Assalamu'alaykum wr.wb. sairiang balam jo barabah, banyak nan ampek puluah ampek, tabang malayok di hari sanjo. sairiang salam nan jo sambah salam tibo ka nan rapek, sambah tatuju ka nan basamo
indak basibak jo basisiah, sarato bahinggo jo babateh, ketek nan indak disabuk namo, gadang nan baimbaukan gala, bathin dek adaik kasadono, Panghulu nan gadang basa batuah, alim ulama jo tuanku, bila maulana imam jo katik, nan mamagang sako dalam adaik, hulu balang jo ampang limo, sarato manti nan pagawai, baitu pulo jo nan mudo arih budiman, bundo kanduang samo didalam, disinan ambo mandatangkan sambah. ado pun sambah nan ambo tibokan : karano lah tibo ulak nan jo alai, dari sipangka ahli warih, hadok kapado diri ambo, karano bapakai pituah lamo, pitaruah nan indak baunyikan, pakirim nan indak baturukkan, mako utang diambo manyampaikan, iyo kapado sidang RN nangko. Indak dapek sarimpang padi, batuang dibalah ka parahu, indak dapek sakahandak hati kahandak juo nan balaku lah singkek langkah, panjang parmintaan, lah putuih pandang kabumi, lah pulang pandang ka akhiraik, kok gantangno iyo lah panuah, dibilangno raso alah cukuk, nan punyo datang manjapuk, nan batanam datang mambubuk, iyo alah mandaulu Mamak/bapak/ dunsanak kito nan banamo Ir. Hasril Hamid Yasin Msc, Nagari asa Gurun, Batusangka, dalam umua 65 Th. di Bogor, pado hari Sinayan tanggal 21 Pebruari 2005, pukua 4 pagi. Nan almarhum dikalo wakatu hiduk, iyo pagawai nagari sabagai, Mantan Dekan/ Dosen Fakultas Perikanan IPB. Dek pangasiah jo panyayang, niniak mamak jo tuanku, sarato urang nan banyak, lah bakubuakan di pandam pakuburan "urang rumah" Almarhum, nan talatak di Rangkas Bitung, daerah banten rang namokan,lah dibacokan pulo kaji jo tahlil sarato fatihah diatehnyo. A to nyo lai, tantangang diri mandiangko, lamo hiduk banyak dirasai, jauah bajalan banyak diliek, kok ado lah utang kain nan sacabiak, utang pitih nan babilang, hutang siriah hutang pinang, sarato salah jo khilapaik, kapado kito nan basamo, mamintak sipangka warih, iyo nak babari maaf mandiangko, dari muluk sampai ka hati, dari dunia sampai ka akhiraik. limbak nan dari pado itu, kok ado khilaf jo gawa di kito nan basamo kapado Almarhum, alhamdulillah, sabalun bajuluak lahno rareh, sabalun dimintak lah babari, lah babari mauh di si pangka warih. barabah sadundun nan jo balam sikok baulang pai mandi sambah sadundun dengan salam sambah disiko ambo akhia-i Wassalamu'alaykum Wr.Wb. Bandaro Labiah ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________