Tamanuang Tan Baro mancaliek barita pancuci foto banasib malang nan dimuek
koran Singgalang. Lah mambubuang tinggi matohari di langik dan banyak cirik
kudo baserak di Pasa Raya, surang alah indak ado nan mancuci foto. Jan ka
mancucilai, maenggang sajo indak. Marasai bana urang awak kini, apolai nan
ketek-katek, Tuhan sajo nan tahu, sorak Tan Baro di lapau Uwo Pulin nan
talatak di Tunggua Hitam pado pagi hari tu. Kini apo nan dikadisabuik lai.
Kalau daulu elok rarak di hari paneh, elok lenggang di nan data. Baju sajo
indak tatuka dan tarompa alah tipih. Sabananyo iko azab bagi urang-urang nan
indak mamahami pangajaran urang saisuak. Baguru ka alam. Alam takambang jadi
guru, kecek Uncu Labai.
Bakaruik kaniang urang salapau dibueknyo. Apo pulo hubungannyo baguru ka alam
jo nasib urang marasai. Ondeh mandeh! lai dicaritokan, lain pulo gadang nan
ditokok dek Uncu. Indak nyambuang doh, cimooh Buyuang Amran.
Manggeliang-geliang kapalo Tan Baro mandanganya. Iko tipe anak mudo nan
paniang. Paniang maraso santiang surang. Urang lain dianggap bodoh.
Heee....heee...hantu blau! Marasainyo urang awak kini, iyo sarupo kato Uncu.
Indak baguru ka alam. Indak baraja ka laba-laba, jaleh Tan Baro sambie
manggantuang kato.
Soal manaruihkan nan tagantuang biasonya adolah karajo Mak Katik, rang gaek
suko maota dari lapau ka lapau. Menuruiknyo, kalau lai baraja ka laba-laba,
indak ka sansai iduik. Laba-laba tu, tipe ciptaan Tuhan nan pandai mancari
razaki. Partamo inyo buek jaringan nan ketek di suduik. Apo ko di suduik rumah,
batang kayu atau tampek lain sabagainyo. Katiko alah banyak makanan nan
tajarek, dibuek jariang baru. Jariang nan labiah gadang dari samulo. Baitu
sataruihnyo. Satiok jariang jo jariang lain, ado banang mahubungi. Mukasuiknyo,
jariang lamo indak inyo tinggakan baitu sajo. Tatap bafungsi. Network baso
urang kini. Kini caliek urang awak, usahonyo itu ka itu sajo. Indak bakambang.
Agak babedo pandapek Tan Baro jo Mak Katik. Manuruik Tan Baro, urang awak lai
baraja ka laba-laba. Tapi laba-laba si jando hitam nan jadi kanibal nan ado di
Amerika Utara.
Baa bana caritonyo Tan Baro, tanyo Uwo Pulin. Dijalehkan dek Tan Baro
bahasonya laba-laba si jando hitam tu tasabuik pambantai pasangannyo sasudah
kawin. Inyolah jando nan paliang ditakuti karano punyo racun nan mamatikan.
Kabiasaannyo mambunuah pajantan sasudah proses pambuahan dan mamakannyo. Jando
hitam bawarna hitam pakek dan bintik sirah di bawah paruik. Taangguak-angguak
urang mandanganyo. Urang awak ko lai baraja. Tapi barajo mahabisi usaho urang.
Kalau dapek, awak surang seh nan manggaleh. Partamo bakawan, bakonco palakin,
kalau lah bauntuang kawan dihabisi, dikarojokan. Sanang dinikmati basamo tapi
sabanta. Sasudah tu untuak awak surang lai. Hoi..... sanak! Jalan mandata ingek
tataruang, jalan manurun ta antak-antak, jalan mandaki sasak angok, dan jalan
malereang kok tagalincia.
elka mantagi rang mudo
(www.hariansinggalang.co.id)
--------------------------------------------------------------
Website: http://www.rantaunet.org
=========================================================
* Berhenti (unsubscribe), berhenti sementara (nomail) dan konfigurasi
keanggotaan,
silahkan ke: http://rantaunet.org/palanta-setting
* Posting dan membaca email lewat web di
http://groups.yahoo.com/group/RantauNet/messages
dengan tetap harus terdaftar di sini.
--------------------------------------------------------------
UNTUK DIPERHATIKAN:
- Hapus footer dan bagian yang tidak perlu, jika melakukan Reply
- Besar posting maksimum 100 KB
- Mengirim attachment ditolak oleh sistem
=========================================================