Assalamu'alaykum Wr.Wb. Dek lamo lupo nan datang, dek banyak ragu nan tibo, kok luluih lai dicubo ba silami, kok hanyuik dicubo maminteh-i, tapi samantang pun baitu, nyampang kok indak tapek manyilami, baitu jo maminteh-i atau indak pado tampaikno pulo maingekkan, iyo maaf juo nan bamintak
adopun nan takana di ati takilan dimato satantangan manyilami jo mainteh-i sarato maingekkan adolah, maimbau atau imbauan di RN kapado Niniak Mamak kito nan lah "Batagak Gala" atau jadi Panghulu, iyo nak samo-samo kito pakaikan dan imbaukan gala "Baliau" nan tun, bak kato papataha, kok manyuruak bungkuak, malompek patah, dari nan ketek sampai nan gadang, nan mudo jo nan tuo, baiak laki-laki atau padusi iyo nak samo "ma-amakan" tantang iko. Sungguahpun kito barado di "alam maya", tapi rasono iyo lah bak cando batamu tiok hari, lah saroman batamu muko, dan hal iko adolah untuak mabiasokan dari kini, indak cangguang kalau lah basuo. Limbak nan dari pado itu, supayo rantak nak sadarang, lenggang nak sapai, mamintak pulo kito kapado Niniak Mamak kito nan lah jadi Panghulu untuak tatap dan taruh mancantumkan Gala Panghulu di akhia surek nan bakirim, maklumlah, bak kato cako juo, lupo dek lah lamo, ragu di nan banyak. sakiro itu nan takana di ati, takilan dimato, kok gawa jo khilafaik, tasingguang kalo ka naiak, talendo jiko ka turun, maaf juo nan bamintak Wassalamu'alaykum Bandaro Labiah ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
