Assalamu'alykum w.w. Buliah pulo ambo manyalo saketek ? antah kok ambo nan rindu jo taragak tahadok kampuang dek lah lamo maninggakan kampuang (masih kalene baru), tiok hari di rumah (di rantau) ambo iyo mampagunokan bahasa Minang bakomunikasi jo anak ambo, sungguahpun anak-anak ambo indak bisa manjawek sacaro fasih jo bahasa Minang, tapi ano lai mangarati apo nan ambo sampaikan. sakadar informasi, (bukan mangapik daun kunyik), anak ambo nan paratamo lahia di rantau, tapi kalau ambo kecekkan ano bukan urang minang, ano jadi protes, indak amuah no kalau dikecekkan bukan urang minang doh Anak ambo nan ka duo, ambo agiah namo AGAM, ano sabana sanang jo namo tu, sampai acok ano basitangka jo Unin, dek karano unino lahia dirantau, sadangkan si AGAM lahia di kampuang. Anak ambo nan ka tigo ambo agiah namo Cati Bilang Pandai (ambo cari daftar namo, iyo alun basuo li namo cati bilang pandai nan dipakai urang kini ko), tantuno dengan niaik handakno sasuai pulo jo kapandaian Niniak kito nan dahulu nan banamo Cati Bilang Pandai tu. dengan pambarian namo nan man-ceno-kan sebagai urang minang, ambo baharok anak ambo iyo cinto, banga dan baminaik kapado adat budaya minang. satiok ado tamu nan datang ka dangau ambo, baiak nan dakek atau nan jauah, lah ambo tunjuak ajai mulai ketek, nama nan patuk diimbao Mamak, nama nan patuk diimbau Apak, supayo jaleh di ano bedo antaro urang nan sasuku jo nan indak sasuku, jaleh di ano nama nan pakai aturan adat, nama nan pakai aturan agamo, baitu pulo kalau nan tibo dirumah nan ketek-ketek, babedokan pulo imbauanno, nama nan sabagai dunsanak tali darah (islam) nama nan dunsanak tali adat. Di bogor, lah babarapo tahun nan lampau sampai kini ko, ambo iyo acok pulo bakumpua jo nan mudo-2, nan baru masuak atau sadang kuliah, kami acok maadokan partamuan, mambahas masalah adat budaya, tantuno indak sarupo jo bahasan urang nan cadiak pandai satiok ado tahun ajaran baru, biasono kami maadokan acara nantun, disinan bakumpua nan baru masuak jo nan lah kuliah, kami samo mambicarokan, baa caro nan elok, baa caro nan baiak, apo tujuan ka rantau ko, sia nan mambiayai pai ka rantua, baa pulo caro urang nan mambiayai tu mancari biayano. Kok caro ba kamanakan, iyo lai ambo kaokan pulo, tantuno ambo kaokan sasuai jo kadaan dan kemampuan, ka contohno : sungguahpun uni ambo lai bakarajo baitu pulo apak pajano (sumando), nan ambo iyo lai sato pulo "mancaliak" kamanakan ambo saketek banyakno, walau "hanyo" barupo bareh agak sa sumpik tiok bulan Ba mangko ambo lakukan sarupo itu, iyo dek ado raso bakamanakan, kok nan jauah iyo ambo "caliak" jo talipon, alah sanang pulo hati kamanakan ambo, baitu pulo sumando, jadi indak pulo harus Pitih sajo nan dikamukokan doh. Babarapo tahun nan lalu, ado perumpamaan nan disampaikan Mak Sinaro, iyo carito duo urang mamapeh di tapi banda, nan bacarito tantang Aia, kecek urang nan mamapeh tu, iyo paralu bana aia ko, kalau indak ado aia, mako rasono indak ado kahidupan didunia ko doh, sagalono mamaralukan aia, Sadang bacarito tu tadanga dek ikan nan ketek, lalu ikan ketek tu batanyo ka induakno, :nama bana nan aia tu, baa mangko paralu bana aia tu, baitu urang nan mamapeh cako bacarito ?? Jawek dari induak ikan : kalau nak tahu jo aia, cubolah kalua dari banda ko, baru tahu bana nan aia tu ( pulang maklum tantang itu) satantangan patatah patitih, cubolah inok manuangkan. dibaliak ditilantangkan, dibaka kumayan putiah, disinan asok manjulang ka udaro, dibuka kulik sampai ka batang, taruh ka tareh paguba, baru basuo nan sabana bana no tiado lain nan adolah nan bana lah malantun kian kamari, tapi itu nan taraso, kok lai paguno samo diambiak, kok tasuo di nan ukan, tolong dibaok ka nan elok Wassalamu'alaykum w.w. Bandaro Labiah larek dirantau, bangga jadi dan mangaku urang Minang Saafroedin BAHAR <[EMAIL PROTECTED]> wrote: Assalamualaikum w.w.
Buliah ambo manyalo saketet\k ? Ambo satuju jo paringatan Ananda Ajo Dutamardin Umar di Amrik. Saluruah anak ambo nan lahia di Sumbar dan kini sabagian gadang di Rantau, indak ado nan baminat ka adat jo budaya Minang, walaupun ambo mandorong mereka untuak satidak-tidaknyo tahu. Mereka labiah maraso jadi urang Indonesia. Ado nan kurang sasaik sabalango nan nampak di ambo baa mako indak banyak minaik nan mudo ka adat jo budaya Minang, yaitu jauahnyo jarek antaro nan kito katokan jo kanyataan sahari-hari. Jo kato lain, apo nan kito katokan indak ado atau kurang ado dalam kanyaan hiduik. Kito manyamokan adat dan budaya Minang itu jo papatah patitih, dan papatah patitih itu kita samokan jo norma sakaligus kanyataan. Baa jalan kaluanyo ? Ambo alah mangusulkan ka Ananda Rahimah, Ananda Datuk Endang Pahlawan, dan Ananda Datuk Marah Bangso, agar supayo saluruah norma adat, budaya, dan ugamo nan kito inginkan maatur hiduik kito sabagai urang Minang, yaitu ABS SBK, dikumpuakan jadi satu dalam Kompilasi Hukum ABS SBK, dan kito kukuahkan dalam suatu Kongres Minangkabau. Sasudah dikukuhkan, mako salain balaku untuk kito -- paliang tidak dalam masalah keperdataan -- juo sakaligus bisa manjadi bahan ajaran untuak nan mudo-mudo. Kalau indak baitu, mako masalah gadang iko akan majadi wacana ka wacana sajo bakapanjangan. Sakianlah tanggapan ambo. Wassalam, Soean Madjolelo )69th) Send instant messages to your online friends http://uk.messenger.yahoo.com -------------------------------------------------------------- Website: http://www.rantaunet.org ========================================================= * Berhenti (unsubscribe), berhenti sementara (nomail) dan konfigurasi keanggotaan, silahkan ke: http://rantaunet.org/palanta-setting * Posting dan membaca email lewat web di http://groups.yahoo.com/group/RantauNet/messages dengan tetap harus terdaftar di sini. -------------------------------------------------------------- UNTUK DIPERHATIKAN: - Hapus footer dan bagian yang tidak perlu, jika melakukan Reply - Besar posting maksimum 100 KB - Mengirim attachment ditolak oleh sistem =========================================================
