Assalamualaikum w.w. Bung Al, Maaf talambek ambo mambaleh, karano hari Rabaa kapatang dulu ambo dines ka Unbraw di Malang, baru baliak siang hari Kamih. Ambo kurang tahu apo batua pak Hatta parnah ka diagiah gala datuak waktu pak Harun jadi Gubernur, rasonyo ambo alun panah mandanga lai. Tapi nan jaleh, wakatu ambo hadir dalam rapek di rumah Bung Aminudjal di Kebayoran Baru, ado foto Bung Hatta bapakaian datuak, nan manuruik rencana akan dipakai jadi model untuk mambuek patuang baliau di Bukit Tinggi. Banyak hadirin nan indak satuju, umumnyo karano alun panah Bung Hatta tampil pakaian adat. Lagi pulo, kalau dibuek patuang Bung Hatta bapakaian adat, bisa-bisa urang salah faham, karano dikiro patuang Ketua LKAAM (!). Tapi ado kabaratan nan labiah mandasar, yaitu informasi bahaso Bundo Bung Hatta bukan urang Minang. sahinggo sacaro hukum kakarabatan matrilineal baliau bukan urang Minang (ambo taingek nasib Zainuddin dalam novel Buya Hamka, " Tenggelamnya Kapal van der Wijk"). Reaksi ambo pribadi adolah: iyo sabana konservatif urang awak ko, sahinggo sakadar foto Bung Hatta bapakaian datuak sajo dipasoalkan, padohal ambo yakin bahaso baliau mamakai pakaian datuak tu sakadar manghormati pamintaan pak Harun nan maagiahkan saparangkek pakaian adat tu ka baliau. Sapanjang pangatahuan ambo, jarang sakali Bung Hatta manulih atau manampilkan diri sabagai urang Minang, walau jaleh sakali bahaso caro bapikia dan budaya baliau sacaro pribadi adolah Minang 100 %. Bung Hatta kan jauah labiah gadang dari sakadar status datuak nan salingka kaum, suku, jo nagari sajo. Karano tu, walau mulonyo ambo satuju jo patuang Bung Hatta bapakaian datuak sakadar untuak manunjuakkan Bung Hata tu urang awak, namun maingek sikap pribadi Bung Hatta nan jarang sakali tampil sabagai urang Minang, apolagi sabagai urang adat ayau datuak, dan maingek pulo bahaso baliau adolah tokoh nasional nan jadi co-Proklamator basamo Soekarno, akhirnyo ambo satuju agar patuang Bung Hatta ditampilkan bapakaian safari saparati nan ado kini di Bukit Tinggi. Sampai di siko dulu Al. Wassalam, Saafroedin Bahar
-------------------------------------------------------------- Website: http://www.rantaunet.org ========================================================= * Berhenti (unsubscribe), berhenti sementara (nomail) dan konfigurasi keanggotaan, silahkan ke: http://rantaunet.org/palanta-setting * Posting dan membaca email lewat web di http://groups.yahoo.com/group/RantauNet/messages dengan tetap harus terdaftar di sini. -------------------------------------------------------------- UNTUK DIPERHATIKAN: - Hapus footer dan bagian yang tidak perlu, jika melakukan Reply - Besar posting maksimum 100 KB - Mengirim attachment ditolak oleh sistem =========================================================