Assalaamu'alaikum wa rahmatullaahi wa barakaatuhu Nan sakaliko sabano. Jadi bukan carito fiktif. Ari Sabtu tanggal 8 Juli 2006, ampia sataun sajak Banda Udaro Minangkabau ko dioperasikan, turunlah ambo di siko. Jo pesawat Batavia nan talambek 2 jam dari jadwalno, pukuah satangah tujuah katiko ari barabuik sanjo. Impresi partamu, iyo santiang. Turun dari pesawaik malalui balalai, langsuang ka bawah jo escalator, manuju ka tampek maambiak bagasi. Lai bataratik disinan, indak ado portir nan manyasak-nyasak, kacuali sakadar batanyo sajo. Katiko kami maambiak troli, lai aman, indak ado masalah. Sudah itu kalua, kabatulan ambo dijapuik dek dunsanak. Indak pulo nampak ado urang taksi nan nak mampasarabuik-an awak doh. Lai nampak di ambo counter taxi, tapi langang sajo. Jadi ambo indak tau baa carono kalau sakirono ambo ingin nak maambiak taksi. Tapi rasono tantu sarupo saisuak di Tabiang juo, alah ado tarif untuk masiang-masiang tujuan. Walaupun arapan awak jauah ka muko, harusno ado taksi nan pakai argometer jo supir nan indak baniaik nak mangicuah disinan.
Kami kalua dari palataran parkir Bandara. Jalan rancak (tantu sajo iyo, kan masih baru). 6 kilo manjalang jalan raya Padang Bukiktinggi. Bakelok ka kida manuju Bukiktinggi. Jalan rancak, tatap sarupo itu juo nan ambo caliak sajak baleh tahun nan lapeh. Tapi agak rami taraso. Oto kami balari rancak malalui Lubuak Aluang, Sicincin, Kayu Tanam, Anai. Baranti di Padang Panjang, di tampek sate Saiyo. Sudah itu taruih manuju Bukiktinggi. Alah satangah sapuluah malam kami sampai di rumah kakak sapupu ambo di Balakang Balok. Maota-ota sabanta, sabalun pai lalok. Ari Akaik ka kampuang. Ado parayaan khatam Quran jo baarak-arak dari limo parguruan atau TPA di kanagarian Balai Gurah, sarantak saari tu. Reportaseno indak saketek juo balain dari carito 'Katam Kaji' nan panah ambo tulih. Kabatulan urusan kami ado pulo nan lain, rapek untuk sabuah karajo mambuek Yayasan di kampuang. Ambo lalok di kampuang tigo malam. Patang Akaik sampai patang Salasa. Di rumah rang gaek nan saari-ari batinggaan kosong. Baniaik lo kami baliak nan manjadian tigo buah rumah nan relatif baru (dibangun sajak sapuluah tahun nan lapeh sasudah rumah gadang kami tabaka taun 1995) manjadi 'resort', ka pananti-nanti urang tualang nan ka mungkin tibo manikmati suasana kampuang. Jo pamandangan tabukak ka gunuang Marapi nan saolah sapalamparan batu sajo jarakno. Bisa lo kok ka mamapeh-mapeh di tigo buah tabek gadang. Jarak ka Kiktinggi hanyo 8.5 km sajo. Tapi kalau iyobana ka dimuloi, paralu juo agak dibadak-i dulu saketek katigo rumah tu elok-elok. Dek taun datang ambo alah ka pansiun dari tampek karajo, sampai kini nangko, iyo agak basumangaik ambo nak mancubo. Mauruih karajo turisme ko di nagari awak, insya Allah. Sabab jalan gadang di nagari awak, alhamdulillah sabana rancak, aspal beton baitu di sabuik urang sampai ka ujuang nagari. Jalan dari Koto Tuo ka Ampang Gadang taruih ka Bonjo Alam kalua ka Parik Putuih, kasadoanno baaspal rancak, nyiak Sunguik. Adiak ambo nan datang dari Pakan Baru mangalami macet di Kelok Sambilan, taalang dek urang nan sadang bakarajo mambuek jalan pinteh / jalan layang. Lain pado itu jalan tatap rancak. Hanyo sajo Bukiktinggi, sadang mambangun. Mambangun Pasa Banto sarato mall di parumahan kantua Bupati lamo di bawah Jam Gadang. Jalan nan iyo alah macet dek banyakno oto batambah macet. Arus lalu lintas balain pado nan ambo katahui dulu. Dari arah Payokumbuah awak indak bisa taruih ka Pasa Banto kini tapi baputa dulu ka Mandiangin, kalua ka Tembok, baru bisa baputa baliak di muko rumah potong. Kalau kapai ka pasa ateh, naiak dari sampiang bengke Wowo. Pasa ateh indak banyak parubahan. Manuruik panilaian ambo tatap kumuah, baiak di bawah maupun di tingkek duo pasa batingkek tu jo sarok nan indak takamehi. Suduang-suduang urang manggaleh karupuak sanjai di muko Pasa Batingkek dakek Janjang 40, sarancakno dibuek permanen bana dek pamarintah kota jo kios-kios nan labiah permanen. Pakaro kabarasiahan paralu bana diulang-ulang nampakno mangecek-an ka pak Wali, supayo awak mamuloi budayo barasiah. Ado trailer WC umum batagak-an di balakang Pangguang Eri di jalan manjalang Simpang Kangkuang. Kurang sandereh sajo nampakno. Baa mangko indak di dakek pasa, atau di bawah jam gadang tu di buek WC umum nan permanen, nan barasiah dan dijago kabarasiahanno? Di pasa ateh tadanga urang babahaso malayu, mungkin turih dari Malaysia. Katiko ambo mangecek-an taragak nak makan nasi Kapau di tampek ni Lis, ipa ambo managahan. Ado tampaik nan labiah sandereh pado tampek ni Lis tu kini, lapau ni Cah di ateh Jambu Ayia manjalang Padang Lua, di sabalah kida. Tampaikko sarupo rumah makan / restoran biaso, bukan lapau di tangah pasa. Kami makan disinan basamo-samo jo adiak ambo nan datang dari Pakan Baru sakaluarga, di ari ambo ka baliak ka Betawi, ari Rabaa. Iyo lamak. Harago agak relatif, tapi tampek labiah barasiah. Ka baliak ka Bandara ambo mamasan taksi, mintak tolong di ambiak di muko rumah makan nasi Kapau tu. Bapasan jo talipon sajo. Ongkoih 175,000. Ambo indak tau apokoh aragoko wajar atau dilabiahino saketek. Barangkeklah kami manuju BUI Minangkabau. Ari ujan rintiak-rintiak. Macet pulo saketek di Jambu Ayia manjalang Padang Lua tu. Mungkin dek ari pakan di Kiktinggi. Pukuah tigo alah sampai kami di Bandara. Batambah badaceh kagum ambo mancaliak bangunan nan iyo santiangko. Iko sabana aset nan sangaik baarago. Ambo tatap jo kayakinan, bahaso modal nagari Minangkabauko iyo parawisata. Antaro bamimpi jo baangan-angan ambo, tantang Visit Minangkabau Country year 2010. Dibao urang balenong-lenong di nagari awak. Mancaliak panorama nagari awak. Dibuek festival layang-layang di Danau Diateh / Danau Dibawah. Dibuek pacu sampan di Maninjau. Atau di Singkarak. Dijojoan sacaro labiah atraktif pacu kudo di Bukik Ambacang. dan lain-lain, dan lain-lain. Sambuah lai nan lain. Ibaraik urang ka mamuloi karajo, kini awak alah taopor katangah. Bandara lah rancak, jalan raya lumayan elok. Tingga objek-objek wisata tu paralu di pahaluih kilekno. Itulah saketek laporan pulang kampuang ambo salamo ampek malam pakan nan lapeh. Wassalamu'alaikum, Lembang Alam PS Mak Nuraji lai basuo di ambo tiok sudah sumbayang subuah di musajik Darussalam, nyiak. -------------------------------------------------------------- Website: http://www.rantaunet.org ========================================================= * Berhenti (unsubscribe), berhenti sementara (nomail) dan konfigurasi keanggotaan, silahkan ke: http://rantaunet.org/palanta-setting * Posting dan membaca email lewat web di http://groups.yahoo.com/group/RantauNet/messages dengan tetap harus terdaftar di sini. -------------------------------------------------------------- UNTUK DIPERHATIKAN: - Hapus footer dan bagian yang tidak perlu, jika melakukan Reply - Besar posting maksimum 100 KB - Mengirim attachment ditolak oleh sistem =========================================================
