Assalamu'alaikum wr.wb., Mangko Z,
Soeharto katiko itu sabana urang bagak. Sabana urang santiang nan indak talok dek sia juo doh kamalawan. Tahun 78, mahasiswa Banduang, tarutamuno mahasiswa ITB tarang-tarangan manulak Soeharto jadi presiden untuak nan barikuik kalino. Jo caro elok-elok, sambia mangana-an nan bahaso awakno alah duo kali limo tahun mamarentah, sampai jo caro nan labiah kareh jo demo. Akibaikno katiko itu kampus ITB diduduki tantara, katua DM no sarato panguruih DM ditangkoki dek anak buah Soeharto. Nan paliang sadiah bana sajak itu DM seluruh Universitas di bekukan jo Normalisasi Kehidupan Kampus (NKK). Mako abihlah 'parlawanan' mahasiswa tu katiko itu. Takana pulo di ambo, katiko kamuloi ka bakarajo di tampek ambo bakarajo sampai kiniko di tahun 80 awal. Calon pagawai tu di screening daulu dek petugas security nan adolah tentara nan diagiah pakaian sipil. Ado formulir nan harus diisi nan didalamno ado tanyo tantang sia namo inyiak jo enek awak bagai. Ado tanyo tantang sia pamimpin nan jadi idola awak. Ambo takana katiko itu manjawab, pamimpin nan jadi idola ambo Rasulullah, jawek ambo. Habih ambo diinterogasi jo tanyo macam-macam sasudah itu. Sambia diansuano saketek-saketek maarahkan. 'Rasulullah itu talampau ideal tu,' kecekno. Nan manusia biasolah, kecekno pulo. Ambo jawab Rajo Faisal dari Arab Saudi, sakadar manjawab-jawab sajo. Banyak pulo tambah tanyono. Nan urang Indonesialah, jano. Ambo jawab Bung Hatta. Nan lain pado itu? Nan masih aktif kini? Ambo jawab indak ado. Bangih patugas security tukang screening tu. Sampai maancam. 'Sampeyan bisa dinyatakan tidak lulus, dan bisa tidak jadi bekerja kalau sampeyan menjawabnya masih main-main,' kecekno. Ambo jawab, saya tidak main-main. Saya menjawab sejujurnya. Soal diterima atau tidak, itukan ibaraik urang manggaleh, ambo ka manjua tanago. Parusahaan ko ka mambali tanago. Kalau paralu dino ambo, bajadi. Kalau indak, indak baa pulo doh. Kalau bapak merasa bisa menggagalkan saya untuk bekerja ya silahkan, jawek ambo pulo. Katiko itu umua alun tigo puluah lai doh jadi lai juo agak nekaik saketek. Kasudahan kaji, tatap juo ambo ditarimo, bakarajo sampai kini. Sasudah itu tiok sabanta ado juo screening tu. Biasono ambo paele-elean baitu sajo, walaupun kadang-kadang, untuak maimaik tanago ambo iyo-iyoan juo sakali-sakali. Datang pulo katiko urang musti mancucuak Golkar bahkan manjadi anggota Golkar. Nan tarakhirko dek massal, tamasuak juolah ambo kadalam. Tapi nan pakaro mamiliah, iyo alhamdulillah, alun panah lai doh. Cuma, itu. Amboko bukan urang fulitik. Eh, baa dek panjang lo jadino goh? Itu sajolah dulu. Wassalamu'alaikum wr.wb., Lembang Alam --- Z Chaniago <[EMAIL PROTECTED]> wrote: > Assalamu'alaikum Ww > > Hahahaha.....bukan berarti urang lain bodoh kan > untuak ndak malawan...., ===== St. Lembang Alam __________________________________ Do you Yahoo!? Yahoo! Photos: High-quality 4x6 digital prints for 25¢ http://photos.yahoo.com/ph/print_splash ____________________________________________________ Berhenti/mengganti konfigurasi keanggotaan anda, silahkan ke: http://groups.or.id/mailman/options/rantau-net ____________________________________________________