Assalamu'alaikum wr.wb.
Luruihlah jalan Payokumbuah
Basimpang jalan ka Biaro
Dimalah hati ndak ka rusuah
Ai..ai.. takana juo
Ai..ai.. ayam den lapeh
Pagaruyuang Batusangka
Tampek bamain nak urang Baso
Duduak tamanuang tiok sabanta
Ai..ai.. takana juo
Ai.. ai.. ayam den lapeh
Sikua capang sikua capeh
Saikua tabang saikua lapeh
Lapeh lah juo nan ka rimbo
Ai lah malang juo
Itu labiah kurang pantun dari lagu ayam den lapeh nan dipopulerkan dek Nurseha di awal tahun anam puluhan, katiko ambo masih sakola di SR di Koto Tuo Balai Gurah Ampek Angkek Canduang. Katiko sadang bakacamuak parang PRRI.
Dek angku Patiah mamanciang-manciang mah. Batua, Biaro tu adolah 'dakek' kampuang ambo. Pintu kalua dari kampuang ambo kalau ka pai marantau, baiak ka lalu ka Kiktinggi atau ka baputa langsuang ka arah Pakan Baru. Talatak 7 kilo labiah duo ratuih meter plus dari Bukiktinggi ka arah timur, samantaro kampuang ambo Koto Tuo Balai Gurah tu 1400 meter dari Biaro ka arah salatan, kaarah kaki gunuang Marapi. Biaro ko ibunagari kacamatan Ampek Angkek Canduang (dulu, kini Candung alah malapehan diri).
Talatak di tapi jalan kuretapi Bukiktinggi Payokumbuah. Sampai tahun tujuah puluahan masih ado kuretapitu lalu lalang. Katiko ambo sakola di SMA 3 Birugo taun 69, jo kuretapi ko ambo barulang pai sikola. Katiko kureta alah mancuit dari arah Kiktinggi, tadanga cuitno tu sampai ka kampuang, bagageh kami jago, mandi, basegeh-segeh, sudah itu bajalan kaki ka Biaro, untuak naiak kureta taruih ka pasa ka Bukiktinggi.
Kiro-kiro sapuluah kilo dari Biaro arah ka Payokumbuah, sabalun nagari Padang Tarok, ado bagian jalan nan sangaik bana luruih, ado kiro-kiro tigo ampek kilometer. ikolah agakno nan manginspirasi lagu 'luruihlah jalan Payokumbuah' tadi. Disuok kida adolah sawah tahampa. Jauah ka salatan, atau kasabalah suok kalau awak manuju Payokumbuah tampak gunuang Marapi. Di bagian utara adolah bukik-bukik kapua rangkaian pagunuangan Bukik Barisan.
Taun 64 ado bencana alam tanah longsor, di kampuang Aia Angek sabalah utara dari jalan ka Payokumbuah tu manyimpang dari Padang Tarok. Katiko itu pai kami, murik SMP 3 Tanjuang Alam mancaliak tampek bencana alam tu, naiak kuretapi sampai ka Padang Tarok tu.
Nan kuretapi, katiko ambo pulang kampuang partamu kali dari tanah Jawa tahun 74, indak ado lai doh. Sajak itu, jalan no pun baransua-ransua di timbuni urang, stoplatno batuka manjadi lapau/kadai, stasiun manjadi kadai kopi atau rumah makan.
Tapi jalan luruih ka Payokumbuah masih ado juo lai disinan.
Wassalamu'alaikum wr.wb.,
Lembang Alam
darul <[EMAIL PROTECTED]> wrote:
amry1948 writes:
>> Luruihlah jalan Payokumbuah , Basimpang jalan ka Biaro , Kuruihlah
> badan dek taragak , eh lah malang pulo . Oh ya Biaro tu dima pulo tu
> sanak Zulhendrif ?
>
>
> Wassalam : zul amry di jimbaran bali
Assalamualaikum WW
Biaro adolah kampuangnyo mak Lembang Alam tuh. Tiok hari
baliau naiak kureta api pai sikola ka Kiktinggi di Biaro
tu, pasti banyak kenangan mak Lembang tuh.
Wassalamualaikum WW
Darul van Fort De Cock
St. Lembang Alam
Do you Yahoo!?
New Yahoo! Photos - easier uploading and sharing
_______________________________________________ Berhenti/mengganti konfigurasi keanggotaan anda, silahkan ke: http://groups.or.id/mailman/listinfo/rantau-net _______________________________________________
