At 11:10 AM +0700 6/19/00, Henri Alia Putra wrote: Kalau buliah ambo tau data mamak , supayo ambo indak talonsong beko. Henri Assalamu’alaikum wr.wb., Sanang ati mandanga ungkapan sarupo iko, “supayo ambo indak talonsong beko”. A bana arati talonsong ko. Di nagari awak Minangkabau, di biasokan masarakaik sacaro adat supayo masiang-masiang individu tau di’ampek’. Tau dijalan mandaki, tau dijalan malereang, tau dijalan mandata, tau dijalan manurun, di dalam pargaulan saari-ari. Nan dimukasuik jo jalanko adolah caro raso jo pareso, caro babaso basi dalam tingkah laku maupun mamakai kato-kato dalam pargaulan. Ado jalan nan mandaki, jalan dima awak tau bahaso awak nan labiah mudo, nan labiah junior dan dipakailah tatakrama nan labiah sopan kapado nan labiah tuo. Nan labiah tuoko bisa sajo tuo diumua, karano memang urang tuo awak, mamak awak, kakak awak, etek awak, mak tuo awak dan sabagaino. Jaleh indak pado tampekno kalau awak kaba’ang’ kaba’gau’ sin kabakeh baliau. Jaleh bahaso awak indak buliah mandareh, manyarempeang sajo kabakeh baliau. Jaleh indak buliah awak man’den’ sin mangecek sambia bakacak pinggang kabakeh baliau. Tuo tu bisa juo, walaupun mungkin umua aluan tantu labiah tuo, tapi urangno dituokan sacaro adaik, misalno, pangulu, datuak, angku palo, panjabaik, alim ulamo, cadiak pandai dan sabagaino. Ado jalan nan malereang. Aratino jalan dima awak paralu sagan manyagani. Misalno jo ipa-bisan, jo tetangga. Caro malereangko dapek juo diaratikan agak manjago jarak, manampekan diri ditampek nan sadang elok. Indak dakek amek sainggo indak tau bateh, indak jauh amek sainggo indak mau tau. Ado jalan mandata. Ikolah jalan basamo gadang. Dijalan ikopun tatap juo paralu dijago jan sampai tapakai garah kudo, garah nan kalamak diawak tapi sakik diurang. Dek karano adaik basamo gadang, buliahlah awak kok kabasabuik namo, kok kabawaang – kabawakden, tapi tatap juolah didalam jalur tatakrama nan patuik. Kudian sakali jalan nan manurun. Jalan bababo basi jo nan labiah mudo nan tatap manggunokan alua jo patuik. Indak buliah pulo sabaliakno dari nan nomor satu cako samantang awak mamak, samantang awak, kakak, samantang awak pangulu kecekko lapeh sin kabawah. Mangecek jo nan labiah mudo tatap juo didasari jo sopan santun, jo kasiah sayang. Mako ikolah mungkin paedah dari ketek banamo gadang bagala, aratino ka nan ketek diimbaukan namo ka nan gadang disabuikkan gala supayo takana diawak ado jalur jo rambu-rambu. Talonsong cako aratino talanjua mamakai jalan nan salah, tapakai jalan mandata, padohal andakno malereang atau mandaki. Talanjua maraso samo gadang, padohal baliau nan dilawan maota lah sapangkek jo inyiak awak. Tatakrama nan saketekko iyo gadang juo mampaaikno walaupun bukan baarati ado tingkek-tingkek atau kasta dalam pargaulan di Minang. Baitu juo andakno nan rancak dalam pargaulan awak di lapauko tatap juo awak mamakai alua jo patuikko, raso jo paresoko. Mudah-mudahan bamanpaaik diawak nan basamo taushiah nan saketekko. Wassalamu’alaikum wr.wb., Lembang Alam ------------------------------------------------------------ Free Web-email ---> http://mail.rantaunet.web.id Minangkabau WebPortal ---> http://www.rantaunet.web.id LAPAU RantauNet di http://lapau.rantaunet.web.id Isi Database ke anggotaan RantauNet: http://www.egroups.com/database/rantaunet?method=addRecord&tbl=1 ================================================= WEB-EMAIL GRATIS ... @rantaunet.web.id ---> http://mail.rantaunet.web.id ================================================= Subscribe - Mendaftar RantauNet Mailing List, kirimkan email Ke / To: [EMAIL PROTECTED] Isi email / Messages: subscribe rantau-net email_anda Unsubscribe - Berhenti menerima RantauNet Mailing List, kirimkan email Ke / To: [EMAIL PROTECTED] Isi emai / Messages: unsubscribe rantau-net email_anda ================================================= WebPage RantauNet http://www.rantaunet.web.id dan Mailing List RantauNet adalah servis dari EEBNET http://eebnet.com, Airland Groups, USA =================================================