Assalamu'alaikum wr.wb., Ka panambah-nambah kaji. Wassalamu'alaikum wr.wb. Lembang Alam
PANGAJIAN DI MUSAJIK GURUN Lah patang Satu lo ari. Lah ado pulo wirid buya Abidin baliak di musajik Gurun. Lah batambah banyak juo jamaah nan tibo. Alhamdulillah, banyak bana pangaruahno ka masyarakaik dalam nagari dari sapakan ka sapakan. Kalau saisuak, katiko mulo-mulo baliau ka badakwah kamari indak barapo incek urang nan amuah mandangaan kaji baliau doh. Tapi jo kasabaran dan kasungguahan baliau, alah samakin taraso di masyarakaik di kampuangtu isi pangajian buyako. Buya Abidin sangaik panyaba, tapi sangaik kareh sarato jaleh kaji baliau. Nan indakko sabana indak dek baliau, kalau nan iyo harus sabana iyo dan baitu pulo baliau maagiah contoh dalam kasahari-harian baliau. Malamko kaji baliau satantangan tangguang jawab satiok urang nan bariman untuak manjago diri sarato anggota kaluargano dari api narako. Baliau jalehan makna dari ayat ka salapan dari surek At Tahrimtu sacaro rinci. "Wahai urang-urang nan bariman, jago diri kalian sarato anak jo binyi kalian dari ancaman api narako..(sampai akhir ayat)" kecek baliau. Urang nan mandanga abih tabukak mato mareka. Nan manjadian kaji buya awakko sangaik manariak, sasudah baliau bacaramah agak sabanta sudah itu biko diadoan tanyo jawab. Buliah batanyo kok aa nan kaditanyoan. Baliau jawab sajaleh-jalehno, sabab pangatahuan baliau rupono iyo sabana mancukuik-I untuak itu. Malam hariko tajadi pulo tanyo jawab. Katik Marajo nan mulo-mulo batanyo sarupo iko. "Batanyo ambo ciek buya. Nan disaru dek Tuhan Allah adolah urang-urang nan bariman, untuak manjago diri sarato anggota kaluargano mainda dari ancaman api narako. Nan dimukasuik disiko apokoh kaum laki-lakino sajo atau tamasuak jo kaum padusi no bagai? Itu sajo tanyo ambo buya." "Saruan Allahko umum sifaikno, balaku ka satiok urang baiak laki-laki maupun padusi. Jadi aratino satiok awak, baiak nan apak-apak maupun nan amai-amai, wajib hukumno mamaliaro diri sarato mainda dari ancaman api narako cako. Muloi jo diri awak masiang-masiang. Barusaho bana manjago diri. Ingek-ingek parintah Allah. Capek karajoan. Apo sajo nan diparintah Allah. Capek karajoan. Baitu pulo sabaliakno satiok larangan Allah, capek tinggaan. Alah tainda awak rasono, jagoi pulo pasangan awak. Kok nan apak-apak jagoi istri awak sarato anak-anak awak. Kok nan istri jagoi suami awak sarato anak-anak awak. Bisa istri manjagoi laki dalam hal iko? Baa kiro-kiro dek amai-amai go? Bisa awak manjagoi, jaan sampai laki awak masuak narako? Bisa sangaik. Makono jadi istritu jaan talampau banyak kandak. Talampau banyak kandak, talampau banyak henjong, dek laki sayang sangaik ka awak, apo dimintak apo dapek, padohal kamampuan sabanano indak mancukuiki, kasudahanno baa? Tapaso manciluik no lai. Tapaso korupsino lai. Tapaso mangicuahno lai. Barang urang dianggapno barangno sandiri. Untuak mamanuahi pintak binyi. AA binyi nan sarupo iko indak manolong namono. Indak manolong untuak manjago laki jaan sampai masuak narako tapi manungok-an nan lai. Atau lai indak pahenjong no doh, lai indak banyak kandakno doh. Tapi nan laki indak tanang tingga di rumah sabab di rumah ado-ado sajo nan kurang manyanangkan dihatino. Hari-harino habih di lapau, main damini. Maota kasuok ka kida. Si istri tau bahaso suami indak tahan duduak di rumah mako harusno si istri barusao mampaelok-I suasana di rumah. Baitu carono manjago suami-suami awak dari babuek doso. Dari ancaman api narako. Baa carono awak manjago pasanagan awak ataupun anak-anak awak taditu? Dakwahi mareka. Kana manganaan jo mareka dalam managak-an nan batua, maningaan nan indak batua. Jadi aaratino bana sakali lai satiok awak batangguang jawab untuak saliang manjago. Baitulah carono. Kecek nabi SAW, ' Satiok kalianko pamimpin dan kalian ka dimintak tangguang jawabno ateh kapamimpinanno isuak di akhiraik'. Baliau uraikan ciek-ciek, Satiok laki-laki pamimpin ateh kaluargano, mako awakno kadimintak partangguangan jawab ateh kapamimpinanno taradok kaluarganotu. Istri pamimpin ateh arato suami jo anak-anak, mako kadimintak tangguang jawab pulo isuak. Aleh ka jaleh di Malin du kiro-kiro?' 'Lai buya,' jawek Mali Basa. 'Ambo lo manyambuang batanyo lai buya,' kecek Kari Sutan. 'A tu Kari. A nan ka Kari tanyoan?' kecek buya Abidin. 'Kalau sakirono awak alah bausao manjago diri awak surang, alah pulo manganaan ka anak binyi awak, tapi nan anak binyi indak patuah, indak maraso paralu manjago dirino doh, kanai juo awakdu buya? Sakitu sajo tanyo ambo.' 'Nan partamu dakwah awak ka anak binyi cako indak buliah putuih-putuih. Musti taruih manaruih, indak buliah awak capek malapehan tangan. Harus jo kasabaran, jo siasaik, jo katarangan nan jaleh, jo santun. Sarupo itu andakno usaotu. Jadi jaan baru dikanaan sakali duo kali sudahtu alah pasai sin awak. Kalau alah samparono usaho cako, alah bakataruihan awak manganaan, indak juo kunjuang badanga, insya Allah lapehlah tangguang jawab awak. Sabab kalau urang nan ka indak dapek pitunjuaktu iyo indak ka dapek pitunjuak doh. Alah kajadi istri nabi-nabi. Di dalam surek Tahrim cako juo lai baru, diagiah conto dek Tuhan Allah tantangan binyi dari nabi Nuah sarato istri dari nabi Luth. Istri nabi nan ka masuak narako Allah dek kadurakoan mareka kapado Allah walaupun mareka istri nabi. Tapi kalau indak samparono dakwah tadi. Amuah jadi musuahno anak binyi tu ka awak biko baiak di duniako juo atau labiah cilako lai sampai ka akhiraik isuak. Baiak musuah sacaro nyato-nyato. Anak palawan, binyi parongrong, masiang-masiang mambuek pakaro jo bala sajo. Ataupun sacaro sambunyi-sambunyi. Rumah tanggo nampak santiang juo. Rumah gaduang batingkek-tingkek, parabotan mewah, garasi oto gadang, ampek jo limo oto sedan rancak-rancak di dalam. Nan apak antah pabilo pai antah pabilo pulang dek sibuak. Nan amak antah pabilo pai antah pabilo pulang dek sibuak. Nan akan-anak alah baitu pulo. Ndak lamo sasudah itu alah rarak sajo ciek-ciek. Nan apak alah sibuak basalingkuah, nan amak alah pai pulo jo laki urang. Nan anak-anak alah manjadi pacandu narkoba. Mako indak ado nan tingga salain daripado kabinasoan. Allah ingekan bana, ' Wahai urang-urang nan bariman, sasungguahno di antaro istri-istri kalian sarato anak-anak kalian ado nan bisa manjadi musuah kapado kalian, mako ba ati-atilah kalian taradok mareka . sampai akhir ayat (Surek At Taghabun ayat 14). Ba ati-ati kalian taradok mareka. Mamimpin mareka, manasihati mareka, maajai mareka. Ba ati-ati kalian mambimbiang mareka mangawasi mareka. Sabab kalau indak mareka bisa jadi musuah kapado kalian. Jadi intino dakwah kapado anak istriko sangaik bana paraluno. Sacaro saba, sacaro bakataruihan, sacaro elok jo maagiah conto. Baa jano awak ka badakwah kalau awak sandiri sajo alah indak batua? Itu mangko dimuloi jo diri awak sandiri talabiah daulu. Itu pangka kaji awak cako. Baa kiro-kiro manuruik pandapek Kari du?' 'Sasuai buya. Jadi iyo indak murah sabanano iduik barumah tanggoko do yo buya. Ado tangguang jawab gadang nan musti dipikua. Jadi indak untuak basanang-sanang sin iduik barumah tanggoko rupono. Tarimo kasih buya.' 'Batua nan Kari sabuik. Indak murah tu dek awak lai mangarati. Dek awak tau iko tangguang jawab nan ka dipatangguangjawabkan dimuko pangadilan Allah isuak. Tapi sabanano indak pulo sarik bana doh. Pitunjuak alah ado. Conto alah ado. Tingga diawak mampalajari. Mangaji nan pitunjuak cako. Pitunjuak Tuhan Allah adono dalam al Quran. Nan dijamin dek Allah nan bahaso isino indak manganduang karagu-raguan saketek juo doh. Lai awak bariman? Kalau lai ikuti pitunjuak tu. Indak jaleh kataranganno dalam al Quran awak ikuik-i sunnah nabi. Jo caro sarupo itulah awak baagamoko. Jadi paralu bana awak mangajiko. Kalau diurang nan alah mangaji, nan alah tau, indak ado pilihan dino sudah itu salain dari bausaho kareh maamakan nan alah dikaji. Maamakan dengan ikhlas sarato panuah ka hati-hatian. Ikhlas karano Allah samato. Sudah itu jo raso tangguang jawab nan gadang, jo caro-caro nan batua, sasuai jo nan dicontohkan nabi Allah SAW. Sakitu pulolah daulu kaji awak. Disambuang pulo insya Allah nan katibo kok lai samo dipanjangkan Allah umua awak.' Baitu kaji samalam tu. _____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
