Bismillaah, Ar-Rahmaan, Ar-Rahiim.
(Dengan atas nama Allah, yang Maha Pengasih, yang Maha Penyayang).
Dunsanak hambo di balerong nan sadang basanang-sanang dan santai sambie
minun kopi. Ba'a kaba ? Insya Allah, lailah segeh (sihat wa al-fiat) dan
murah rasaki halal andaknyo. Kami nan di Aceh nan kiniko terkenal jo
"syariat islam"-nya, al-hamdulillaah, lai elok-elok sajo dan insya Allah,
selalu baitu satariuhnyo.
KONDISI UMAT ISLAM DI MINANG DAN ACEH KINIKO
Kiniko sacaro umum, syariat islam di Aceh, iyo alun bajalan doh. Nan ado
taruih, isu-isu diterapkannyo syariat islam tu, alun jaleh ba'a dan bilo ka
dijalankannyo. Tentang Islam, urang-urang Aceh tu sabanano iyo gadang
fanatiknyo kok soal ilemu, indak banyak juo nan ka diarok. Al-hamdulillah,
awak di Ranah Minang buliahlah awak kecekkan "urang-urangno banyak nan
ta'at daripado nan fanatik". Tapi kok awak bandiang-bandiangkan kaduonyo,
raso-rasonyo indak banyak bedonyo.
Ketaatan urang Minang di Ranah Minang dan kefanatikan urang Aceh di nagari
Aceh tu kiniko kok hambo raso-rasokan, sabananyo samo-samo didasari jo
kualitas ilemu nan samo-samo indak tinggi. Jadi awak taat sesuai jo
katinggian nan indak tinggi dari ilemu awak. Urang Aceh, fanatik sasuai juo
jo katinggian nan indak tinggi dari ilemu nan ado di masyarakaiknyo.
Aratinyo kok di Aceh dan di Ranah Minang tu kiniko nan tampak dek awak
masyarakaik awak kurang "basanang hati" diterapkan syariat islam atau
urang-urang pado lobiah sonang jo nan bebas sesuai jaman modern kiniko, itu
adalah dek karano Islam tu awak gunokan sabagai simbol-simbol kehidupan sajo.
Simbol-simbol Islam hampie satiok urang Minang dan urang Aceh punyo. Tiok
rumah hamba dapek berani meyakinkan diri, insya Allah, lai punyo, tapi
latakno di dalam almari. Kalau pun dibaco hanya sabateh untuk
"mempertahankan simbol" tanpa diperdulikan arati dan maknanyo. Urang awak
kok mangaji (mambaco Qur'an) iyo lai rancak suaronyo, tajwidnyo pas dan
pandai malagukannyo sampai taraso "lamak di talingo" sarupo awak
mandangakan lagu-lagu Si Tiar Ramon (Alm).
Kondisi sarupo tu mungkin banyak lah manyabaokkan umat islam awak ko indak
dapek-dapek masuak ka islam ke dalam bana. Kok pai ke masajik, awak baru
masuak di serambinyo sajo, masih sagan masuak ka masajikno. Mungkin itu
pulo sabaoknyo di Ranah Minang ado disabuikan sebagai "Serambi Makah",
sarupo sajo jo nan di Aceh, babangga-bangga jo "serambi makkah"nyo. Sajak
dulu sahinggo kini, awak umat Islam tataok di serambi sajo, alun juo lai
masuak ka masajiknyo.
TANTANGAN AWAK KE DEPAN
Manyimak trend diterapkannyo syariat islam nan semakin gencar di hari-hari
belakangan ko dan mancaliak kondisi umat Islam kini ko, hambo agak pesimis
ka berhasil. Hambo sangko labiah banyak urang nan indak perduli atau bahkan
manolaknyo daripado nan ma"iyo"kan untuk sampai dijadikan suatu
undang-undang syariat islam sahinggo dapek dilaksanakannyo di daerah-daerah
awak atau di Aceh. Akan tetapi, bagaimana pun halnyo, iko adolah satu
tantangan ka awak kasadono : "ba'a caronyo supayo syariat islam tu sabana
dapek dilaksanakan di masyarakaik awak ?"
Segalo kendala haruslah awak ketahui dan awak singkirkan. Segalo kelemahan
haruslah sugiro awak sadari dan awak pakuek. Sagalo kekurangan awak dalam
berislam sahinggo diterapkannyo merato di masyarakaik haruslah dapek awak
buik daftarnyo sahinggo dapek programkan untuk mampelo'inyo.
KELEMAHAN-KELEMAHAN KITA UMAT ISLAM
Untuak sampai seseorang nan barugamo tu melaksanakan ugamonyo, manuruik
hambo satidaknyo ado tigo tahap nan dilalui:
Tahap Partamo, IMAN:
Ugamo adolah paraturan nan dibuek oleh Allah, Tuhan Maha Pencipta.
Sabalun urang dapek melaksanakan ugamo, urang tu sabalunnyo haruslah
barIMAN ka Allah nan mambuek dan nan punyo ugamo tu. Satiok urang handaknyo
selalu beriman ka Allah, sebagai Tuhan satu-satunyo, indak ado tuhan nan
lain selain Allah. Indak ado nan paling dipatuhi selain patuah kapado
Allah. Indak ado nan paling dipicayo dapek mambari rasaki hiduik selain
Allah. Indak ado yang paling melindungi selain Allah. Indak ado nan paling
ditakui kecuali takut kepada Allah. Dan indak ado nan dapek mambuek awak
indak takuik-takuik selain Allah. Pokokno Allah-lah segalo-galonyo untuk
awak bagantuang hiduik dunia dan akhirat.
Kok alah baitu, insya Allah, siapo pun urangnyo, tantulah ka
basanang hati untuk melaksanakan peraturan-peraturan nan dibuek dan
diparentahkan Allah ka awak. Indak ka ado peraturan Allah nan ka dilangga
dek karano awak ka sadano lai tau bana sia Allah tu.
Sayangno, IMAN iko bana awak nan lamahnyo kiniko. Sagalo usaha
untuk mampelo'i IMAN ko haruslah awak buek kiniko juo. Mudah-mudahan ka ado
diskusi khusus dari awak di balerong ko "ba'a caro mampelo'i IMAN ko ?".
Tahap kaduo, ILMU:
Untuk melaksanakan segala sesuatu kegiatan diparalukan ILMUnyo dek
karano diatehnyo terdapat peraturan-peraturan khusus untuk itu. Untuk
melaksanakan Peraturan-peraturan Allah atau ugamo diperalalukan ilmunyo.
Awak disuruah shalat, haruslah tahu ba'a apo, manga, dima, oleh sia, bilo
dan ba'a caronyo shalat itu. Disurah manutuik aurat, haruslah tahu ditutuik
jo a, ba'a caro mandapekan kain panutuik aurat tu, ba'a caro mamakainyo.
Disuruh bazakat, haruslah tahu darima dapek pitih, barang, taranak dll
untuk awak zakatkan. Disuruah naiak haji, haruslah tahu dan sanggup ba'a
caronyo pai sampai ka makkah dan ba'a caronyo bahaji tu bilo sampai di
makkahnyo, dan lain sebagainyo.
Pendeknyo ILMU iko menyangkuik segala ilmu untuk mandukung awak
dapek baribadah ka tuhan awak, Allah tu. Manuruik hambo, kiniko ILMU itulah
awak nan paliang lamah dek awak. Dek karano lamah di bidang ilmu ko, awak
bakataruahan lamah di bidang ekonomi, sosial dan politik. Tanpa ILMU, awak
pastilah indak ka dapek beramal sampai nan maksimal. Beramal tanpa ILMU
hasilnyo "berkebetulan". Sedangkan ILMU tanpa IMAN, amalnyo indak
bakatantuan dan dapek babahayo ka urang dan ka diri awak surang.
Sayangno ILMU iko pulolah nan awak kiniko paling parah
tatingganyo. Segalo sesuatu mestilah awak buek kiniko agar kelemahan awak
di bidang ILMU ko dapek taratasi dengan capek dan efektif. Insya Allah,
akan ado nan namuah mambuek diskusi khusus untuk topik iko.
Tahap katigo, AMAL:
Untuk sampai berAMAL urang handaknyo punyo IMAN dan ILMU. Iman
sajo indak cukuik untuak dapek berAMAL, mungkin malah indak pernah dapek
beramal. Ilmu sajo indak cukuik juo karano indak ka tahu kama tujuannyo.
Iman jo ilmu tanpa amal itu namonyo gadang hota. Nan elok adolah, ado IMAN
diiringi jo ILMU, barulah dapek inyo berAMAL nan hasilnyo jaleh untuak sia
dan untuak apo.
Kiniko hambo picayo, sanak sadono nan di balerong ko alah cukuik
IMAN (iyo bana ?) dan ILMUnyo (iko insya Allah), "apo nan dapek awak
lakukan (amalkan) untuk supayo syariat islam tu dapek dilaksanakan di
tangah masyarakaik kito ?".
Baiklah sanak, alah banyak kecek bana hambo rasonyo, maafkan hambo yo.
Marilah awak diskusikan labiah lanjuik. Hambo manunggu baganti mangecek
dari sanak hambo kasadono.
Assalamun alaikum wa rahmatullahi wa barakatuh.
Syaifuddin Ma'rifatullah - Aceh.
---
At 10:19 28/10/00, you wrote:
>Assalamualaikum wr wb ....untuak bapak ,ibu ,mamak , etek ,uni , uda ,dan
>dunsanak kasadoannyo di Mailing list ko .....
>
>Ambo sabonenyo lah lamo ikuik bagabuang jo Milist ko ....tapi salamo ko
>kabanyakan ambo jadi pendengar setia dari group ko ....
>
>Ado kegembiraan dan kebanggaan di hati ambo sabagai anak minang .....dimano
>awak senantiasa membicarakan dan memperdebatkan tontang dua Hal yaitu agamo
>dan adat ...
>dan mapatimbangkan ma nan patuik jo nan indak patuik sarato senantiaso
>manjago tingkah laku jo parangai .Ambo yakin itu lah nan mambedakan suku
>minang ko jo suku nan lain ....
>
>Walau awak ko samo - samo dirantau ..jauh dari kampuang dan dunsanak nan
>ditinggakan....tapi awak totap mangkaji kaduo hal tersebut ....Buliah kan
>awak babangga diri sebagai urang "awak" ....?
>
>Tapi dibaliak kasadoannyo itu ...ado nan tapikian dek ambo ciek ...
>Sabonenyo urang Minangko iyo ndak bisa dipisahkan dari agamo dan adat ..
>Ibarat kulik jo dagiang ....apobilo kulik lah bapisah jo dagiang iyo bakilo
>haragonyo lai ....
>Jadi baa kalau samo - samo usulkan sajo di minangkabau ko di berlakukan sajo
>syariat Islam ....?
>Sasuai jo firman Allah nan artinyo : Masuklah engkau kedalam islam dengan
>sebenar-benarnya ......
>
>Ambo yakin dan picayo banyak urang awak nan satuju tontang hal iko ......
>
>Sagitu dulu dari ambo sabagai pambukak kato .....dan maharok tanggapan dari
>dunsanak kasadoannyo dan semoga Allah SWT senantiasa meridhoi setiap langkah
>yang kita tempuh ....
>
>Wassalamualaikum wr wb
>
>/rinalvi /Jakarta /th lahir 1970
>
Mailing List RantauNet http://lapau.rantaunet.web.id
Database keanggotaan RantauNet:
http://www.egroups.com/database/rantaunet?method=addRecord&tbl=1
=================================================
Mendaftar atau berhenti menerima dari RantauNet Mailing List, kirimkan email
Ke / To: [EMAIL PROTECTED]
Isi email / Messages, ketik pada baris/kolom pertama:
- mendaftar: subscribe rantau-net [email_anda]
- berhenti: unsubscribe rantau-net [email_anda]
[email_anda] = isikan alamat email anda tanpa tanda kurung
=================================================
WEB-EMAIL GRATIS ... @rantaunet.web.id ---> http://mail.rantaunet.web.id
-------------------------------------------------------------------------------------------------
WebPage RantauNet http://www.rantaunet.web.id dan Mailing List RantauNet
adalah servis dari EEBNET http://eebnet.com, Airland Groups, USA
=================================================