Assalaamu'alaikum sanak,
Nampakno RN alah kahabisan topik tentang Minang
Iko ambo egangan "ciloteh Minang" dari Padek.
Bacolah bia indak buluih.....
Wassalam
ajoduta/58
-----------------------------------------------------------------------------------
B u l u i h..!
Oleh : Viveri Yudi
Minggu, 05-Maret-2006, 01:41:36 129 clicks
Sadang maota, urang nan batigo dikajuikan dek buni kalason oto sairiang jo buni
masin.. ... nan mandarun mamakak-an talingo. Sopir oto sedan bakelok ka
pakarangan lapau bak cando pambalap akhiraik. Mungkasuiknyo, banyak urang nan
tabang ka akhiraik dek ulahnyo mambao oto. Roda oto manjaja di ateh tanah nan
lah kariang dek lamo indak di siram hujan. Kabuik tabang ka udaro.
Induak Ayam sadang mangaih-ngaih makanan di pakarangan jo anak-anaknyo,
takajuik, baserak-serak manyalamaikan diri. Anaknyo balari kian-kamari, sambia
mancicik-cicik mancari induaknyo. Tapi malang tibo dianak ayam, badannyo ketek,
kakinyo pendek, larinyo lambek, sahinggo roda oto malicak pungguangnyo. Mati.
Hukk.., hukk! Kalera paja tu mah! umpek Tan Koti nan tabatuak-batuak kanai
kabuik nan tabang ka lapau. Bangkik panyakik pangok den deknyo! Hukk..hukk!
Mak Kari manutuik hiduang, tangannyo nan lain langsuang malampok galeh nan
tangango di hadokannyo. Sadangkan Pudin mangipeh-ngipehan kabuik jo kain
saruang nan tasandang di bahunyo. Induak Ayam bakotek-kotek, hilia-mudiak
mangampuangan anaknyo nan baserak-serak.
Oto sedan hitam baranti satatantang dapua, tapek di dindiang tadia. Iroih nan
sadang maangekan aia takajuik, mamparatian dindiang jo tonggak baroyak. Mukonyo
pucek, jantuangnyo badabok, darahnyo tasirok.
Astaghfirullah! Gampooo..! Gampo Daaa..! sacapek kilek Iroih lah tagak di
pintu dapua.
Mak Kari n the gank nan sadang kalebuik mahalau kabuik takajuik. Katigonyo
saliang bapandangan sambia bapacik arek ka balai-balai, maraso-rasoan hoyak
gampo. Indak taraso apo-apo.
Di pintu dapua Iroih tagak jo muko pucek. Mak Kari tacingangak mancaliak Iroih.
Kapalonyo tabukak, lihia jo dadonyo tangango. Dek bagageh, Iroih lupo mamakai
saruang sarato tutuik kapalo. Incek mato Tan Koti tabulalak. Pudin
geleang-geleang kapalo. Buayo! katonyo dalam hati.
Jo isyaraik mato, Mak Kari manyuruah Iroih ka dalam.
Di lua tadanga galak jo sorak. Buni tip oto sabana kareh mandangak ka talingo.
Sia tu Mak Kari? tanyo Tan Koti.
Antahlah, iyo indak jaleh lo dek ambo doh, jaweknyo singkek.
Katigonyo mamandang ka lua.
Den raso nan tibo pajabaik pamarentah. Den caliak plat nomornyo sirah, uleh
Pudin mangiro-ngiro. Urang haniang. Sagalo paratian tatuju ka oto sedan nan
tatagak di bawah batang durian balando di suduik dapua.
Pinto di subalah supir duduak tabukak. Anak mudo basaragam kuniang malompek ka
lua. Sakutiko inyo lah tagak di pintu balakang. Sabalun mambukak pintu, inyo
malatakan jari tasusun mambalintang di kaniang, caro tantara hormat ka
kumandan.
Urang di lapau baradu pandang. Tan Koti panasaran, sambia babisiak kalua kato
dari muluiknyo, Rajo dari ma pulo nan singgah ka lapau awak ko Kari?
Mak Kari indak manjawek, matonyo nanek mamparatian urang nan baru tibo. Pudin
baitu pulo.
Pintu oto tabukak, anak mudo tinggi samampai nan basaragam kuniang langsuang
mambungkuak ampia ka lutuik, co urang Jawa atau urang Japang basobok jo Rajo.
Tip oto lah baranti.
Dari baliak kaco oto nan galok mambayang urang kalua. Urang di lapau
mamanjangan lihia, bausaho mancigok rajo nan tibo. Tapi nan mancogok dari
baliak oto hanyo puncak ubun-ubunnyo nan bakilek ditimpo cahayo. Badannyo
tatutuik dek badan oto.
Angekan aia capek Roih! Tampaknyo lapau kito didatangi pajabaik tahormaik!
sorak Mak Kari jo suaro tatahan.
Ha! Pajabaik tahormaik? Lai indak sasek caliak Uda? baleh Iroih nan mancogok
di pintu dapua sambia mancaliak ka lua jo suduik mato.
Capeklah ka dalam. Segehan badan, sagan awak.
Iroih babaliak ka dapua sambia bakato dalam hati, Sia pulo pajabaik nan namuah
singgah ka lapau ko? Kok dulu, manjalang pamiliahan wakia rakyaik jo pamiliahan
pamimpin nagari iyo lai. Lanyah kampuang ko dibueknyo. Hampia satiok hari ado
se urang nan manyumbang ka musajik sarato surau. Maagiah bola kaki, bola voli
sampai mamelokan pos rundo. Sahari manjalang mancucuak di TPS ado pulo nan
mambagi-bagi pitih, sairiang jo pasan, Jan lupo mamiliah dunsanak awak nan
nomor.., katonyo sambia babisiak ka talingo. Pokoknyo sagalo calon sarato
tim sukses bak umpamo Malaikaik tasasek ka bumi. Tapi kini...? Antahlah.
Iroih tagalak surang sambia geleang-geleang kapalo. Dicaliaknyo tutuik panci
lah malonjak-lonjak, tando aia nan diabuih alah manggalagak. Dari lua tadanga
lakinyo basorak. Capek lah Roih! Iroih bagageh manyalinan aia angek ka
termos.
Kito tingga-an Iroih samantaro, babaliak ka urang nan sadang harok mananti
pajabaik nan tibo.
Pajabaik bajalan ka arah lapau. Badannyo indak tinggi bana. Di suok kida
mairiang hulubalang gadang badan nan bakaco mato hitam. Lagaknyo hampia samo
jo hulubalang Presiden nan kito caliak di Tipi. Pajabaik bajalan agak
mambungkuak, kapalonyo tajulua ka muko. Di batang hiduangnyo tatonggok kacomato
taba, raso kataluncua ka bawah. Urang dilapau mangarinyiakan kaniang, malawan
cahayo paneh nan mamantak ka mato.
Hallo Mak Kari! sapo pajabaik sambia ma-angkek tangan,
Mak Kari ragu manjawek, apolai ma-angkek tangan. Cameh kok disabuik urang nan
indak bataratik sopan. Awak rakyaik, indak buliah sumbarangan ka pajabaik!
Sadangkan anak buahnyo se lai tabungkuak-bungkuak, apo lai urang nan indak
bapangkaik sarupo awak. namuah se inyo datang ka lapau buruak ko, lah gadang
juo hati, katonyo dalam hati.
Sadang Mak Kari ditangkok ragu, Pudin babisiak, Rasonyo ambo tau jo paja ko
mah!
Ssst! Indak buliah bapaja-paja se ka pajabaik. Indak sopan namonyo tu!,
bisiak Mak Kari.
Tibo-tibo Tan Koti tagak. Ooowaaik kalerraaa! Waang kiro-e Yuaang. Den sangko
rajo dari nagari subarang nan kama-i, rupo-e si Konoih, si St Mantikorabun.
Mak Kari tagamang mandanga kecek Tan Koti, apo lai bawaang ka pajabaik.
Apolai urang nan disabuik Tan Koti si St MantikoRabun tadi babaju safari,
sarupo jo nan dipakai dek pajabaik nagari. Pasti si Konoih lah mamacik kini,
katonyo dalam hati.
Duduaklah pak, baso Mak Kari, sambia ma-angguakan kapalo ka hulubalang nan
tagak mangangkang. Mandanga Mak Kari ba-apak ka si Konoih, paruik Tan Koti
bangkak. Pudin nan duduak di suduik mambuang muko manyuruakan galak.
Roiiih! Buekan kopi tigo. Sadiokan di galeh rancak nan batadah. Sagan awak!
sorak Mak Kari.
Masuakan susu Tek, Konoih bakandak.
Ciek atau kaduonyo? tanyo Iroih dari baliak kain.
Ambo surang se lah Tek. Lah taragak lo ambo, tukuaknyo.
Tan Koti jo Pudin batuka pandang sambia manahan galak.
Tan Koti baa? Indak minum teh talua bagai? Pudin? Konoih babaso.
Jadilah. Teh talua ciek. Tapi indak usah pakai susu, pasan Tan Koti.
Dulunyo si Konoih nan bagala St MantikoRabun manjadi pagawai nagari. indak lamo
sudah tu inyo baranti. Tadanga pulo kaba inyo manjadi ketua LSM, tapi sajak
dari surek sampai ka pitih diuruihnyo surang. Stempel sarato alaik paragaik
kantua ado dalam tas kulik usang nan dikundang-kundangnyo kama pai. Kudian,
dapek kaba, bahaso si Konoih bagabuang jadi pengusaha kayu. Karajonyo maanta-an
upeti ka pajabaik sarato urang nan paralu disogok. Kutiko pamiliahan umum
kapatangko, tadanga pulo kaba bahaso inyo manjadi tim sukses walikota
Bukikrandah. Tantang sasok juraminyo, dari ma asanyo, sampai kini indak ado
urang nan tahu.
Sadang lamak maota, tibo-tibo Konoih manalepon dari Hape.
Halooo....Dima apak kini? kapalonyo ma-angguak-angguak.
Mak Kari n the Gank mamparatian St MantikoRabun. Kapalonyo maangguak-angguak,
sarupo maiyoan kecek urang nan ditaleponnyo.
Jadi pak. Jam bara? Kini? Konoih manutuik taleponnyo nan balipek.
Pak Wali paralu jo ambo, keceknyo sambia tagak. Bia ambo mambaia kasadonyo
Mak. Masuakan se ka buku hutang ambo, ulehnyo.
Mak Kari tapurangah. Pudin jo Tan Koti takikik manahan galak.
Di pintu lapau St MantikoRabun bakato, Kok ado dunsanak di siko nan paralu jo
walikota, paralu bantuan supayo anak kamanakan awak ditarimo manjadi pagawai
nagari, usah ragu, tamui se ambo. Dijamin bereees!
Konoih lah hilang dari pandangan mato. Mak Kari tamanuang dek kanai karajoan
dek St MantikoRabun sabanta ko. lagaknyo bakcando kamambaia-an urang salapau,
ruponyo masuak buku hutang, antah bilo kadibaianyo. Pudin jo Tan Koti galak
tabahak.
Pueh dek galak, Pudin bacurito, bahaso kutiko manalepon tadi, si Konoih lupo
manakan angko-angko di taleponnyo.
Jadi..? tanyo Mak Kari jo Tan Koti sarantak.
Pudin tagalak. Lah kanai ota awak, jaweknyo.
Mak Kari tahanyak, Tan Koti manokok kaniang. Buluih juo den dek paja kalera
tu, umpeknyo
--------------------------------------------------------------
Website: http://www.rantaunet.org
=========================================================
Berhenti, berhenti sementara dan konfigurasi keanggotaan anda, silahkan ke:
http://rantaunet.org/palanta-setting
--------------------------------------------------------------
UNTUK DIPERHATIKAN:
- Hapus footer dan bagian yang tidak perlu, jika melakukan Reply
- Besar posting maksimum 100 KB
- Mengirim attachment ditolak oleh sistem
=========================================================
