Wa'alaikumsalam wr.wb., Rangkayo Rahima (biaso pulo ambo sapo ustatzah mudo Rahima)
Iyo baitulah kaadaanno. Sanang ati awak jo kabaradoan Palanta awakko, tampek bakucindan bacarito, tampek malapehan taragak ka kampuang halaman, paliang indak jo mangana-ngana labuah nan pasa tampek lalu, padang nan laweh tampek bamain, sarato tapian tampek mandi katiko maso ketek-ketek saisuak. Disiko awak maota, bacarito, batanyo, babarito, manasihati, bagarah, bahkan kadang-kadang batangka-tangka ketek. Kadang-kadang ado nan talendo ndak sangajo, ado nan tasintuang ka naiak, talantak ka turun. Tapi alhamdulillah lai indak ado na sampai bakarupek-an bana. Walaupun namono palanta (panah rasono ambo manulih arati palantako dulu), aratino sarupo lapau ketek di tapi labuah, tampek urang datang jo pai, ado nan duduak basanda lamang, ado nan maunjua-an kaki, ado nan minum te talua, ado nan makan bubua samba, namun awak alah samo sapakaik bana (paliang indak tuo-tuo palanta-ko) bahaso disiko awak iyo agak ingin suasanano elok andakno, bataratik andakno, tenggang manenggang andakno, baraso bapareso andakno. Kok lai di antaro awak nan salah-salah langkah, nan kok ta soroang dek lupo, atau tadaulu dek khilaf, alhamdulillah lai ado sajo nan tatap amuah sato nyinyia mangana-an sarupo mak Bandaro nan di Bogor tu, sarupo mak Darul, sarupo bundo Nismah, sarupo nyiak Sunguik sarato banyak lai nan lain-lain. Jo suasana sarupo itulah kabasamoaan awak tapaliharo salamoko. Dek namono lapau ketek di tapi labuah, ado urang nan datang jo pai, ado urang nan singgah sambia lalu, ado nan sakali-sakali sajo datang manjingau. Itu kan lumrah. Dek awak ado kakok-no masiang-masiang. Sabanta gadang mungkin 'nas' dulu awak ka lapau, dek ado nan labiah paralu nan ka dituruik, tapi biasono, sudah itu manjingau juo baliak, singgah juo baliak. Ado masono awak ingin jadi panonton sajo dulu samantaro, mancaliak urang saliang baadu silek, saliang baadu carito, kadang-kadang sambia tasanyum, tagalak ketek. Tapi ambo yakin insya Allah lamo lambek timbua juo taragak nak baliak kamari. Baitulah, walaupun masih agak panjang lai ari-no, labiah kurang limo baleh hari lai, sabalun awak mamasuaki bulan suci Ramadhan, alah ka patuik awak ansua ba maaf-maaf-an, dek itu tadi, mungkin salamo bagarah jo bagurau, salamo maota jo maleseang, salamo badiskusi babantah-bantahan, kok ado nan tagisia, nan tasingguang, nan talantuang ndak singajo, atau bahkan tasingajo bagai dek darah sadang naiak, marilah samo kito abih-i, kito maaf-kan jo kaikhlasan. Mudah-mudahan Allah Subhanahu Wa Ta'ala maampuni doso-doso kito, mamaafkan kasalahan-kasalahan kito, mambari juo pitunjuak ka kito, mamaliharo kito dalam kaimanan kapado Allah. Tamasuaklah dalam kasampatan ko, ambo paribadi, mamaafkan kasalahan dunsanak/kamanakan kito Wady, nan alah mintak maaf ka sidang nan basamo. Samo kito doakan kapado Allah, mudah-mudahan ditunjuak-i Allah juo awakno kajalan nan bana. Itu sajolah daulu. Maaf jo ridha ambo puhunkan. Wassalamu'laikum wr.wb., Lembang Alam (sadang di rumah dek ado kaparaluan siang hari ko) ----- Original Message ----- From: Rahima <[EMAIL PROTECTED]> To: <[EMAIL PROTECTED]> Sent: Wednesday, September 29, 2004 3:16 AM Subject: [EMAIL PROTECTED] Tarimokasih, ..kama pai nan lamo-lamo,lai sihaik-sihaik sajo ? > > Assalamualaikum.Wr.Wb. > > Sayang sekali, dalam babaso-basi di permulaan kato > bahaso Minang, ambo sabana-bana indak tahu, jadi > langsuang sajo, ambo manyampaian kapado dunsanak > sadonyo, baiak nan di RN, maupun nan di Surau. > > Dengan hati nan penuh keikhlasan dan rasa hormaik ambo > kasadonya,( gadang indak basabuik gala,ketek indak > basabuik namo..apolah tuh bahasonyo, nan ambo suko > mandangakannyo, kalau urang memperkenalkan diri, acok > bacando itu ambo baco, gadang...ketek...). ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________