Kato "Kongsi" ko acok juo dipagunokan dalam bahaso Indonesia, salain nan dipagunokan dek urang awak dalam bahaso Minang.
Sarupo nan alah ambo sampaikan, ambo indak ka manulih disaratoi "kaki nan bacataik" sarupo anak2 Unand nan indak sumbarang urang bisa masuak ka sinan tu do.
Melainkan ambo ka maota tantang kato "kongsi" sapanjang pengetahuan aka ambo nan singkek ko, bak cando di lapau sajo.
Jikok dunsanak nak tau pangaratiannyo sasuai jo kamuih, silahkan pulo sigi baiak di internet maupun di buku kamus nan subananyo.
Satau ambo, kato "kongsi" ko dipagunokan untuak aratian "bakarajo samo". Untuak mambedakannyo jo "bakarajo surang".
Di kampuang ambo nan banamo Tiakar Guguak, di Pikumbuah Mudiak, dulu ado nan namonyo "kongsi nagori".
Iko ndak bahaso Japang do dunsanak, tapi aratinyo adolah "kongsi nagari".
Nan kongsi nagari ko tardiri dari babarapo urang anggota. Cukuik banyak juo lah anggotanyo. Jadi, kongsi nagari ko mangarajokan sacaro basamo-samo tiok sawah ataupun parak dari masing2 anggotanyo.
Misalnyo, masih takona dek ambo anggota2 kongsi nagor tu: Mak Nizar Bulan, Mak Cun, Ruslan, Suten Mudo, pak Taufik (mantan kapalo Desa dan jugo mantan mintuo ambo), dan lain lainnyo.
Jadi, karajo tu dimulai dari mamangkua parak Nizar Bulan. Sasudah tu porak Mak Cun, sasudah tu sawah Suten Mudo, dan sataruihnyo sampai kasado anggota dapek bahagiannyo surang-surang.
Salain mangarajokan lahan punyo anggota, nan kongsi nagari ko dapek pulo diimbau untuak manggarap parak atau sawah urang nan bukan anggota. Tantu sajo jo pahimbau-nyo lai. Beko upah dari bakarajo tu dibagi basamo-samo atau masuak kas kongsi untuak dijadikan pambali minum kawa.
Dek adonyo kongsi nagari tu, iyo ndak ado parak nan gadang sawah nan laweh dinyo lai. Lai mancoliak ambo katiko urang kongsi nagari mangarajokan sawah bakelok Tek Nurli, di baruah Guguak. Jikok limo urang bakarajo mamangkuanyo, mungkin indak salasai dalam tigo hari. Tapi dek kongsi nagari tu nan mangarajokan, alun tabanam matoari di baliak bukik Tiakar, alah sudah sawah laweh tu tapangkua nampak dek ambo.
Kauntuangan dari bakongsi ko iyo banyak nampaknyo. Pangalaman juo nan maajai ambo tantang kagunoan dari bakongsi ko.
Pengalaman ko adolah wakatu ambo masih ketek2 juo baru.
Biasonyo jikok wakatu lai mangizinkan, kami karajokan sawah kami nan tigo piriang di baliak Batang Namang, di baruah desa Kubang Tungkek, satantang jo Danguang-Danguang. Sawah tu adolah sawah urang Caniago Pincuran Mudiak, kaum dari urang gaek ambo nan laki-laki. Hak untuak manjadikan sawah tu cuma diparuntuakkan untuak urang gaek ambo tu. Jikok gaek ambo tu maningga, mangko sawah tu babaliak ka urang Pincuran, indak jatuah bagai ka kami do. Kalau harato tuo tantu jatuahnyo ka anak nan padusi, sasuai paraturan dalam adaik. Dek karano tibo di bagian gaek ambo tu punah (indak ado nan padusi), jikok gaek ambo ndak ado lai, tantu jatuah ka kamanakan baliau painyo.
Wakatu tu, ambo ditugehkan dek urang gaek mamangkua sawah tu, baduo jo adiak ambo.
Untuak manambah samangaik kami bakarajo, mangko dijanjikanlah dek gaek ko bakeh kami "balanjo" sebagai reward karajo kami tu. Baa kecek liau, "Urang lain mangarajokan sawah tu, aden upahan juo. Jikok kalian nan mangarajokan, tantu upah urang tu dek agiahkan ka kalian."
Tantu tagak talingo kami mandanga kecek gaek tu. Bayangkan, upah urang karajo sahari nan ka dapek! Walaupun kami mangarati bahaso gaek ko indak maupah kami, sabab hasianyo tantu untuak dimakan basamo juo.
Tapi tantu janji nan alah kalua tu harus batapek-i!
Mangko ambo sandang lah pangkua jo adiak ka baruah baliak Batang Namang tu. Iyo agak jauah juo saketek dari rumah ambo.
Tapi, ado kawan adiak ambo nan manuruik surang. Namonyo si Kuluh (namo subananyo sia kolah - eh lai takana dek ambo, si US, bahimbaukan Kuluh di Tiaka). Dek ado pangkua balabiah, sato pulo nyo maangkuik.
Mangko, batigo-lah kami bakarajo pagi tu, kiro2 pukua sambilan matoari alah ka naiak, kami mulai masuah ka lunau.
Katiko urang abang wakatu luhua tibo, alah ampia saparo salasai dek kami. Ondeh, raso ndak kalamo lai salasai rasonyo.
Sadang makan nasi bungkuih nan kami bao dari rumah tu sambia duduak di bawah batang baringin nan akanyo manjulua ka aia batang Namang tu, ado nan takana di ambo.
"Waden bakarajo batigo. Jikok tau gaek beko bahaso urang batigo nan bakarajo, tantu dibagi tigo-nyo upah tu. Bara nan ka dapek di den beko?" Sato pulo babisiak setan ka talingo ambo, "Ndak amuah tu do! Bara waang ka dapek jikok dibagi tigo..."
Mangko, ambo bukak etongan jo adiak ambo sarato si Kuluh sudah makan tu.
"Kalian ketek2 baru, nan tapangkua di den labiah banyak daripado kalian. Jikok dibagi tigonyo balanjo dek Apak beko, a iyo ndak sasuai rasonyo. Ndak amuah tu do!"
Mancaliak heran se adiak ambo ka ambo baduo jo si Kuluih mandanga kecek ambo tu. "Apo ko mungkasuiknyo?" Baitu mungkin tanyonyo dalam hati. Tapi lai dinantikannyo juo ambo malanjuikkan.
"Kini baitu. Kito bagi karajo nan tingga ko. Kito bagi duo sawah nan alun tapangkua tu, alen manyalasaikan saparo, kalian baduo manyalasaikan saparo. Jikok kalian dulu salasai, kalian buliah kateh."
Mandanga lanjuikan kecek ambo tu, pareman nan baduo tu nampaknyo alah mangarati. Iko bakaik jo kepeang nampaknyo, baitu pikianyo. Kepeangnyo beko tantu dibagi pulo sasuai jo pambagian tu, nampaknyo kaduonyo alah paham jo mungkasuik ambo.
Sasudah mangecek tu, ambo buek garih jo kaki diateh boncah sawah tu, mambagi duo karajo nan tingga.
Dek inyo labiah ketek dari ambo, tantu adiak ambo jo kawannyo tu tapaso manuruik. Dipangkuanyo baduo bagiannyo, ambo mamangkua pulo bagian ambo surang. Kami ndak mangecek bana lai sudah tu.
Tapi, lamo-lamo, ambo caliak daulu pulo nampaknyo inyo baduo daripado ambo ko? Alah tigo alua dinyo salasai baduo, dek ambo duo alua tangguang juo baru.
Alun tibo wakatu tuasa (Ashar), salasai dinyo baduo bagiannyo. "Sasuai kecek uda tadi, kami dahulu kateh." Kecek adiak ambo tu.
Agak tagagap ambo dinyo. Wanyo baduo pai kateh, ambo ka tingga surang mangarajokan nan tingga!
Tapi dek ambo nan mambuek paraturan tadi tu, tantu tapaso ambo manurutinyo!
"Yolah, pailah kalian kateh." Kecek ambo akhianyo. Lai ambo caliak2 sabanta bagian nan dipangkuanyo tu, tapi salasai kok pangkuanyo, indak ado bagai batang padi mancaguik kateh lunau lai. Baa pulo ambo ka manahannyo?
Tapaso lah ambo manggarutu mamangkua surang bagian ambo tu.
Alah babunyi tengkong mugarik (magrib), ambo di tangah sawah juo baru. Indak ka disalasaikan, kabaa pulo.
Alah kalam ari baru ka salasai dek ambo. Katiko ambo mambasuah lunau (lupur) nan bakubang kaki, di ia batang Namang nan janiah tu, a iyo agak taibo ati ambo dinyo.
"Baa kok co itu den jo adiak. Cubo basamo2 sajo karajo, alah salasai dari tadi."
Sadang mambasuah kubang tu, hanyo suaro koncek nan tingga mangawani ambo. Alah kalam di Batang Namang tu, iyo lah mulai takuik pulo nan tibo.
Katiko ambo tibo di rumah baliak. Adiak ambo baru pulang pulo. "Dari ma waang tadi sasudah dari baruah tu?"
'Dek uda suruahkan kami kateh, tantu ka tangah lapang kami lai." Baitu jaweknyo.
Tangah lapang itu adolah lapangan bola dalam bahaso Tiaka. A iyo sabana kalera, pikia ambo. Inyo dapek bamain bal di tangah lapang, ambo tapaso di tangah sawah sampai ari kalam. Tapi dek karano ambo nan mambuek aturan, kasia ka berang?
Iyo dibagi tigo-nyo dek gaek balanjo tu. Ambo dapek saparo, adiak ambo babagi duo kawannyo si Kuluh.
Tapi raso badan ambo nan bak cando diambuang-ambuang cigak sudah tu, ditambah pulo ndak dapek bamain bal sanjo tu, rasonyo ndak sabandiang jo balanjo nan dapek tu do. Apolai sasudah makan malam tu, lamo pulo gaek mangecek maajai ambo pakaro kongsi tu.
Ruponyo iyo labiah sonang bakongsi tu daripado surang!
16 Oktober 2004 (Wady Afriadi, 30th)
P.S.:
Tapi balain pulo nan ambo alami bataun2 sasudah tu. Tapeknyo di taun 2003, ambo mangalami pulo kajadian nan bakaik jo kongsi ko baliak, yaitu: pacah kongsi.
____________________________________________________
Berhenti/mengganti konfigurasi keanggotaan anda, silahkan ke: http://rantaunet.org/palanta-setting
------------------------------------------------------------
Tata Tertib Palanta RantauNet:
http://rantaunet.org/palanta-tatatertib
____________________________________________________
