tu mah... Kok indak bana ndak baa juo, ganti manolong malah ambo. Ambo serius ko. SMS sajo ambo kok kaiyo. 0815-970-1611. Kalau bansi ko alah kawan hiduik dek ambo. Cuma saluang nan alun baitu bakawan bana jo ambo, mahambuihnyo agak payah daripado bansi. Baitu pulo garitiaknyo. Acok ambo babansi surang mairiangan urang manikah, dunsanak. Pernah suatu wakatu--indak baduto bagai Ambo do--antah dek bunyi bansi ambo, antah dek yobana taraso dek urang nan hadir baa sangaik khidmatnyo upacara pernikahan tu, ampia sado nan ado manangih manitiak-an aia mato... Pernah suatu sanjo, sasudah bamain bansi sakarek ari di Perumahan daerah Cibubur, wakatu tu jo Uni Frieda (nan punyo Sanggar "Harrida" di Cililitan) sabagai MC nikahnyo, titiak pulo aia mato ambo manjadi-jadi. A nan mambuek ati ambo kanai sedemikian barek, adolah takana dek ambo suatu hal... Iko karajo den, mahambuih bansi mairiangan urang manikah, tapi pernikahan diri den surang hancua bakapiang-kapiang... Itu nan takana dek ambo, sanak. A iyo tibo pulo abilih sadiah ka ambo sangkek tu. Batua, kongsi ambo jo urang rumah alah pacah. Alah sataun pulo ambo iduik mambujang baliak. Bujang marando. Urang rumah ambo indak paham jo ambo lai. Dek karano; 1. Ota ambo samo gadangnyo jo salero ambo 2. Pitih balanjo nan ambo agiah, jan ka pambali badak, pambali bareh sajo indak cukuik Ambo lah baranak surang, banamo Selina Destiani nan hari Sinayan kapatang baulang tahun kaduo itu. Wakatu ambo pai mancaliak anak ambo nan ulang tahun tu, mancaliak ereng sajo mandeh dari anak ambo tu ka ambo. Banyak pulo kaluarganyo nan lain nan hadir di sinan, mancaliak buruak sadonyo ka ambo. Bakcando ka dimakannyo ambo. Akhianyo, daripado marusak suasana, sabalun acara mahambuih lilin sarato malagukan "Selamat Ulang Tahun" mulai, ambo mintak diri (padahal indak ado bagai nan manyalang do), pulang. Ambo kecekkan bahaso ambo harus menghadiri acara Israk Mi'raj, nan memang bartapatan pulo jo ari itu. Walaupun mandeh jo eteknyo kasadonyo caliak buruak, nan anak ambo bagayuik ka ambo, malakok ka ambo, manuruik. Padahal baju rancak lah dilakek-an mandehnyo, mahkota ulang tahun alah talatak di kapalonyo, siap untuak mahambuih lilin. Namun inyo nio jo papa-nyo sanak... Manangih ambo baliak wakatu sadang manulih email ko sanak. Baa kok coiko bana untuang ambo jo anak ambo... Tapi wakatu itu, bajatuah-an sajo aia mato ambo baliak kadalam. Ambo kicuah sajo anak bahaso Papa indak ka pai bagai do. Katiko inyo malengah, ambo cigin. Taisak-isak ambo sapanjang jalan manuju jambatan layang tampek ambo ka ma-stop oto metromini. Baitulah kahidupan Ambo, sanak. Kalau dikaji sadiahnyo, labiah sadiah daripado pilem India. Tapi apo kadisabuik. Ambo jo urang rumah tu samo2 sakampuang. Cinto partamo kecek urang. Tapi dek kami pacah ko, pacah pulo kaduo kaluarga di kampuang. Sampai kini, indak baelok-an antaro urang Caniago (kampuangnyo) jo urang Piliang (suku ambo) di nagari ambo tu. Kabatulan pulo samo jo sejarah perseteruan Dt. Perpatiah nan Sabatang jo Dt. Katumangguangan. Baitu buruaknyo jo urang sakampuang. Jikok pacah, buruak bana pacahnyo, ndak kabisa elok-elok lai saumua hiduik. Jikok dikaji elok,iyo sabana elok pulo jikok awak lai bisa saiyo satido. Mantan urang rumah ambo, kini nampaknyo alah manamukan pulo tambatan atinyo nan baru. Memang sisiaknyo rancak, tampek karajo lai elok pulo, jadi capek-lah dapek pangganti. Mudah-an anak ambo lai ndak lupo jo ambo sbg Papa-nyo nan kanduang, walaupun inyo ado pulo ba Papa baru. Kecek etek Rosma, nan marupokan sumber informasi terlengkap di kampuang ambo, nan dismskan dek kamanakan ambo nan kuliah di IKIP Padang (UNP), mantan urang rumah ambo ko ka baralek baliak bulan Desember mandatang, akad nikah ka dikampuang, baralek iyo pulo digedung di siko (Jakarta ko). Ruponyo balambin love baliau ko langsuang jo kawan samo sakantua, indak lamo sasudah ambo di-usianyo. Wakatu inyo mausia ambo tu, kain ambo diungguakkan disuduik, gitar ambo bacampak-an kateh ungguak kain tu, "Bacampak waang dari siko! Den agiah wakatu sampai pukua anam sanjo!" Baitu ultimatum tarakhir nan ambo tarimo. Memang katiko babarapo kali ambo mancaliak anak, basuo inyo disinan. Ambo main jo anak ambo, inyo mangecek balamo-lamo di suduik. Ruponyo, indak urusan kantua lai ruponyo. Urusan "nonit" (istilah Mak Iyuh Gosoh) kironyo. Tapaso lah ambo capak-capak baruak sajo mangunyah2 pawa, sarupo jawih nan mangunyah pawa (mangunyah2 baliak rumpuik nan alah dimakannyo) dalam dangau. Calon-nyo tu dibandiangkan jo ambo, tantu antaro langik jo bumi jaraknyo. Hondanyo sajo Megapro, sadangkan ambo, kureta angin indak tabali sampai kini. Mungkin dunsanak ado nan ka batanyo, baa kok pandai bana ambo maota mambahas barbagai macam hal nan kontroversial di berbagai milis? Baa kok sagadang itu bana ota ambo? Nan partamo, ambo gadang di lapau mak. Babagai tingkah jo kurenah urang di lapau tu, tarekam di kapalo ambo sampai kini. Lapau tampek ambo duduak siang jo malam, pagi jo sanjo indak tantu jo wakatu, nan ado di kampuang tu, indak ado tampek nan bisa menggantikannyo kama juo ambo pai. Di lapau di kampuang awak, tarutamo di nagari ambo nan banamo Tiaka, Kecamatan Guguak, Limpopuluah Koto, Payokumbuah mudiak, ambo manamukan "the sense of humour" nan khas, nan mambuek ambo sakik paruik dek galak, nan indak bisa ambo tamukan dima juo di rantau ko. Walaupun dalam caro nan agak babedo, nan lain nan mambuek ambo sadamikian tapangaruah adolah caro Mark Twain bacurito dalam malukihkan karakter2 dalam ota-nyo, tarutamo dalam salah satu curitonyo nan sangaik tanamo, manganai si buyuang nan banamo Huckleberry Finn. Urang santiang kah ambo ko? Baitu mungkin pangana dunsanak nan agak ragu. Dima pulo ko ambo ka santiang, Mak. Matematik ambo se merah kutiko sikola. Dalam bakali-kali wakatu maetong bara baliak pitih, acok ilang aka ambo. Ambo tarimo sajo bara diagiahkan urang. Iyo pernah, takarambuang ambo pas ambo etong jo karateh di rumah, sasek etong urang manggaleh kironyo, ambo nan rugi. Kababaliak baliak, indak mungkin. Tapaso lah baapuih se muncuang lai, bagauik kapalo. Apolai jikok dibandiangkan jo dunsanak2 kito nan memang urang2 santiang nan kuliah di perguruan tinggi negeri tanamo, fakultas teknik pulo lai, tantu ambo ko hanyo samo jo hapuih kaki sajo dibandiangkan jo urang2 tu. Memang kadang2, agak malu pulo ambo, jikok salah surang dari dunsanak kito nan "barisi" tu mananggapi pulo carito ambo. Ota lapau ditanggapi dek urang ilmiah, baa kecek ambo ka manjaweknyo? Apolai banyak pulo dunsanak kito nan batua2 tingga di lua nagari. Alah manjadi urang nan mamacik pulo di lua nagari. Sadangkan ambo? Iyo lai acok ambo kalua nagari, ka tangah rimbo. Jauah dari nagari. Itu nyo pangalaman ambo dilua nagari. Dek urangnyo suko maota batea-tea pulolah, ambo cubo pulo mambukak lapau surang, lapau nan maya ko, batulih namo "Lapau Urangawak" di papan, bapanggia pulo urang nak tibo. Ondeh... lah panjang pulo carito ko sanak kasadonyo. Alah tu, ambo sudahi sampai siko. Lain wakatu ambo sambuang baliak. Dek lah jaleh kini sia diri ambo, tantu di maso kamuko awak bisa saliang mangarati. Dunsanak jo Mamak2 kasadonyo, bisa paham pulo jo gaya ambo maota. Iyo ambo akui, iman di dado nan di guncangnyo (bakcando lagu Mis Ramolai) dek ota ambo nan kadang2 dari nan barasiah sampai nan aak nan bacaritokan. Bagi urang awak nan tantu jo garak, tantu jo kilek ikan di lauik, tantu dapek pulo mamahami, bahasonyo: sabarapo dalam urang awak memahami agamo, sajauah ma awak mangarati jo akidah sarato bisa manjalehan ka urang lain dengan caro nan elok, kini ko sadang maadok-i ujian dek ota ambo. Gala ambo dek urang nan mampaolok-olok-an ambo dikampuang adolah: "Af Cabah Cembong Godang Ota" Baitulah, Mak. Ha ha ha.... Mudah2an maklum. Talabiah jo takurang, tasasek sarato takaleru Kito habisi jo maaf, basudahi jo bakarilaan Jum'aik, 17 September 2004/ 2 Sya'ban 1425H. Wassalam, Wady Afriadi ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________ ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
