Assalamu'alaikum wr.wb., Manolah dunsanak sapalanta nan ambo hormati.
Bialah sakaliko ambo cubo batanyo jo babantahan saketek jo angku Taufik Malin ko. Sabalunno angku Malin, baa mangko postingan ambo sabalunko (tantangan Razi.Seputaran Al-Qur'an - Hadis -Fiqh(sebuahpertanyaan) - Shalat dan Wudhu) indak angku jawab atau komentari kok iyo bana angku adolah saurang nan ingkar sunnah? Sabalunno pulo ciek lai, angku mangecek-an nan bahaso kampuang angku di Ampek Angkek, dimaa bana angku di Ampek Angkek? Nan banyak gulo sakano adolah Lasi. Apo angku barasa dari Lasi? Iko sakadar batanyo sajo, sabab ado duo tigo pulo urang Ampek Angkek di Palantako. Kini kito muloilah. Urusan ekonomi atau usaho untuak mancari pitih ado tuntunanno baiak dalam al Quran maupun hadits-hadits Rasulullah SAW. Firman Allah dalam surah Al Jum'ah ayat 10, 'Dan apabila sudah selesai menunaikan shalat, maka bertebaranlah kamu di muka bumi dan carilah kurnia Allah.' Itu parintah Allah. Silahkan badagang, silahkan batani, silahkan bakarajo apo sajo untuak mancari kurnia Allah. Namun sasudah itu paralu ado rambu-rambu dalam mancari kurnia Allah itu. Rambu-rambuko dijalehkan dek hadits-hadits Rasulullah. Silahkan badagang, tapi indak buliah kicuah dalam pardagangan. Indak buliah mangurangi sarato curang dalam timbangan barang dagangan. Indak buliah duto dalam pardagangan. Baitu juo jo bakarajo, jo batani. Awak musti amanah. Angku maaguang-aguangkan ekonomi Amerika. Ekonomi Amerika tu manghalalkan mampagunoan riba, sadangkan urang Islam dilarang mamakan riba. Jadi indak paralu caro ekonomi Amerikatu ditiru. Dilarang mamonopoli pasa. Ado hadits Rasulullah nan malarang urang mamintehi barang dagangan di jalan ka kamasuak ka pasa, sabab itu indak adia. Amerika buliah mampagunoan enerji nuklir tapi nagari lain jaan cubo-cubo, kasalalu sajo dirongrong, diintimidasi. Caro-caro sarupo itu indak patuik ditiru. Kahebatan Amerika nan angku kagumi tu orientasino hanyo dunia, sadangkan Islam manyuruah manyaimbangkan antaro dunia jo akhirat. Allah maagiahkan ka mareka itu (urang-urang nan manyukoi dunia sajo tu) tapi di akhirat nanti bagian mareka hanyolah narako. Firman Allah dalam surah Huud ayat 15 -16. ' Brangsiapa yang menghendaki kehidupan dunia dan perhiasannya, niscaya Kami berikan kesempurnaan pekerjaannya di dunia itu. Dan mereka tidak dirugikan. - Orang-orang itu tidak memperoleh bagian di akhirat melainkan neraka. Dan disana tiada berguna apa yang telah mereka usahakan. Dan terbuang percumalah apa yang telah mereka kerjakan.' Jadi indak paralulah awak silau bana jo santiang Amerika tu. 'Love your neighbours as you love yourself', iko filosofi apoko? Baa kalau 'your neighbours' tu indak baranti-ranti manimbuakan kasusahan kadiri 'yourself'? Sarupo nan dilakarajoan urang Yahudi Israel nan manzhalimi urang-urang Palestina? Ado hadits (hadits lo baliak) nan babunyi, 'Laa yu'minuu ahadukum hattaa yuhibbuu liakhiihi kamaa yuhibbuu li nafsih'. Indaklah samparono iman sasaurang diantaro kalian sampai awakno mancintoi saudarano sabagaimano awakno mancintoi dirino sandiri. Iko hadits Rasulullah SAW. Saudarano, nan harus dicintoi tu. Nan saiman, saaqidah, nan amuah ditunjuak diajari jo kabanaran. Tapi kalau jaleh-jaleh musuah dalam salimuik, harus tegas harus kareh. Sabab urang-urang nan basamo jo Rasulullah tu ciri-cirino kareh taradok urang-urang kapia, tapi bakasiah sayang sasamo mareka (urang-urang nan bariman). Lai kamungkin Amerika nan alah sabana nampak balang jo bancino ka umaik Islam tu, nan mahancuakan nagari-nagari Islam tu, nan mahinokan kitab suci umaik Islam tu, nan ekonomino tagak diateh sistim riba tu nan ka dipuji-puji? Nan kadijadian contoh? Babeda pandapek buliah-buliah sajo. Tapi nan kabanaran tataplah kabanaran. Kalau angku bapandapek bahaso Amerika santiang dan paralu ditiru, itu bukanlah sasuatu kabanaran. Paralu diuji dan dapek dibuktian nan bahaso kasantiangan marekatu bukan barati santiang manuruik kacomato Islam. Kalau angku bapandapek bahaso hadits-hadits Rasulullah indak paralu di tarimo, harus diingkari, itu bukanlah kabanaran. Itu adolah kakaliruan nan sangaik nyato. Cubolah bantah di angku postiangan ambo sabalunko. Itu sajo lah daulu. Wassalamu'alaikum wr.wb. Lembang Alam ---- Original Message ----- From: "taufikmalin" <[EMAIL PROTECTED]> To: <palanta@minang.rantaunet.org> Sent: Sunday, June 05, 2005 8:27 PM Subject: [EMAIL PROTECTED] Dunsanak2 Palanta nan ambo cintoi dan dunsanak2 nantidak satuju joo tulisan ambo. > Assalamu'alaikum wr wb > Bismilahirrahmaanirrahiim. > Dunsanak Palanta yang disayangi Allah swt. > Semoga Allah menambahkan rahmat dan kasih sayangNya dan ilmu yang benar kepado kito basamo. > Setiok kapalo yang dibarikan oleh Allah bagitu pulo banyak pandapeknyo. Kalau ado pemikiran2 baru yang datang ka masarakat, selalu ado nan satuju dan indak satuju. > Kito maliek Rasul menyampaikan ayat2 Allah ado nan maikuii (ikut)Baliau, ado pulo nan ma maki maki serta melempar batu. Tapi Baliau basabar banyak, dan manasehatkan sahabat2nya untuk tidak mambalas dgn kata kata buruk dan memaki maki pulo. Bagitu pulo satiok pamimpin baik dapemarintah maupun organisasi2 ado nan satuju, ado nan manolak. Jadi kalau ado dunsanak di palantako nan indak satuju joo tulisan ambo, itu adalah sunnatullah, biasa.Kok satuju sadonyoo joo tulisan2 ambo, ambo kira indak paralu laii manulis dohh. Gunanya berdakwah adolah menyampaikan ayat2 Allah kepada urang2 nan belum tahu dan kepada nan indak satuju bisa berargument dengan dalil2 yang kuat. > > Nan ambo harapkan kapado dunsanak nan indak satuju adolah bantahlah, koreksilah dengan dalil2 atau argumen yang sejuk, agar dunsanak nan lain nan mananga dapek maliek diskusi yang bermutu, dan ado palajaran nan akan diteladaninyo, Jahuhilah mengaluarkan kata kata emosi, tuduhan pribadi, fitnah, prasangka buruk dll, sebab Allah sangat melarangnyo dan tidak elok dicontohkan di Palanta ko. Kok ado urang nan indak baagamo islam tantu nan malu awak2 juo. Kok indak satuju joo tulisan ambo delete sajo, mudah sekali. Urang nan bijak selalu ingin mananga pandapek urang lain, karano dia merasa ilmunya masih kurang, hanya urang bodohlah yang tidak mau dikoreksi. Ambo raso kito2 semua termasuk urang2 nan maraso kurang ilmu. Ikolah gunonyo palanto koo, macari ilmu dan mambari ilmu. Ambo suko sakali di koreksi karano ambo indak sampurna dohh. Kata urang bulek; No body perfect. > > Kalau ingin tahu misi ambo nan sabananyo indak muluk2 doohh. Sasuai joo pangalaman hidui salamo iko nan bamacam macam ragam, baik di nagari sandiri maupun di nagari urang. Kok marantau jauh salalu takana joo kampung baik kampung tampek lair di ampek Angkek Candung nan banyak Guloo sakanyoo baitu pula joo bangsa ambo Indonesia, selalu tapikii baa caronyo mamajukan urang2 awak(indonesia) nan sadang mambangun agar indak katinggalan dari nagari urang. Baacaronyoo setiap sekte2 agamo islam bisa hidup rukun dan damai. > > Ikoolah harapan ambo joo siso siso indui nan dibarikan oleh Allah kasampatan untuk manulih aa nan elok kadisampaikan kapado dunsanak2, tantu ilmu2 untuk kemajuan2 nan badasarkan kapado Al Quran Nur Karim dan pangalaman ambo. > > Kalamahan2 na ambo liek dalam masarakat awak Indonesia umumnyo, minang kususnyo adolah seperti barikuiit ini. _____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
