Lapau Mak Kari : Astagfirullah.! By padangekspres, Minggu, 28-Maret-2004, 21:30:29 WIB
Lah tigo legaran kampanye balansuang di sagalo palosok nagari di negara awak ko. Saminggu lai pesta demokrasi ka balansuang di nagari tacinto. Sagalo tingkah laku jo kurenah juru sorak partai alah kito caliak di tipi, kito baco di koran. Batabua janji jo harapan. Dek nan mandanga baitu pulo, lah raso di bibia tapi cawan. Ado nan mambagi-bagikan kepeang di tangah lapangan. Untuak mayakinkan urang banyak, ado pulo nan sarupo bintang filem India, manangih di ateh pangguang sambia basumpah ateh namo Allah. Nan manjua parasaian diri dek karano maraso disisiahkan dek induak samang gadangnyo ado pulo. Sudah tu nyo balagu, manyindia induak samangnyo. Gayanyo indak kalah kalau dibandiang artis, pakai kaluang bungo bagai. Nyo badendang di ateh pangguang, urang bajamua matohari. Ado nan bacakak sadang kampanye, padohal warna baju nan dipakainyo samo. Ado nan masuak rumah sakik, dek karano pangguang tampeknyo basorak taban ka bumi alias runtuah. Nan juru sorak, calon pucuak pimpinan nagari awak tu bausaho tanang, mancaliak-an ka urang banyak bahaso inyo bisa mangandalikan diri, indak tapangaruah dek parasaian nan ditangguang dek rakyaik nan datang untuak kaparaluan tujuan politik sang calon Presiden. Mungkin manuruiknyo, kok masuak rumah sakik dek kampanye, itu namonyo pengabdian. Pengorbanan kader-kader alah diganti jo sa-gantang-duo gantang bareh, tambah saketek pambali rokok. Sudah tu, apo nan tajadi beko dietong, nan paralu kampanye taruih jalan. Udin Kirun sadang tamanuang di Lapau Mak Kari. Mukonyo merah kahitaman. Karuik kaniangnyo batambah banyak. Dulu sabaleh, kini duo baleh. "Ba-a tamanuang bana Din ? Sarupo urang takanai baragiah nampak dek den," Mak Labai manyapo Udin. "Inyo sadang kanai berang dek kumandan Partainyo tu mah. Jan digaduah bana," solo Mak Kari. "Eeeh.ba-a kok sampai baitu," sambuang Mak Labai. Udin indak manjawek, angoknyo sajo tambah gadang, tangannyo manjangkau rakik maco. "Nan den danga, dunsanak awak ko kanai buransang dek Ketua Partainyo. Dalam kampanye, Udin manyabuik bahaso di dalam partainyo banyak basarang urang nan indak salasai, koruptor atau urang maliang gadang. Sudah tu, Udin dinilai indak lai manjua program Partai, tapi labiah banyak mampopulerkan dirinyo surang," sambuang Mak Kari. Udin nan sadang dipakecek-an indak basuaro. Rakik maco nan di tangannyo alah habih saparo. Mukonyo sabak, matonyo bakaco, bantuak urang manahan hati. Muluiknyo manggarik, tapi indak ado kalua suaro. Dek mancaliak Udin sarupo urang tasapo, Mak Labai mulai sungguah-sungguah batanyo; "Atau.Udin mulai cameh indak ka tapiliah isuak?" Muko Udin tambah karuah, aia mato mailia dari suduik matonyo. Mak Kari mulai cameh maliek si Udin nan salamoko suko mancaricau, kini hanok sarupo urang bisu. "Miraa.Tolong ambiak panyambua den di ateh pagu.., mungkin inyo tasapo." Tibo-tibo Udin manggaruang-garuang; "Kabau deen.Tanah deen.Rumah Mintuo deen.Tandeeeh." Indak lamo antaronyo, incek matonyo ma-merah. Bulu matonyo batambah panjang. Mukonyo babulu. Tangannyo baitu pulo, labek dek bulu. Kuku tangannyo tambah lamo tambah panjang. Talingonyo ma-manjang, bantuak talingo setan..! Mak Kari tapakiak.."Syetaaann.!Syetaaan..! "Mak Kari.Mak Kariii.Jagolah.Hari alah ampia Maghrib..Jan laok juo laii..! Mira mahoyak badan Mak Kari nan sadang manggigau. Mak Kari tagulenjek, nyo bae mangucap"Astaghfirullahal 'Adziiim..! Mimpi den kironyo.." (yudi) Padang Ekspres Online : http://www.padangekspres.com/ Versi online: http://www.padangekspres.com/mod.php?mod=publisher&op=viewarticle&artid=2393 0 ____________________________________________________ Berhenti/mengganti konfigurasi keanggotaan anda, silahkan ke: http://groups.or.id/mailman/options/rantau-net ____________________________________________________
