Assalamu'alaikum wr.wb.,
Manolah rang lapau nan basamo, iyo panjang ota pakaro emansipasi ko
iyo. Walau samantaro nampakno alah agak taduah hujan, bialah satolo
ambo turun.
Kok buliahlah awak bacamin, rasono iyo kasabanyak awak tantu sajo
bayang-bayang. Iko ambo cubo marantang-rantangan camin,
untuang-untuang buliah paukua panjang bayang-bayang awak
masiang-masiang tantangan suasana hubungan laki jo binyi:
Di Bali, kecek nyiak Sunguik. Ado induak-induak nan bakuhampeh
bakarajo kareh, manembok, manyimin, maangkek batu ka parumahan
samantaro nan jantan-jantan pai maadu ayam, manyanang-nyanangan ati.
Kok manang baampok mungkin lai juo dibagino saketek ka induak bareh di
rumah. Namun sadono urang tau, nan namono ampok sapuluah kali kalah,
sakali manang. Ndak ampok ko nan ka kito singguang, tapi contoh nan
sarupo iko, iyolah contoh zalim jo pasiak. Laki-laki nan mampabiaan
urang rumahno bakarajo kareh sadangkan awakno indak mau tau jo urusan
nafkah rumah tanggono adolah laki-laki zalim. Kalau sampai atino
mangarajoan sarupo itu, iduik indak batangguang jawab, indak ado
istilah lain salain zalim namono. Padusi nan amuah bakarajo kareh
mambantiang tulang sudah itu maagiahan pulo asia pancariaanno cako
kapokok ampok di lakino, jaleh pasiak, aratino bodoh sangaik, alah tau
bahaso ampok pasti kamaabihan sajo namun indakno nak kamalawan. Baa
mangkono amuah sajo? Dek lah jadi adaik kabiasoan? Dek lakino gagah
sangaik? Apopun alasanno indak ado nan bisa ditarimo aka sihaik.
Ado pulo laki binyi nan bakarajo. Samo mangakeh kateh kabawah.
Panghasilan mungkin samo banyak. Pangaluaran diatur pulo basamo.
Sabanano bana, kok misal surang laki sajo nan bakarajo lah kacukuik
panghasilan untuk iduik sadang elok. Tapi kadipangaan, nan padusi
awakno sarjana pulo, pandai pulo, tapakai pulo karajono. Lalu baa.
Disiko banyak simpang jalan.
Nan partamu, nan padusi, lai pandai mambagi waktu, suami sarilah-rilah
hati maijinan, dan nan istri lai sangaik pandai pulo manjago diri.
Awakno sabana bakarajo sajo, dijagono bana martabat dirino jan sampai
dilecehan urang. Dijagono pulo tangguang jawabno sabagai istri dalam
rumah tanggo. Layanan ka suami tatap prima, indak panah sakali juo
mandareh mangecek kalaki, Anak-anak tatap diparatianno pulo. Kalau
untuak ukuran "dunia" rasono nan sarupo iko buliahlah.
Nan kaduo, nan padusi indak mau tau lai jo urusan rumah tanggo dan
kasadoanno disarahan bulek-bulek ka pambantu. Di laki indak manjadi
masalah bana, pokokno masiang-masiang sibuak sahinggo indak ado wakatu
untuk mauruih nan remek-temek. Pakaro makan indak sarik, bisa
marantang, atau bali ka lapau, atau pai makan kalua. Urusan anak-anak
nan basangkuik jo pitih indak ado masalah. Kasiah-sayang kaanak labiah
banyak di etong jo pitih, jo pamenan, jo uang bulanjo atau paliang
amuah jo pai raun basamo akhia minggu. Iko mungkin buliah juo namun
cameh awak saketek jo anak-anak. Acok kali indak di sangko-sangko
kirono paja-paja lah talibaik jo NARKOBA. Sudah tu ka manga awak lai.
Nan katigo nan padusi kaja-kajai kian kamari. Karajo dikaja, rumah
dikaja. Acok kali kateteran, nan ditampek karajo jadi masalah jo
induak samang, nan di rumah jadi masalah jo laki. Acok tajadi
patangkaran laki binyi dek karano masiang-masiang indak bisa saliang
mangarati. Anak-anak biasono lah katompangan bangih, alah agak gadang
saketek jadi maleh no dirumah dek acok amek ribuik. Iko agak
"nyerempet-nyerempet", amuah-amuah babaia utang, amuah sikua
capang-sikua capeh.
Nan kaampek padusi labiah santiang pado laki. Gajino labiah gadang.
Dek karano itu lantehlo anganno kalaki sainggo laki nan mati kutu. Di
rumah ano nan boss, nan mamarentah, nan bakuaso, laki lah nyanyua
dibawah tunjuakno dan indak kurang pulo kanai badai jo etongan tiok
sabanta. Iko narako dunia untuk nan laki-laki dan mularaik pulo
mungkin isuak di akhirat. Sabab nan laki-laki sabagai pamimpin indak
balaku, joa kadijawab isuak tanyo tantang tangguang jawab mamimpin
kaluargako.
Nan kalimo nan padusi iyo santiang bakarajo, lai sakadar horomaik ka
laki, lai amuah mamparatian anak, tapi ado ciek. Capek amek akrab jo
sado urang. Pargaulan ko moderen amek. Walau mungkin indak sampai
manga-manga bana tapi dari galenjeh tiok ari murah urang salah sangko.
Di lakino iko bana nan acok diingekan tapi indak juo kunjuang barubah.
Lamo lambek amuah mandakek juo pitanah, atau mungkin juo tajadi
serong. Kok tajadi nan baitu balabo galeh dunia akhiraik.
Cukuiklah sampai iko sin dulu contoh nan laki-binyi bakarajoko walau
sabanano amuah sakaranjang gadang contoh kasus.
Ambiaklo contoh nan lain.
Surang padusi nan sarjana juo, nan panah bakarajo lalu dapek jodoh.
Sudah kawin dek nan laki-laki ditawari supayo baranti bakarajo dan
awakno manarimo. Jadilahno jadi istri atau ibu rumah tanggo sajo dan
iko ditarimono dengan ikhlas. Iyo bana diusaoanno untuak aktif di
rumah sarato di kagiatan sosial saizin laki. Indak balabiah dino ari
doh, muloi dari manyiapkan sarapan pagi untuak kaluarga, mauruih
rumah tanggo nan tanyato banyak sangaik pulo serino, mauruih anak,
mauruih balanjo , kudian mauruih pangajian ibu-ibu. Nan labiah
pantiang bana di rumah awakno adolah lawan diskusi atau katampek
barundiang bana dek lakino dalam hal apo sajo muloi dari urusan tetek
bengek, rumah tangga, sosial, agamo, urusan karajo laki di kantua.
Kasadoanno salalu "nyambuang" salalu manyalasaian masalah. Dari
pangajian no baraja bahaso istriko harus patuah jo taat ka laki, iyo
bana langsuang pulo diamakanno. Indak panah manyarengeh, indak panah
malawan, salalu manjadi panyajuak mato dek lakino. Alhamdulillah nan
laki-laki iyo urang nan sabana dapek pitunjuak pulo. Sayang bana ka
binyi. Indak panah manyakikan hati binyi, indak ceke, indak suko main
kalua, indak paminun, taat baibadah. Dek karano acok badiskusi, untuak
hal mano nan padusi sangaik luas pulo wawasanno, kadang-kadang timbua
juo emosi, jadi juo sarupo urang batangka, tapi salalu salah surang
labiah capek istigfar dan mintak maoh sainggo indak panah jadi
pacakakan. Barangkali padusi sarupo contoh ikolah nan "bagaikan hanyo
tigo rukun Islam dino, namun ano buliah masuak sarugo barisuak dari
pintu mano sajo nan disukoino".
Sakali lai iko babarapo buah camin. Cubolah tenok bana nama kiro-kiro
nan buliah dikecekan santiang sarato cocok jo awak.
Sakitu sajo dulu kapanambah ota di lapau, alah panjang amek.
Wassalam,
Lembang Alam
http://lapau.rantaunet.web.id
=================================================
WEB-EMAIL GRATIS ... @rantaunet.web.id ---> http://mail.rantaunet.web.id
=================================================
Subscribe - Mendaftar RantauNet Mailing List, kirimkan email
Ke / To: [EMAIL PROTECTED]
Isi email / Messages: subscribe rantau-net email_anda
Unsubscribe - Berhenti menerima RantauNet Mailing List, kirimkan email
Ke / To: [EMAIL PROTECTED]
Isi emai / Messages: unsubscribe rantau-net email_anda
=================================================
WebPage RantauNet http://www.rantaunet.web.id dan Mailing List RantauNet
adalah servis dari EEBNET http://eebnet.com, Airland Groups, USA
=================================================