Assalamualaikum w.w.Al, Ado carito nan barangkali paralu ambo tambahkan. Wakatu Brigjen (saat itu) Poniman manjadi Pangdam III/17 Agustus di Padang dulu baliau diangkek sabagai 'Payung Panji' dek LKAAM. Sahubungan jo itu, ado permintaan sakalompok pamimpin Minang kapado baliau untuk basadio diagiah gala 'datuk' . Sudah tantu sacaro pribadi baliau maraso sanang jo kahormatan tu, tapi sabalun manarimo baliau minta waktu dulu untuak bapikia, dan mulai mancari informasi dari sagalo macam sumber tantang baa posisi 'datuk' tu dalam masyarakat Minangkabau.
Sasudah baliau tahu bahaso gala 'datuk' tu adolah samacam pangurus kaum atau suku nan dilewakan di tingkek nagari, dan indak ado posisi nan jaleh dalam kasaluruhan struktur masyarakat Minang sabagai suatu kasatuan, sacaro sopan baliau mamutuskan untuak indak manarimo tawaran tu. Untuang sikap baliau tu bisa dimangarati dek para pangusul. Kapado ambo sabagai staf baliau, baliau mangatokan: "Kalau saya terima, posisi sosial saya sebagai datuk akan menjadi lebih kecil dari posisi sosial saya sebagai Pangdam". Ambo raso baliau batua juo, apolagi karano --manuruik LKAAM Sumbar -- ado sabanyak kl 60.000 (anam puluah ribu ) datuak di Sumatera Barat, jadi rato-rato saratuih tiok nagari, nan sadonyo 'tagak samo tinggi dan duduak samo randah'. Jadi sacaro sosial pasti indak ado datuak tingkek provinsi, datuak tingkek kabupaten dan kota, atau datuak tingkek kacamatan. Ambo juo bapikia-pikia, di ma kadilatakkan gala dan posisi 'datuak honoris causa" dalam kasalaruhan masyarakat Minangkabau nan indak punyo supra struktur di ateh nagari. Kalau di Malaysia, rajo-rajo Malaysia banyak maagiah gala kahormatan 'Tan Sr'i, 'Datuk' atau 'Datin' untuak sagalo macam urang nan bajaso atau nan paralu diagiah kahormatan, indak ado kaitannyo samo sakali jo kaum atau suku. . Sakadar sabagai parbandingan, urang Batak indak maagiah gala 'Raja Batak' nan basifat genealogis ka sia sajo. Mareka maagiah namo marga kapado urang-urang tartantu, baiak nan batali malalui pakawinanan atau sakadar untuak kahormatan dan untuak mambantuak hubungan kakaluargaan. Manuruik adat Batak Toba, mareka nan diagiah gala itu bukan sajo berhak mamakai namo marga tapi juo diagiah sabagian dari tanah warisan di marga barunyo itu. Contoh nan terkenal: aktivis Angkatan 1966 Harry Tjan, kini banamo langkok Harry Tjan SILALAHI dengan hak panuah. Kalau di urang awak, gala kahormatan tu kan indak ado sampiran hak apo-apo. Sampai di siko dulu. Wassalam, Saafroedin Bahar. -------------------------------------------------------------- Website: http://www.rantaunet.org ========================================================= * Berhenti (unsubscribe), berhenti sementara (nomail) dan konfigurasi keanggotaan, silahkan ke: http://rantaunet.org/palanta-setting * Posting dan membaca email lewat web di http://groups.yahoo.com/group/RantauNet/messages dengan tetap harus terdaftar di sini. -------------------------------------------------------------- UNTUK DIPERHATIKAN: - Hapus footer dan bagian yang tidak perlu, jika melakukan Reply - Besar posting maksimum 100 KB - Mengirim attachment ditolak oleh sistem =========================================================