At 1:53 PM +0000 6/19/00, [EMAIL PROTECTED] wrote:
>namo ambo sabananyo Yudi Febrianda, kuliah di
>antropologi unpad semester 8
>asal ambo dari saniangbaka, di tapian danau singkarak
>
Saniangbaka, dakek Panyinggahan.
Mandanga Saniangbaka ko takaca pulo sumbek pangalaman lamo di maso mudo
sisuak. Dalam bulan September 1958 ambo panah samalam di Saniangbaka dalam
pajalanan ambo di Kampouang-kampuang kuliliang kabupaten Solok. Mungkin
Angku Yudi alun lia lai wakatu itu. Tapi kok ado urang gaek-gaek nan masih
takana carito pangalaman di Kampang wakatu itu dapek diinterview juo untuak
panambah oral history angku sabagai mahasiswa antropologi.
Nan kaduo kali, dalam tahun 1998 ambo sempat pulo singgah sabanta ka
Saniangbaka pai ka rumah saurang kawan bini ambo. Baliau dipanggiakannyo
Ajo nan bakarajo di Pukesmas Solok. Tadinyo inyo samo-samo sikola jo bini
ambo di Akademi Parawatan Banduang. Ambo lupo namo langkok baliau. Kok lai
bakatahuan tolong sampaikan salam ambo.
Baliak pangana ambo ka tahun 1958. Ambo datang maerak-erak dari arah
Gunuang Talang, dari Nagari-nagari Aia Angek (tapi kamouangnyio sabana
dingin), Batu Kuali, Bukik Karangbuku, Koto Anau, Batupingai, Padang Dama,
Cupak, Talang. Sudah manyaksikan urang parang basosoh di dari kampuang
Batu Kuali, mancaliak rumah-rumah urang di bagian ateh nagari Talang
diunggun tantara Sukarono kami cubo manaruihkan pajalanan ka arah Utara.
Dari Nagari Talang denganpatunjuak urang rundo kami malinteh jalan ka arah
Gantuang Ciri, malalui Sungai Sirah, Bandagadang jo Bangkuang. Sudah
bamalam di Gantuang Ciri maerak ka rimbo di ateh Koto Hilalang, mamutuih
mandakibukik-bukik jo rimbo-rimbo ka Aia Lasi, Apa, mancogok di Aia Hilang
di Muaro Pingai di Tapi Danau Singkarak. Bisuaknyo ambo lakik juo pai ka
Panyinggahan sakadar mancaliak maninjau kaadaan nagari tu. Sudah tu baliak
ka Saniangbaka.
Malamnyo, di Saniangbaka, sadang ambo maagiah ciramah di satu Musajik di
Saniangbaka tu (panuah musajik samalam tu dek karano ado urang pajalan nan
datang dari jauah ko). Sadang ambo baiyobana mangecek, tibo-tibo kami
tapaso "ijok" karano dapek info tantara Sukarono maojok-ojok datang dari
Simpang Sumani. Para pangunjuang musajik dengan aman dapek pulang ka tampek
masiang-masiang. (Pangalaman ko sarupo jo di Cupak saminggu sabalunnyo.)
Dari musajik Saniangbaka ambo dilarikan Urang Rundo ka Tapi Danau, dikawal
dianta taruih samalam tu diam-diam maojok-ojok malinteh malereng ka Nagari
Singkarak. Dari Singkarak, diam-diam manjalang subuah kami malinteh naik
bukik ka Aripan. Pagi-pagi tu kami balapeh angah di Aripan, manganaang
pajalanan kami, mancaliak daerah Singkarak jo Saniangbaka jo Sumani
malintehkan pamandangan ka daerah Solok dan bukik-bukik jo rimbo bagian
Selatan nan kami tampuah sabalunnyo...
Dalam pajalanan ambo kama-kamanyo wakatu itu, sampai kini ambo sangat
batarimo kasih jo para patugeh satampat tamasuak jo Bupati, Camaik, Kapalo
Nagari dan Panduduak dan Tapatan nan setia ka sadonyo nan manyambuik dan
manjago kami kama pai. Labiah-labiah lai ambo batarimo kasih ka Urang Rundo
dari sagalo kampuang nan ambo rancah nan mangawani kami sacaro estafet kama
kami pai dari Palembang, Lubuk Linggau, Bangko dan diberbagai tampek daerah
Sumatera Barat dan Tapanuli Selatan tanpa maraso jariah payahnyo talampau.
Kami dijago saaman-amannyo, diandokkan disambunyikan kalau paralu, dianta
sampai ka tujuan satempek-satampek salangkah-salangkah. Ransel ambo malah
biasonyo ditolong mambawonyo.
Karano ambo indak tahu masiang-masiangnyo Urang Rundo tu sampai kini,
dengan namo Allah ambo mandoakan mudah-mudahan usaho baliau masiang-masiang
sarato jariah payahyno maantakan kami di tampek-tampek babahayo tu dapek
dilimpahi Allah Subhanahuataala dengan dengan pahalo nan
satinggi-tingginyo. Dari jauah di Subarang Lauik Basa di Subaliak Bumi ambo
doakan ka baliau-baliau nan masih hiduik ataupun nan alah dahulu dari ambo.
Amiiin ya Rabilaalamiiin.
Untuak selingan. Wakatu di Saniangbaka tahun 1958 tu ambo dapek pantun ciek
dari Ruang Rundo nan lai takana juo sampai kini.
Singkarak jo Saniangbaka
Katigo jo Tanjuang Bingkuang
Lah sarak mangko manyasa
Binyi cadiak disangko binguang ...
Salam,
Sjamsir Sjarif
Santa Cruz, California, USA, 19 Juni 2000
X____________________________ Sjamsir Sjarif
Indonesian Translator and Cultural Consultant
Tel. (831)-426-1333 Fax (831)-426-8907
Email: [EMAIL PROTECTED]
Web Page: http://www.usindo.net/hambo
************************************************************
LAPAU RantauNet di http://lapau.rantaunet.web.id
Isi Database ke anggotaan RantauNet:
http://www.egroups.com/database/rantaunet?method=addRecord&tbl=1
=================================================
WEB-EMAIL GRATIS ... @rantaunet.web.id ---> http://mail.rantaunet.web.id
=================================================
Subscribe - Mendaftar RantauNet Mailing List, kirimkan email
Ke / To: [EMAIL PROTECTED]
Isi email / Messages: subscribe rantau-net email_anda
Unsubscribe - Berhenti menerima RantauNet Mailing List, kirimkan email
Ke / To: [EMAIL PROTECTED]
Isi emai / Messages: unsubscribe rantau-net email_anda
=================================================
WebPage RantauNet http://www.rantaunet.web.id dan Mailing List RantauNet
adalah servis dari EEBNET http://eebnet.com, Airland Groups, USA
=================================================
