Resek Tapi Kain Surang-surang
Oleh : Viveri Yudi Minggu, 26-Februari-2006, 03:45:35 215 clicks
Dari tahun ka tahun urang Minang batambah banyak. Ado nan di
kampuang, ado nan di rantau.......
Jikok kito kumpua-an pandapek urang pandai tantang paham urang Minangkabau
taradok adaiknyo, ambo mambaginyo manjadi ampek pakaro, (Mak Kari)
Ba-a mungkasuik Kari ko, tanyo Tan Koti sambia mangarinyiakan kaniang.
Bana. Cubo lah sanak tarangan ka bakeh kami baduo. Buliah nak sanang dalam
hati, sajuak dalam kiro-kiro.., Pudin manyambuang tanyo.
Heeep taa! sambuang Tan Koti sambia manapiak meja. Co mandanga urang
barandai den mah, garah Tan Koti.
He.., he... Sero lo diambo caro itu. Takana lo dek ambo kutiko manjadi anak
Randai. Taragak pulo awak bagalombang sarato badendang sarupo dulu, jawek
Pudin mangana maso nan lampau..
Mak Kari manaruihan curito.
Nan partamo, urang Minang substantif. Nan disabuik urang Minang
substantif, iyo lah urang nan lahia dari Induak atau Ayah nan barasa dari
Minangkabau. Mereknyo lai Minang, tapi parangainyo Ulando. Jan kan ditanyo
tantang adaik, bahaso nagarinyo se inyo lupo. Nan kaduo, urang Minang
normatif. Nan tamasuak jinih nan kaduo adolah urang nan tau jo adaik sarato
barih balabeh sacaro kuliknyo sajo. Bapatatah-patitiah inyo pandai, bapantun
inyo piawai, tapi indak talukih dalam laku parangai...
Banyak tasuo pajabaik nagari nan mahapa pantun, patatah-patitiah, sarato bungo
pasambahan kato, kutiko ka bapidato di muko urang adaik, supayo disabuik pulo
urang baradaik, salo Pudin.
Munapiak tu mah, sorong Tan Koti.
Mak Kari geleang-geleang kapalo. Tapi dalam hati inyo mambana-an kecek
konconyo. Sabab, itu nan banyak tasuo. Kalaulah ka bapidato ajudan kalebuik
mancari katua adaik untuak mananyoan pantun sarato patatah-patitiah nan sasuai.
Baitu juo kalau ka bapidato di muko urang ugama, dihapa pulo ayaik Quran
sarato hadih Nabi ciek duo.
Untuak mamutuih ciloteh nan manyirahan talingo urang nan suko babuek sarupo
itu, Mak Kari bakato, Nan katigo, disabuik urang Minang konfirmatif.
Tan Koti jo Pudin manyimak.
Urang nan indak hanyo tau barih balabeh adaik, tapi inyo taruih-manaruih
mampalajari, manyilami adaik. Bak kato urang pandai, urang Minang mamakai
pola egaliter, ma-agiah hak sarato kesempatan satiok urang untuak
mangambangan diri, sapanjang alua jo patuik, patuik jo mungkin. Kain dipakai
usang, adaik dipakai baru. Usang-usang dipabarui, lapuak-lapuak dikajangi,
baitu kato mamang adaik.
Tapi ado pulo nan baru mamakai adaik bilo paralu sajo. Umpamonyo, kutiko ka
pamiliahan wali nagari.., atau ka Pemilu, ciloteh si Pudin.
Kini gala kan bisa dicarian. Bara karuang Pudin katuju. Bia nak ambo patamuan
jo agen gala di nagari Mati Pucuak ko ha, garogok Tan Koti indak namuah
kalah.
Mak Kari malanjuikan. Nan ka-ampek...
Urang Minang nan koruptif... sorong Tan Koti sambia malengah-lengah cangok.
Mak Kari tatagun, sambia malulua galak, paham mungkasuik Tan Koti manyabuik
koruptif tadi. Pudin tapalongo, sudah tu inyo batanyo, Ba-a mangko kalian
galak? Bacimeehan ambo?
Ha.., ha... Lamah bana aki angku manangkok mah, cimeeh Tan Koti.
Kecek Tan Koti, nan ka-ampek urang Minang koruptif. Nan masuak kalompok iko
adolah urang nan mangaku urang Minang tapi suko korupsi. Mambuek malu kampuang
jo nagari. Baiak inyo di rantau, apolai di kampuang surang.
Ooo.., kalau itu urang nan indak tau diri. Lah dipiliah dek rakyaik, e, e,
inyo khianaik jo umanaik...
Kama lo pai nyo dek Sutan ko?
Alah jaleh dek den kama arahnyo tu mah. Urang Miang ko mah. Alun takilek, alah
takalam. Ba-a tu Mak Kari? Tan Koti mangecek, lubang hiduangnyo kambang
kampih.
Nan sadang dihebohan urang di kampuang awak ko hanyo contoh pakaro. Bia se lah
hukum nan manyalasaian. Indak patuik dikaik-kaikan jo harago diri urang Minang.
Adaik dek urang Minang babudi, baraka, bailemu sarato tahu mungkin jo patuik.
Nak pandai pagunoan aka, nak tinggi naiakan budi. Hiduik batungkek aka, mati
batungkek budi. Indak babudi putuih tali, indak bailemu taban bumi.
Manuruik ambo, nan tamasuak urang Minang koruptif kecek Tan Koti tadi
tamasuak pamimpin adaik nan mampajuabalian gala jo pangkaik. Mampagalehan tanah
ulayaik, manggadaian kampuang jo nagari.
Saroman jo kajadian kutiko nagari dipacah manjadi desa tu.., tongek Tan
Koti.
He.., he... Masuak juo galehnyo, kecek Mak Kari.
Tapi, manuruik kaba nan ambo danga, kutiko itu pamarentah nagari awak paralu
pitih untuak mambangun nagari. Samantaro awak bansaik, indak bapitih. Tapaso
nagari nan Limo Ratuih Ampek Puluah Tigo dipabanyak manjadi labiah kurang Anam
Ribu desa. Ssabaleh kali lipek dari samulo, Mak Kari mancubo manjalehan.
Kalau paretongan urang manggaleh tantu iyo, sewai Pudin si Pudin.
Mak Kari tasentak, dek Pudin manyabuik-nyabuik urang manggaleh. Pudin langsuang
arih.
Nan ambo mungkasuik, caro bapikia pamarentah kutiko itu hampia sapangana jo
urang manggaleh kaki limo. Nan paralu galeh laku, baruntuang pulo agak saketek,
alah tu mah. Kok ka taambek jalan oto dek barangnyo, tatutuik toko urang dek
payuangnyo, indak manjadi pangananyo bana., uleh Pudin basumangaik.
Jadi, mungkasuik angku pamarentah hanyo bapikia untuak mambangun sado nan
tampak dek mato sajo? tanyo Mak Kari.
Tapek bana! Pakaro mental spiritual sarato adaik jo budaya manjadi nomor Duo
Ratuih Tujuah Puluah Duo! He.., he...
Ndeeh.., jauah-e lai, solo Tan Koti.
Urang tagalak. Pudin manyambuang curito.
Akibaiknyo, limbago adaik rusak binaso. Niniak mamak jo pamimpin adaik
dimarginalkan, lenggangnyo tapampeh, tagak tasondak.
Sagalo pakaro di nagari disalasaian jo hukum negara, nan dibuek dek panjajah
Ulando. Pangulu jo niniak mamak dijadian pamenan meja. Disuruah
mairiang-iriangan pajabaik. Kadang dipalirikan di nan paneh, pananti pajabaik
datang...
Tapi pamimpin adaik nan bapandai-pandai, kan lai dapek proyek ateh namo
adaik, tongek Tan Koti.
Pudin indak maacuahan tongek Tan Koti cako, sabab dadonyo sasak, paruiknyo
bangkak, kapalonyo mangantak-ngantak. Mangana parangai pamarentah lamo nan
mabuak kuaso.
Sahinggo lupo jo adaik, tingga ugamo, indak pulo tapakaian raso jo pareso.
Kacak langan lah bak langan, kacak batih lah bak batih. Bak umpamo Badak
jantan, kulik suriah jangek lah luko, namun lenggoknyo baitu juo.
Pokoknyo, rusaknyo modal sosial di nagari nan bapaga adaik nangko, indak
sabandiang jo harago pitih nan ditarimo! baitu Pudin mangaluakan pati kato.
Mak Kari ma-angguak-angguak, Tan Koti baitu pulo. Pudin mahiruik kopi nan
tasiso. Untuak samantaro indak tadanga suaro. Satiok urang nan duduak di lapau
tabanam jo pangananyo surang-surang.
Indak lamo antaronyo, Mak Kari basuaro.
Indak guno disasai apo nan lah tajadi. Awak sampaian ka pamarentah nan kini,
supayo ingek sabalun kanai, jan sampai Pisang babuah duo kali.
Pudin mamandang ka puncak musajik, sambia bakato, Awak harok jo pamimpin nan
manjujuang tinggi adaik jo limbago sarato ugamo. Arih bijaksano dalam
kabanaran...
Paruik den maloyo mancaliak pamimpin nan gadang ota, banyak wacana, gadang
sarawa! uleh Tan Koti. Apolai nan ba-hati bak tareh palapah, bajantuang bak
jantuang pisang, mato gadang pancaliakan kurang, talingo laweh pandangaran
sumbang. Indak den dooh, tobaiik!
Mangecek di lapau barapi-rapi. Itu namoyo mambulalang di nan kalam, mahariak
di baliak bukik, sindia Pudin.
Heyyayyai yeeh. Taga den indak tapiliah se kapatangko nyo. Kok indak..,
antahlah.. Takana lo dek den kecek Mak Kari tantang urang Minang tadi. Ba-a
jadinyo?
Alaaa iyo yo. Taruihan lah Kari. Nak kito kito danga lo basamo-samo, Pudin
maningkahi.
Mak Kari tatagun sakutiko, mancubo mangumpua-an pangana pakaro nan disabuiknyo
samulo cako. Tan Koti mampatapek duduak, madok ka Mak Kari.
Ooo iyo. Tadi ambo alah manyabuikan tantang urang Minang nan substantif,
normatif, konfirmatif. Nan kaampek dinamoan urang Minang nan
transformatif.
Jadi nan koruptif tadi indak masuak doh Kari? ciloteh Tan Koti.
He.., he... Indak dapek dek ambo manjaweknyo doh. Tasarah se lah ka nan
basamo, elah Mak Kari.
Taruihlah Mak Kari, sorak Pudin.
Urang Minang transformatif manuruik ambo, salain paham jo adaik, dapek pulo
ka suri tauladan dek anak bini, dunsanak, sarato urang salingkuang tampek
tingganyo.
Jadi paralu lo inyo bapantun bapasambahan jo anak bininyo? sorong Tan Koti.
Bukan pantun, patatah-patitiah sarato pasambahan nan sari pati adaik. Manuruik
mamak ambo, Alis Marajo Datuak Suri Dirajo, hakikaik urang nan baradaik
ba-budi, baraka, bailemu, tau jo mungkin sarato patuik.
Jadi, ba-a duduak pakaro tantang Adaik nan sabana adaik, adaik nan taradaik,
adaik nan diadaikan, sarato adaik istiadaik nan disabuik-sabuik salamoko?
tanyo Tan Koti.
Satahu ambo, ampek pakaro adaik nan Sutan sabuik tadi lah dijalehan urang
dalam tambo, sarato buku-buku tantang adaik. Itu defenisi adaik. Nan ambo
sampaian cako, sari pati adaik, jawek Mak Kari.
Tan Koti binguang.
Kok nak tarang, pailah turuik mak Datuak ka rumah bininyo. Dek ambo iyo
tarang-tarang lareh lo nyo, pinteh Mak Kari.
Jadi ba-a pakaro urang Minang transformatif tadi? Pudin indak saba
mandanga.
Urang nan transformatif kama pai indaknyo cangguang, sabab inyo babudi,
baraka, bailemu, tau patuik jo mungkin. Urang nan sarupo iko nan ka mambangkik
batang tarandam, panjauik piutang lamo. Panapiak mato padang, panantang
Matohari. Palawan dunia urang, pahapuih arang di kaniang.
Di ujuang curito Mak Kari Tan Koti jo Pudin saliang bapandangan. Sarntak
kaduonyo mancaliak ka Mak Kari.
Manuruik Mak Kari, ambo ko tamasuak urang Minang nan ma? tanyo Pudin jo Tan
Koti sarantak.
Mak Kari tagalak.
Antah lah...! Resek se lah tapi kain awak surang-surang, jaweknyo bakieh.
([EMAIL PROTECTED])
--------------------------------------------------------------
Website: http://www.rantaunet.org
=========================================================
Berhenti, berhenti sementara dan konfigurasi keanggotaan anda, silahkan ke:
http://rantaunet.org/palanta-setting
--------------------------------------------------------------
UNTUK DIPERHATIKAN:
- Hapus footer dan bagian yang tidak perlu, jika melakukan Reply
- Besar posting maksimum 100 KB
- Mengirim attachment ditolak oleh sistem
=========================================================
