Rang Rantau di Palanta Yth, Partamo-tamo, ambo minta maaf kok Dunsanak kasadonyo manilai dan maraso kurang lamak atau indak manakah ambo minta tolong sarupo iko lewat net awak ko. Tolong ambo diagia tau. Tapi rasonyo, untuak basamo-samo manunjang parawisata di kampuang, ambo maliek indak ado salahnyo. Sungguah pun baitu, ambo sadar bahaso bisa sajo ambo maraso baitu karena ambo nan minta tolong! Bialah bacarito ambo saketek latar balakang kegiatan ambo ko. Tiok taun ambo kan pulang ka Padang mambao mahasiswa ambo dari Australi baraja bahaso Indonesia sacaro intensif di UNP. Program tu diadokan dari patangahan bulan Desember sampai ujuang bulan Januari. Taun-taun kabalakang ko, program tu batapekan pulo jo Ari Rayo. Jadi, pai lah ambo mancaliah-caliak tampek wisata di kampuang awak nan salamo ko iyo awak banggakan, paliang indak tampek nan tasabuik-sabuik sabagai objek wisata Sumbar, kan baitu. Tapi, iyo sangek takajuik ambo mancaliak tampek tu. Kumuah, indah tajago dan indak bajago. Sanak nan lai pulang kampuang tantu lai mancaliaknyo pulo. Pantai Padang, Taman Nirwana, Benteang di Bukik Tinggi, Panorama, Musium di Pagaruyuang, dan lain-lain. Di Taman Nirwana, takuik awak mamijak pantainyo rasonyo. Nak menyensengkan sarawa awak rasonyo bajalan di situ. Sarok dima-ma. Ambo cari-cari tong sampah di sinan. Ciek basuo di ambo nyoh. Alah mambaludak pulo, jaleh bana alah lamo indak dicampakan saroknyo. Di Benteang baitu pulo. Sampai ambo ambiak foto-foto sarok dan lah mambusuak di Benteang tu. Di tapi danau maninjau, banyak restoran nan kumuah, lari salero dinyo makan di sinan. Alun tampek ka balakang lai.Dan lain-lain, dan lain-lain. Dan urang nan datang ka objek wisata tu musti mambayia pulo. Iyo ibo ati ambo, Sanak. Dan ambo acok mambaco di koran Padang, dalam konteks reformasi ko, salah satu harapan Sumbar adolah pariwisata. Ambo yakin bana, kok ado pengunjung nan datang sakali, mancaliak kasadonyo tu, indak ka nio inyo datang baliak salamo iduiknyo. Ambo raso inyo indak ka marekomendasikan tampek awak ka dunsaka jo kawan di kampuang nyo. Jadi, takana dek ambo. Salah satu cari maiduikan pariwisata di kampuang awak adolah marancang kegiatan wisata yang ditujukan untuak manikmati alam Minangkabau, bukan tampek-tampek turis standar. Mako ambo cubolah mambuek paket ko, bakarajo samo jo Natrabu di Padang. Wisata alam sarupo alun banyak lai do. Kok Sanak kasadonyo maraso ada eloknyo untuak Sumbar, khususnya bidang wisata, ambo minta tolong manyampaikan kaba ko ka kawan, kenalan Sanak di mancanegara ataupun di Indonesia. Dibao mereka tu bajalan kaki jo naiak kareta angin di paluakan gunuang-gunuang Minang mungkin manariak mereka. Ambo alah mengecekan pulo ka kawan di Natrabu supayo tampek istirahat jalan kaki supayo dilangkoki jo WC dan lain-lain. Mereka tu alah satuju. Parincian kegiatan wisata ko ambo lampirkan (attachment). Kok ado rasonyoa nan berminat di sakiliang sanak untuak mancubonyo, tolonglah diagiahkan e-mail ambo: [EMAIL PROTECTED] Tarimo kasih banyak-banyak dan maaf kalau ambo talampau lancang manggunokan rantau-net untuak iko. Salam, Ismet
West Sumatra Mountain Adventures.doc
Dr Ismet Fanany
Convenor, Language and Culture Studies
School of Australian and International Studies
Faculty of Arts
Deakin University
221 Burwood Highway
Burwood, Victoria 3125
Tel: (61-3) 9244 3936
Fax: (61-3) 9244 6755
E-mail: [EMAIL PROTECTED]
