Assalaamu'alaikum sanak ambo. Alah lamo palanta awak langang jo carito ranah. Untuang ado diak Rahima nan tetap istiqomah dengan dakwahnyo. Ado pulo Mak Ngah nan kalua jo anatomi pulo. Jadi palanta indak langang bana. Mari ambo bao manukik baliak ka misi usali RN ambo egangan dari Padek Wassalam/ajoduta -------------------------------------------------------------------------------- Udo Diadu Kudo Oleh Viveri Yudi Kamis, 04-Mei-2006, 05:46:39 62 clicks Hari sadang barambang patang. Matoari baransua tabanam, manyuruak ka baliak salimuik malam. Sadang rami urang di tapi jalan, mananti oto tambangan nan kamambaonyo pulang. Dari arah Andalas Plaza, Bendi Udo Sunguik babelok ka kida, masuak ka jalan M. Yamin nan talatak di tangah kota. Udo mampa-arek pacik tali les, manahan lari kudo di balakang oto nan sadang basasak.
Sadang lamak bajalan, tibo-tibo ado oto mamancuang jalan kudo dari subalah suok. Sacapek kilek Udo maelo tali les ka dado, badannyo rabah ka balakang, bantuak urang sadang takongkang, Diaaamm! Si Gumarang manyaringik, Hhhiiiieeehh! Jan kareh bana maelo tali tu, Do. Sakik garaman den. Udo indak lamak hati. Dek ulah parangai supir oto inyo nan kanai saringik dek kudo. Nyo bae bacaruik bungkang ka supir oto, Supir bala! Abak Ang punyo jalan ko!? Tapi talingo supir sadang tasumbek dek suaro lagu dangdut remix sms. Nan diputa di tip otonyo. Supir basibanak, inyo basorak, Buayo Da, buayo Ni? Si Gumarang manyolo, Ndeeeh! Udo dikecekannyo buayo? Santiang bana paja tu mah. Mantang-mantang inyo manambang ka kampuang Walikota? kecek kudo maangek Udo. Uda batambah paneh. Talingo raso ka tapanggang. Agiah, Do! Cuekan pangka turiaknyo. Buliah nak jaran saketek, sorak si Gumarang. Udo maloncek turun, bagageh manuju oto baranti. Diganggamnyo palacuik kudo arek-arek, roman mukonyo barubah sarupo udang tapanggang. Garamannyo manggarik-garik sarupo kudo nan sadang mangunyah rumpuik. Udo tibo dakek oto, tapi supir manakan gas, maningga-an Udo nan sadang tarabo. He.., he gadang karengkang se Udo ruponyo, cimeeh kudo. Udo tatagun sakutiko. Kalera kudo ko mah, aden lo nan diadunyo jo urang, garutoknyo sambia maloncek ka ateh bendi. Disentakannyo tali kareh-kareh, Haiiiihh! Aduuah! Jan kareh bana Do, cabiak bibia den, apo kecek pacar den beko, rengek kudo manahan sakik. Udo indak maacuahan saringik kudo. Ditakannyo lonceng bendi sajadi-jadinyo, Tnenk-tnennk! Haiiihh! Kudo balari maelo bendi. Manyisik di antaro oto nan basalingkik di nan rami. Tapek di muko parantian oto Goan Hoat lamo, bendi tapaso baranti. Di muko, angkot sadang manaiak-manurunan panumpang. Si Gumarang mangecek, Alun juo salasai pakaro pasa batingkek ko lai Do? Gaduangnyo sabanta lai salasai, jawek Udo sambia malengah cangok. Sakik hatinyo tadi alun hilang juo. Jadi ado nan alun salasai, Do? Itu nan tabedo den manjaweknyo. Jalehan lah ka bakeh ambo. Kan lai indak ado urang nan mandanga doh, sasak kudo. Mungkasuik baiak handaknyo disampaian jo caro nan lamak diawak katuju diurang. Jadi manuruik Udo, Pamarentah babuek sakandak hatinyo sajo? Bukan baitu mungkasuik den. Awak kini hiduik di jaman reformasi. Pambangunan untuak rakyaik, pitihnyo dari rakyaik, dipicayoan ka Pamarentah nan dipiliah dek rakyaik. Sabalun karajo dibuek, paralu dipalegakan ka urang banyak. Bak kato urang tuo. Lamak siriah lega carano, lamak kato balega bunyi. Tapi den danga pakaronyo lah tibo di tangan hakim, sorong si Gumarang. Bana. Tapi jikok tibo di sinan, nan manang jadi arang, nan kalah jadi abu. Awak urang Minang, urang nan tasabuik arih bijaksano. Jikok tibo silang sangketo, sasek suruik, talangkah kumbali, pulangnyo ka balabeh juo. Sapueh silang jo salisiah datang bana samo badamai. Indak ado kusuik nan tak salasai, indak ado karuah nan indak tajaniahkan. Tamasuak pakaro pambangunan nan lainnyo? Bana! He.., he Tapi pidato Udo tadi panjang bana. Sulik wakden mangarati, kecek si Gumarang. Eh, iyo. Lupo den bahaso waang kudo. Kok urang Minang tantu lai paham. He.., he. Baa gak ati? (Nan bacurito: Viveri Yudi) -------------------------------------------------------------- Website: http://www.rantaunet.org ========================================================= * Berhenti (unsubscribe), berhenti sementara (nomail) dan konfigurasi keanggotaan, silahkan ke: http://rantaunet.org/palanta-setting * Posting dan membaca email lewat web di http://groups.yahoo.com/group/RantauNet/messages dengan tetap harus terdaftar di sini. -------------------------------------------------------------- UNTUK DIPERHATIKAN: - Hapus footer dan bagian yang tidak perlu, jika melakukan Reply - Besar posting maksimum 100 KB - Mengirim attachment ditolak oleh sistem =========================================================