Angku Adyan,
Mancaliak email angku sabanta ko, samantaro kito dapek mancari peta nan
agak langko dan jaleh, rancak ambo katangahkan baa mancaliak dan
mambayangkan "Supra Nagari" Ampek Angkek. Ambo pakai istilah "Supra Nagari"
dengan pandangan latar bulakang sejarahnyo saketek. Dari nan dikatahui
sabalun Nagari-nagari dipacah-pacah, dan kini diacah-acah bahkan dibagi
sampai dinamokan desa jo dusun, Ampek Angkek adolah Satu Kesatuan
Masyarakat nan tadiri dari Ampek Nagari maso dahulunyo. Niniak Mamak,
Cadiak Pandai, Pamuko-pamuko Masyarakat maadokan "Piagam", antah bilo
partamu kalinyo dalam sejarah, tapi nan terakhir kiro-kiro manjalang antaro
tahaun 1915-20. Dalam patamauan nan tarakhir tu dipakuat satu "piagam" ambo
namokan "Piagam Guguak Sikanga" nan mangatangahkan Inti Pandangan
Masayarakat Ampek Angkek nan "Saitiak Saayam, Saanak Sakamanakan, Saciok
bak Ayam, Sadanciang bak Basi". Riwayatko mamaralukan panulisan carito
panjang karano alun panah ambo caliak bahan tatulih manganai itu lai. Ambo
iduik jo Oral Tradition nan acok ambo danga sajak ketek.
Nagari-nagari nan ambo sabuikkan "Supra Nagari" Ampek tu adolah manuruik
urutan nan dilafalkan memang ampek: Biaro, Balai Gurah, Lambah, Panampuang.
Untuak mancaliak Nagari nan Ampek ko dalam lingkuangannyo, bayangkan Angku
Adyan tagak di Simpang Biaro, sabagai titiak tolak dan titiak pandang.
Simpang Biaro ko adolah Simpang Ampek, Jalan Gadang antaro Bukittinggi jo
Payokumbuah nan manuruik matoanginnyo dari Barat ka Timur. Sadangkan jalan
nan manyimpangnyuo adolah jalan Utara-Selatan dari Kamang di Utara ka Lasi
di Selatan.
Ado lo ciek lai Simpang Ampek Tanjuang Alam nan juo simpangnyuo malintangi
jalan Bukaittinggi-Payokumbuah. Di Simpang Tanjuang Alam tu, jalan nan
Utara-Selatan adolah dari Tilatang-Pakan Kamih-Kapau di Utara, taruih ka
Bukik Batabuah ka Sungai Pua ka Selatan. Jalan ko ampia paralel jo Jalan
Kamang-Lasi nan di Simpang Biaro tu.
Ciek lai di sabalah ka Ujuang (Timur) ado pulo Simpang Canduang, nan jalan
malintangnyo maarah ka Selatan ka Canduang dan ka Utara marasuak ka Nagari
Panampuang, dapek pulo taruih ka Kotobaru Salo. Jalan nan tigo malintang
jalan Bukittinggi-Payokumbuah tu buliah dianggap paralel dan manjadi
sabagian urat nadi Jalan Apek Angkek. Sadangkan jalan
Bukittinggi-Payoumbuah, Barat-Timur marupokan landmark nan malalui
tangah-tangah daerah Ampek Angkek.
Bayangkan Angku Adyan madok ka Arah Selatan di Simpang Biaro tu, manccaliak
jaleh ka Gunuang Marapi jo Singgalang. Kapundan jaleh di Sdlatan Biaro tu.
Tagak madok ka Salatan di Simpang Biaro tu, di sabalah Suok Angku arah
Barat (nan kami namokan "Puun" adolah arah jalan gadang ka Bukittinggi. Di
sabalah kida, arah Timur (nan kami namokan "Ujuang") adolah jalan gadang
arah ka Payokumbuah. Di muko jo di bulakang angku adolah jalan
Utara-Selatan. Dihadokan Angku mancaliak ka Gunuang Marapi itu adolah
Selatan, nan di Ampek Angkek kami sabuik "Mudiak". Di bulakang Angku adolah
Utara (nan kami namokan "Ilia". Ilia jo Mudiak ko alah kito bincangkan
dalam babarapo postiang sabalunnyo karano aia batangaia mailia ka Ilia dari
Mudaiknyo di Gunuang Marapi. Jadi di Ampek Angkek Matoangin tu lai langkok
"Ilia, Mudiak, Ujuang, Puun" (Utara, Selatan, Timur,Barat).
Dietong dari Biaro sabagai urutan partamu, nagari nan kaduo di mudiak
dihadokan Angku adolah Balai Gurah. Di Bulakang Angku di Ilia, di Utara,
ado duo nagari:
nan katigo Lambah jo nan kaampek Panampuang.
Jadi di Simpang Biaro tu jaleh tampak dan tabayang di angku Supra Nagari
Ampek Angkek: 1. Biaro, 2. Balai Gurah, 3. Lambah, 4. Panampuang.
Nah kini kito acah-acah pandangan mancaliak Nagari Balai Gurah manuruik
usalinyo sabagai barisan Paliang Ateh dari Ampek Angkek. Nagari Balai Gurah
nan kini ko indak samo jo Bali Gurah nan ambo sabuik usali tu. Balai Gurah
Usali tu acok juo disabuikkan Balai Gurah Gadang nan tabantang antaro
Canduang di sabalah ka Ujuang, Lasi sabalah ka Mudiak, Banuampu jo Kurai
sabalah ka Puun, Biaro sabalah ka Ilia.
Nagari Biaro dalam konsep Ampek Angkek (disabuik juo Biaro Gadang) talatak
disabalah ka Ilia Balai Gurah, malintang ka Puun sampai ka Bateh Kota "Jam
Gadang Ketek" sampai ka Jambatan Batang Aia Tumbuak di Sabalah ka Ujuang.
Nagari Lambah adolah rentetan katigo Ampek Angkek ko, di sabalah ka Ilia
Nagari Biaro Gadang. Tabantang dari sabalah Ujuang babateh jo Nagari
Canduang sampai ka sabalah ka Puun babteh jo Nagari Kapau.
Nagari Panampuang marupokan leretan kaampek nan paliang ka Ilia dari Ampek
Angkek dietong dari leretan Balaigurah, Biaro, jo Lambah tu. Ka mudaiaknyo
Nagari Panampuang babatehan jo Nagari Lambah, sadangkan ka Ilianyo
babatehan jo Nagari Kotobaru Salo. Ka Puunnyo babatehan jo Nagari Pakan
Kamih Tilatang. Sadangkan ka Ujuangnyo babatehan jo Nagari Baso.
Jadi itulah kiro-kiro gambaran singkek Ampek Angkek marupokan daerah nan
laweh juo di Agam Tuo. Dan mungkin marupokan pusek Agam Tuo. Datuak Rajo
Agam ado di Lambah.
Kadang-kadang urang mungkin kaliru dimaa bana Ampek Angkek ko. Itu indak
Angku Adyan sorang sajo doh. Sabab di Pasa Bukittinggi, kabanyakan urang
manganggap Ampek Angkek ko di Pasia, karano banyak urang Pasia manggaleh
kain, manjaik, dan manjua pakaian-pakaian sudah. Kan lai takana istilah
Jaik Ampek Angkek barangkali. Memang Pasia adolah di Ampek Angkek, tapi
Ampek Angkek indak samo jo Pasia doh. Pasia adolah satu pacahan baru nan
manjadi Nagari sabagai pacahan baruntun Balai Gurah Gadang manjadi babarapo
Nagari.
Dalam pakambangannyo Balai Gurah Gadang tu lah pacah manjadi Nagari-nagari,
pado mulonyo, Balai Gurah di Ujuang jo Ampang Gadang jo Batu Taba di Puun.
Suah tu Nagari Ampang Gadang bapacah pulo dengan Pasia manjadi Nagari sandiri.
Dahulu, sabalun ambo maninggakan kampuang tahun1966, dari Parik Putuih
sampai ka Baso di Jalan Bukitttinggi-Payokumbuah, jaleh tabantang daerah
Ampek Angkek dengan sawahnyo nan sayuik-sayuk sampai dari Bateh Tilatang
Kamang sampai-sampai ka Lereng Bukik Batabuah jo Canduang. Bareh Ampek
Angkek tanamo elok dan manjadi pilihan di Pasa. Tapi kini, pamandangan
kenangan ambo tu lah indak ka basuo lai. Jalan Bukittingi-Payokumbuah lah
panuah sasak jo kadai-kadai baruntun, oto lah mandaru langkok jo polusinyo
kaujuang kapuun, indak dapek awak malenggang lai di Labuah Gadang.
Sakitulah dahulu sakadar pangantar mancaliak Ampek Angkek dari dakek; pakai
Taropong Ajaib dari kajauhan di Subarang Lauik Basa, di Tapi Riak nan
Badabua, Santa Cruz, California, USA.
Salam,
--MakNgah
X___________________________________________Sjamsir Sjarif
Indonesian Translator, Interpreter, and Cultural Consultant
335 Gault St. #1, Santa Cruz, CA 95062, USA
Email: [EMAIL PROTECTED] Tel. (831)-426-1333 Fax (831)426-8907
http://www.usindo.net/hambo
Member of:
ATA, American Translators Association http://www.atanet.org/
NCTA, Northern California Translators Association http://www.ncta.org/
IPA, Indonesian Professional Association http://www.ipanet.org/
=======================================================
At 08:48 AM 9/3/2005 +0700, Adyan wrote:
Assalamualaikum w.w.
Mak Lembang, mohon maaf talambek mangko mareply.
Lah makin jaleh juo dek ambo snek nagari2 di ampek angkek ko... cuma nan
alun tau lai, nan maa kampuang mak Lembang? Kalau ndak salah ado tasabuik
di salah satu posting mamak, bahaso guru mangaji di masjidil Haram Syeikh
Ahmad Khatib, tu dari kampuang Mak Lembang juo? Dima tu?
Ambo iyo sapadapek, bahaso di kampuang2 nan ado guru-guru agamo saisuak
tu, masyarakatnyo kini jadi labiah baik dari rato-rato urang awak, baik
dari segi agamo dan akhlak maupun juo dari segi ekonomi. Sajak dari
Maninjau, Parabek, Kamang, Canduang, sampai ka Lintau, Sumaniak, Padang
Panjang (kecuali Padang Panjang ekonominyo nan indak maju). Mungkin juo
Pandai Sikek. Sadonyo, dahulu lai panuah jo guru-guru mangaji nan
mambimbiang masyarakatnyo, maunyiannyo tiok ari, sahinggo anasir atau
trend ka arah nan negatif depek diredam atau dikendalikan. Akibatnyo
taraso kini. Tapi kini indak ado guru-guru managaji lai.. nan ado cuma
guru dengan kaji "melenseang" atau penceramah keliling. Baa kolah jadinyo
generasi nan ka datang.
Takana lo ciek. Anduang ambo dipandang ulama juo untuak kampuang Baruah di
Pandai Sikek, galanyo Dt.Mangkudum, tapi dikenal sebagai Angku Cangkiang.
Selain ulama, baliau juo guru adat. Tapi ambo indak pernah batamu jo
baliau tu sabab alah maningga sabalun ambo lahia. Mungkin dahulu baliau
mangaji di Cangkiang ko. Berati Cangkiang nan dakek Batu Taba ko? Alah
lamo ambo tanyo2an dima Cangkiang ko, urang hanyo bisa maagiah jawaban
umum, derah Bukittinggi. Pertanyaannyo, sia kolah guru ugamo di Cangkiang
kiro2 awal tahun 1900? Ado kolah surau nan terkenal dulu di siko?
Tarimokasih ateh tanggapannyo.
Wassalam
Adyan Anwar
On Sun, 28 Aug 2005 16:45:13 +0700, Muhammad Dafiq Saib
<[EMAIL PROTECTED]> wrote:
Assalaamu'alaikum wa rahmatullahi wa barakaatuhu,
Sutang Rumah Panjang,
Nampak sapinteh di ambo namo-namo kampuang jo nagari dalam peta ko lai
batua. Walaupun lokasino bana ado juo ambo nan kurang tau persis. Mak
Ngah
alias nyiak Sunguik pasti jauah labiah piawai dari pado ambo dalam
pangenalan namo-namo kampuang ko. Namun sacaro garih gadang, ado
nagari-nagari sabagai barikuik;
Batu Taba, tamasuak kadalamno Panca, Cangkiang mungkin indak ado dalam
peta.
Pasia (dauluno bagian dari Batu Taba, tapi sajak taun 60sakian alah tagak
surang. Lupo ambo tapekno, labiah kurang taun 63/64), masuak ka dalam
pasiako Surau Kamba.
Ampang Gadang, masuak ka dalamno Parik Putuih.
Balai Gurah, tamasuak kadalamno Koto Tuo, Sitapuang, Jambun, jo Balai
Gurah
sandiri. Balai Gurah jo Batu Taba, Pasia, Ampang Gadang tu dauluno bana
ciek, di sabuik Balai Gurah Gadang. Marupokan ciek dari 4 Angkek
Sudahtu Biaro Gadang, maliputi Limo Balai. Didalamno ado Tanjuang Alam.
Lubuak Muto, Koto Marapak, Tanjuang Medan (indak ado dalam peta). Iko
nomor
duo dalam 4 Angkek.
Sudah tu Lambah, nomor tigo dalam 4 Angkek.
Sudah tu Panampuang, nomor 4 dalam 4 Angkek. Di dalamno ado Lundang jo
Koto
Hilalang
Sudah tu daulu ado pulo Canduang, sabab daulu kami ko Ampek Angkek
Canduang.
Namun kini Canduang alah tagak surang lo jadi kacamatan. Di dalamno ado
Lasi, Pasanehan.
Sakitu dari ambo, malakik ditambah mak Ngah / nyiak Sunguik.
Wassalaamu'alaikum,
Lembang Alam
No virus found in this outgoing message.
Checked by AVG Anti-Virus.
Version: 7.0.344 / Virus Database: 267.10.18/87 - Release Date: 9/1/2005
Website http://www.rantaunet.org
_____________________________________________________
Berhenti/mengganti konfigurasi keanggotaan anda, silahkan ke:
http://rantaunet.org/palanta-setting
____________________________________________________