Yth. Dunsanak kasadonyo; Partamo ambo aleh kecek sabalun basampaikan, kato ambo ambo bateh dahulu sabalun bauraikan.
Mungkasuik ambo ukan manggaleh atau mampromosikan suatu barang atau jasa, ambo ingin mambantu sajo dunsanak-dunsanak kito nan masih agak gagok dalam ba-email, bakomunikasi liwaik dunia maya kecek rang kini. Imbalan nan ka ambo tarimo, ukanlah pitih atau komisi dari nan punyo galeh, melainkan niaik ikhlas untuak mambantu, Allah SWT punyo kuaso baleh mambaleh buek baiak. Kini nangko, koneksi internet liwaik kabel telepon alah masuak ka sagalo palosok nagari Ranah Minang kito. Di Pikumbuah, Padangpanjang, Biaro atau Matua, asa lai ado kabel talipon mangko internet pun alah ado. Basukur juo awak telkom alah maadokan fasilitas nan banamo Telkomnet Instan ko. Sahinggo, jikok mamak atau cadiak pandai alah manggamo andak baraja komputer sarato bakirim kaba liwaik email, anak kamanakan lai dapek diasuah. Sahinggo pangatahuan anak nagari lai indak jauah bana tingga dari urang nan barado di kota. Salah surang mamak kito batanyo bakeh ambo, bakaitan jo surek ambo nan tadahulu, baa jikok awak alah punyo email @yahoo.com, tapi nio pindah ka yahoo.co.id? Untuak sabana pindah, manuka domain sajo tu, Yahoo INDAK dapek melayani. Namun jalan ka Saruaso kan indak ciek. Walaupun awak indak buliah pindah domain baitu sajo tu (karano masiang2 domain tantu tunduak pado hukum nan balaku di negara tampek nyo barado), namun ambo alah manamukan jalan untuak dapek maubah domain dengan user Id nan samo tu. Ambo alah mancubo surang apo nan ambo sampaikan ko. Saisuak, katiko ambo baranti main domino di lapau untuak baraja internet, domain Yahoo.co.id alun ado lai. Mangko ambo bueklah email dengan alamaik [EMAIL PROTECTED], sasuai jo namo ambo surang. Namun katiko kiro-kiro sataun lapeh, Yahoo alah malebakan galehnyo sampai ka nagari kito, domain banamo Yahoo.co.id, dengan fasilitas POP mail tanpa mambayia (condong mato tantu ka nan rancak, condong salero ka nan perai) ambo langsuang nak nio. Sabalunnyo, untuak mandapekkan fasilitas POP tu, ambo mambuek account di Yahoo.co.uk (Inggirih), sarato Yahoo.com.sg (Singapura). Kini di nagari awak bana adonyo, tantu ambo basirinti andak mandapek. Samo jo niaik mamak kito tadi juo, baa lah caronyo untuak pindah tu. Sajak Yahoo mamperkenalkan layanan "delete account", mangko tapikia dek ambo, kito apuih sajo akoun kito dahulu, sudah tu buek baliak dengan namo nan samo. Mangko ambo cubo lah mahapuih akoun ambo dg namo wadyafriadi tadi tu. Yahoo menerapkan tenggang wakatu tigo bulan untuak maapuih akoun tu sacaro permanen. Mangko sasudah liwaik wakatu tigo bulan, ambo mandaftar (sign up) baliak di http://mail.yahoo.co.id (Indonesia) dengan namo nan samo. Alhamdulillah, pendaftaran ambo berhasil! Kini ambo punyo account nan samo jo nan dahulu, tapi alamaik emailnyo @yahoo.co.id. Namun malakukan caro sarupo ko agak rawan juo. Sabab kalau namo awak tu agak pasaran, ado resiko urang lain mandaftar pulo dg namo nan samo. Mangkonyo sasudah tenggang wakatu tigo bulan, tu usahokan mancubo sign up tiok ari, supayo namo awak indak tagiliang. Baitu sajo dari ambo, mudah-mudahan bamanfaaik untuak dunsanak nan masih 'alif ba ta' dalam bainternet. Untuak dunsanak nan alah santiang sangaik, sarato memiliki ilmu tinggi dalam IT, mangko ambo tunduakkan kapalo ambo susun jari nan sapuluah, maaf jo rila nan ambo mintak. Bakarilaan kito. Ukan mungkasuik ambo maajari tantara babarih, namun niaik tulus untuak manunjuakkan kapado dunsanak kito nan alun baitu mangarati namun malu batanyo. Mudah-mudahan babarakaik. Wassalam St. Pamenan ________________________________ Do You Urangawak? urangawak@yahoogroups.com http://groups.yahoo.com/group/urangawak __________________________________________________ Apakah Anda Yahoo!? Lelah menerima spam? Surat Yahoo! memiliki perlindungan terbaik terhadap spam http://id.mail.yahoo.com -------------------------------------------------------------- Website: http://www.rantaunet.org ========================================================= * Berhenti (unsubscribe), berhenti sementara (nomail) dan konfigurasi keanggotaan, silahkan ke: http://rantaunet.org/palanta-setting * Posting dan membaca email lewat web di http://groups.yahoo.com/group/RantauNet/messages dengan tetap harus terdaftar di sini. -------------------------------------------------------------- UNTUK DIPERHATIKAN: - Hapus footer dan bagian yang tidak perlu, jika melakukan Reply - Besar posting maksimum 100 KB - Mengirim attachment ditolak oleh sistem =========================================================