Yth. Niniak Mamak, Cadiak Pandai sarato Kasado Karapatan Palanta Rantau Net
Sambah jo sujuik nan ambo sampaikan, maaf jo rila nan ambo pintak, jikok apo nan ambo sampaikan indak barkenan di hati mamak-mamak sarato cadiak pandai nan ado balairuang karapatan Rantau Net nan kito muliakan.
Dek ambo saketek sajo nan taraso. Lah lamo diinok ranuangkan, alah lamo ditimbang-timbang, taraso lai takatokan indak, bak cando si bisu barasian.
Jikok tibo di mato alah ambo piciangkan, tibo di paruik alah ambo kampihkan, namun baitu taraso juo, jikok disampaikan ambo cameh ka manyingguang, jikok disabuik ambo takuik ka manyeso.
Satantangan diri ambo Mak. Nampaknyo alah basisiah jo basibak kito kironyo. Kaba dari ambo paralu basigi basensor nampaknyo, sadangkan kaba barito dari nan lain buliah langsuang ka tangah.
Namun dek ambo lai takana juo kecek Mak Bandaro Labiah, bahaso:
"Adaik di lauik bajuru mudi, adaik basabuang bajuaro, adaik bagurau bajuru janang, adaik di alek manuruik ka sipangkalan."
Iyo baitu pulo taraso dek ambo. Adaik bamilis tantu bamoderator, ambo sabagai urang datang manuruik hanyo lai. Ka bakeh silang nan bapangka, karajo nan bapokok.
Jikok dibuliahkan ambo mangecek, ambo sato maota, namun jikok niniak mamak sarato cadiak pandai kasadonyo labiah suko ambo antok, tantu ambo pandai pulo basihaniang.
Baitu sajo Mak. Kurang jo labiah, sasek jo kaleru ambo minta maaf.
Wassalam,
Wady Afriadi (31th) Parung, Bogor 16330
[EMAIL PROTECTED]
Hp. 0811-920-925
____________________________________________________
Berhenti/mengganti konfigurasi keanggotaan anda, silahkan ke: http://rantaunet.org/palanta-setting
------------------------------------------------------------
Tata Tertib Palanta RantauNet:
http://rantaunet.org/palanta-tatatertib
____________________________________________________
