Assalamualaikum warahmatullah wabarakatuh.
Dunsanak kasadonyo, iyo ibo jo bangih hati hati awak mandanga berita aib dari kampuang
awakko, walau di tampek lain masih jauah dari labiah sahinggo dek labiahnyo bagi
urangnyo lah ndak masalah pulo lai. Awak iyo masih basyukur, masih diagiah parasaan
nan bana dek Allah sarupo malu, heran, bangih kalau tadanga nan salah jo nan senjang,
contohnyo sajo anak urang nan manumpang sikola katampek awak sajo nan dipaso batuka
akidah, bangih jo heboh gadang awak. Dan dari situ pulo awak tau halko lah tajadi juo
di tampek lain, tapi ndak saheboh awak. Tapi awak tantu buliah juo heran, baa masalah
jua bali zina ko ndak dari dulu diekspos urang awak, nan dimulai sajak awal kalua rok
mini tahun 70an dulu. Padohal awak lah tau juo hukuman zina dalam agama awak labiah
barek dari mancilok pitih bakaruang-karuang.
Iyolah rang awak, tabuktilah sudah dipiciak urang tanyato iyo labiah sakik, kok
dibaliak ka carito lamo awak (mancabiak baju di dado tantang sifat rang awak
http://groups.yahoo.com/group/RantauNet/message/5092) diekspos urang baru heboh. Dalam
masalahko walau malu kada awak nan tasuruak disingkok-an urang, paralu juo awak
basyukur ado baritako, untuak awak dalam mancaliak diri awak sabananyo, kalau ndak
disabuik tantu haniang sajo, hinggo awak ndak tau bahaso awak bapanyakik. Ado nan aneh
dalam masalah ko, apakah dek kebebasan pers hinggo beritako dinasionalkan, atau dek
adat awak nan basangkuik Islamko, atau hanyo samacam gebrakan aparat dalam
menyalasaian masalah masyarakat. Manga berita aib di kampuang awakko kok manarik bana,
walau banyak bana nan labiah dari awak. Tapi lah jaleh beritako mambuek awak berang,
bukan ka urang nan mambaritokannyo tapi ka keadaan nan tajadi di kampuang awaktu.
Wajar kalau awak banyak nan bangih dalam masalahko, kalau ndak mangana nan bana dan!
hanyo manuruikaan raso berang iyo bisa tajadi bantuak nan dunsanak sadonyo sabuikkan.
Kalau ditanyo ka ambo mungkin iyo ado taniek nan buruak di ambo, nak dapek aidslah
para pezina tu, dikutuak jo panyakik nan takutuak. Ambo satuju jo pandapek dunsanak
nan lain manga ndak awak pakuek sajo akidah awak jo dunsanak awak dalam manantang
akidah sasek jo karajo aib-aib tu, iko tantu batua, karano memang sagalo harus dimulai
dari bawah dulu. Tapi disitu pulolah dituntuik raso tangguang jawab umat/awak basamo
walau ndak ado nan tajadi dalam kaluarga awak, jadi memang iyo ndak sakadar mancagah
raso malu awak sajo, karena akibaiknyo saketek banyaknyo katurunan awak suatu wakatu
kanai gatah juo.
Kalau diambiak palajaran dari siko nan basangkuik jo adat, katiko lah tajadi sarupo
iko, tanyato baru taraso di awak, adat Minang yo talalu rancak untuak awak, hinggo
ndak suai lai. Katiko paga agamo ndak diacuahkan lai alias urang ndak religius lai
hinggo sanksi agamo atau sangsi adat batuka jo sangsi hukum, kironnyo sangsi hukum nan
dipicayoko sifaiknyo bafluktuasi pulo.
Prostusi di kampuang awak, ndak hanyo manyemba nan dibawah sajo tapi banyak juo nan di
ateh, tapi mungkin dek caronyo nan profi dan rapi ndak ado nan sampai tajariang,
paliang kurang ndak heboh. Nan heboh kan kalau nan marakyattu.
Makin marakyatnyo urusan zina tu mungkin juo dek hukum ekonomi juo, samakin tinggi
permintaan tantu barang nan tasadio samakin harus banyak. Biasonyo barangtu hasil
import sajo, tapi dek permintaan samakin tinggi dan hiduk makin susah juo tantu tapaso
memakai barang dalam negeri sendiri, kalau ndak banyak nan kamambali lai kamungkin
urang namuah bajojo sajo.
Manuruti ambo istilah tuna (Wanita tuna susila) disiko ndak tapek lai karano talalu
manis untuak karajo buruaktu, labiah tapek wanita tak bersusila, wanita penjaja seks
atau wanita jalang sarupo dalam carito dijaman balai pustaka. Kalau awak kaji
sabab-sabab manga tajun baragam pulo. Manjadi WTS dek dialasankan untuak mambali bareh
atau susu anak, ambo indak yakin. Batua juo alasan untuak pambali gincu, sapatu, tas,
telepon ganggam nan bamerek lua nagari. Tapi itu hanyo sakadar untuak malapehan salero
apo nan babaun lua nagaritu wah, karano itu nan moderen keceknyo.
Ado juo mulo-mulo akibat pagaulan bebas, kecelakaan, sudahtu tajarumuih, sudahtu lah
payah untuak kalua. Namun dari sadonyo itu, tajun ka prostitusi manuruik ambo labiah
tapek hanyo dek akibaik lanjutan sajo. Agamo nan ditampuangnyo dari ranggaek, dari
lingkungan, yo lah kurang bana, ditambah sikap permisif urang gaek dilangkoki jo adat
nan lah lungga alias kontrol masyarakat indak ado lai, dan dipajadi pulo dek hiduik
susah. Mako langkaplah semuanya.
Prostitusi manuruik sajarah iyolah karajo (usaho) manusia nan paliang tuo. Dima-dima
jadi masalah ndak di Barat ndak di Timur. Kalau awak baco dan danga berita, misalnyo
di Japang banyak anak sikola nan sangajo manjua diri untuak sakadar pambali sipatu
bamerek, atau di Rusia dengan alasan untuak mambali mode dari barat, atau labiah parah
pulo lai di Ukraina nan anak gadihnyo banyak nan bacito-cito jadi Prostitusi supayo
bisa pai ka Barat.
Kalau di dunia Barat kebanyakan nan tajarek di dunia prostitusiko, ko tantu indak
tamasuak nan sukarela doh, kebanyakan anak mudo nan alah tajarek dek narkotik/ubek
bius/sabu-sabu, dek tasasak untuak pambali ubektu, mako tantu prostitusi adolah salah
satu jalan untuak itu, dan tidak jarang pulo iko di sangajo dek para mafia untuak
malakukan galehnyo, dengan caro manjarek para remaja supayo kecanduan
Nan bisa awak ambiak dari contoh-contoh ko adolah antaro lain, nan di negara maju
mungkin dek ulah mode, tiru-tiruan, urang mancubo awak nan mancubo pulo, kok di negara
nan manangah yo dek ulah maningadah ka ateh sajo, mungkin juo dek ulah globalisasi
kecek urang sahinggo apo nan tampak di barat tu elok, rancak dan indah sajo sadonyo,
sahinggo untuak mancapainyo mako ditampuahlah sagalo caro. Kok nan sakik hiduik tu mah
katonyo dek sakiknyo mako coitu.
Kalau awak simak pulo di Jawa, misalnyo di Sragen jo gunung Kemukusnyo, malah dunia
maksiatko kabanyo majadi pandapatan pemerintah daerahnyo melalui retribusi, baco
MajalahForum Edisi Tahun VIII no.49 19 Maret 2000, sayang indak bisa dicigok lai
diinternet, tapi kok ado nan alun mambaco dan baniaik nan mambaconyo bisa ambo fwdkan.
Konon urang nan baziarah ka makam pangeran Samudra di bukik Kemukus, nan tantu sajo
mambaia karicih retribusi masuak kasinan, akan kurang samparono kalau indak bazina
disinan doh, …Nauzubillah. Dan nan manyakik bagi awak nan panjago kubua tuo alah haji
pulo baliau dek mambaco doa di situ. Kalau iko di kaji mungkin indak ado hubungannyo
jo awak doh, tapi paralu juo awak ambiak sebagai pelajaran. Maaaf sajo ambo indak
mambukak kada urang ko doh, tapi adolah sabagai contoh dek lamahnyo aparat, kontrol
masyarakat dan lingkungan sekitarnyo, dek ulah ditolerir dari dari dulunyo mako kini
tantu indak mungkin/atau akan susah malarangnyo. Alasannyo banyak na!
n tasangkuik hiduiknyo jo praktektu. Awak nan takuik kalau hal sarupo iko kalau indak
capek awak atasi, mako lamo-lamo akan bisa juo nagari awak mangarah kasitu . Jadi
untuak itu ambo mahimbau awak sadonyo marilah kito mulai.
Saran-saran nan kamungkin untuak paambek maksiat diantaronyo, tantunyo bak kecek mamak
Dave Saib mulailah dari lingkungan awak dulu. Awak mulai dari diri awak, urang rumah
awak, anak jo kamanakan awak, suku awak, kampuang awak, dstnyo.
1. Kontrol dipaketat :
a. Kontrol rang gaek atau niniak mamak
Kalau ado nan babuek jangga/salah indak salah kalau awak kecekkan ka mamak, ninik
mamaknyo atau urang nan disaganinyo, sabalun masalahko lapeh ka nan rami, karano awak
samo tau hukum masyarakat tantu labiah kejam misalnyo dikuciakan sajo alah mambuek
kalimpasiangan.
Dikecekkannyo kamamaknyoko bisa labiah mangkuah karano dunia yolah dakek ka kiamaik,
anak lah banyak palawan ka urang gaeknyo, hinggo ranggaek kinilah banyak takuik jo
anaknyo sorang, disampiang dek talalu sagan ka anaknyo ndak talok managahannyo lai.
Caro bodoh mandidik anak jo mampalakuan sagalo kandak anak nan tanpa selektif akhianyo
manjadi budaya permisif, paralu ditinggakan.
Alasan maapa tampek kawan apolai sampai bamalam paralu juo disalidiki, kawan nan ma,
dima alamatnyo, lai saulah parangai kawannyo, dsbnyo. Anak mudo kini memang pareman,
untuak itu awak salaku urang gaek/mamak harus labiah pareman pulo handaknyo, jan
sampai awak mudah sajo diparemani anak/kamanakan.
Bagi nan bakamanakan di kampuang tantu ado rancaknyo acok juo pulang kampuang atau
diparingek-i kalau rawan tagaliciak, atau dibaok bana kamanakantu untuak basikola.
Piliahkan sikola nan ndak ado/banyak pangaruah paremannyo. Bagi anak kamanakan nan
kost, ditompangkan jaleh-jaleh kaurang punyo rumah atau acok juo dijanguak ka
pondokannyo.
b. Kontrol masyarakat/adat
Dalam rangko amar makruf nahi mungkar ndak salah kalau ado karajo salah nan nampak di
mato awak sarupo judi zina awak laporkan ka aparat/polisi untuak ditindak. Untuak Buya
ndak ado salahnyo karajo salahko disindia jo macam-macam caro ditiok pangajian, baiak
di wirid kaum ibu/bapak atau anak mudo. Wirid anak mudo dihiduikkan baliak, temanyo
salain urusan tujuan hiduik, moral, salain itu diisi juo jo nan padek-padek untuak
manunjang baka maso depannyo. Ndak dipungkiri kiniko, banyak anak-anak nan agak lamah
maraso bosan basikola dan maraso kabua pulo mancaliak maso depannyo.
Karano aparat lah manawarkan pulo manangani aibko, bereaksilah awak jo sangsi adatlai
kalau ado nan babuek salah. Kalau nan zina kinitu (atau nan manggaleh ubek biustu) baa
kalau diagiah sangsi batingkek mulo-mulo disabuik-an namonyo sajo dulu, sudahtu
pasfotonyo, sudahtu sabuik-an ranggaeknyo, kalau mada juo kapalang barandam nak malu
bana sabuik-an sukunyo, kalau ndak juo, baru kampuangnyo. Caro bantuak ko alun
manga-manga jo syariat Islam lai.
Jan ragu pulo awak jo HAM tu karano di Inggrispun sebagai contoh alah dikarajokan
urang juo mampublikasikan urang nan babuek jaek (urang nan manyaalahgunokan anak-anak)
dikoran, sahinggo sipelaku dek maraso malu sampai bunuah diri bagai.
Sukses sangsi nan kini manantuan salanjuiknya, kalau ndak kareh dari kini bisa
batea-tea nantinyo. Kapado nan punyo wewenang tolonglah pacapek Ranperdatu jadi PERDA,
jan ditunggu-tungu juo lai, beko matah pulo baliak.
2. Tampil beda
Dalam bapakaian untuak urang rumah jo anak padusi awak, paralu juo dikomentari kalau
pakaiannyo ndak patuik dibaok katampek nan rami. Nan heran awak, gaya urang
baiak-baiak kini ndak bisa bana dibedakan jo urang ndak indak elok lai, samo sajo
gayanyo. Antah sia nan mampangaruhi sia. Urang baiak-baiak tantu ndak kabapakaian
maniru prostitusi doh, karano awak tau, ndak prostitusi sajo nan dilarang,
bagaya/bapakaian menyerupai prostitusi juga dilarang dalam Islam misalnyo bacukua alis
mato (dari sebuah Hadis), bamikap sampai 2 kilo, 10 meter lah tabaun minyak arunnyo,
dll. Kalau gaya ndak juo dibedakan, tantu mereka seakan dapek angin, dan itu barati
manyokong.
Walau pakaian jadi nan indak patuik banyak dijua, indak salah awak galakkan/modekan
baliak bapakaian sopan nan anggun/elegan tarutamo nan padusi, nan akan manandokan
sabagai wanita baiak-baiak. Nan ma nan bapakaian indak patuik, paralu disapo.
3. Pasan jo nasihaik dari rantau
Bagi sanak awak nan dirantau kalau pulang kampuang atau lewaik surek, ndak salah kalau
dipasankan hati-hati jo trik-trik nan mangicuah atau mampadayo jaman kini nan lah
mulai pulo masuak-ka kampuang awak, mulai dari mancari tanago padusi gadih untuak
karajo di restoran di Batam dan kep. Riau misalnyo atau ka Malaysia. Nan iko malahan
nan manggaritih awak, kadang-kadang sato pulo urang kampuang jadi calonyo. Trik
lainnyo (ko memang indak ado hubungan jo topik awakko doh) mangalipekaan pitih,
disuruah mangirim pitih takaja melalui rekening ndak dikenal dengan apopun alasannyo,
cek dulu kabanarannyo; manuka barang ameh/ringgik ameh alias ganti model atau tuka jo
batu cincin nan kiramaik/mata uang arab; atau urang ndak dikenal takaja manyalang
pitih diganti jo cincin misalnyo, dan banyak juo nan lain. Sebahagian urang kampuang
awak memang masih bodoh, mudah dikicuah urang, iko paralu awak sadari.
4. Jan tiru-tiruan. Sahubuangannyo jo otonomi, sado nagari balomba-lomba nak manjua
nagarinyo jo pariwisata. Atau memang kalau ka dibuka juo, jan sakali kasadonyo, cukuik
nan ado dulu, karano alun sado masyarakat awak siap mentalnya manarimo pariwisata.
Bisa jadi ndak si turis nan kamaniru budaya awakdoh, anak nagari nan kamaniru gaya si
turistu. Ingek juo untuak daerah wisata/taman-taman dibuek satabukak mungkin, jan
dibuek basamak nan maundang raso romantis. Sudahtu palakukan jam bukak/tutuiknyo, alun
bakalam lai lah harus batutuik.
5. Basugirolah untuak mampalakian anak kamanakan nan alah cukuik umua, dan batamu
jodohnyo, atau pajodohkan kalau alah patuik rasonyo, apolagi kalau ndak ado nan
mangawasinyo, tarutamo bagi nan rawan tagalincia.
6. Bapikia dulu saribu kali kalau anak/kamanakan padusi awak dilamar urang lua,
terutama nan lain akidahnyo, walau bajanji masuak Islam dulu, baru kawin. Tugeh awak
paliang kurang sato manyalamaikkan akidahnyo.
7. Mampakuek akidah.
Karajoko ndak hanyo karajo guru mangaji tapi karajo awak sadonyo, dimulai dari awak
sebagai rangtuo, kaji nan ditarimo dari rangtuo dulu lah ndak cukuik, paralu ditambah
melalui buku-buku agama nan suai pulo jo tuntutan jaman nan makin jahiako. Tugeh
rangtuo manyampaikan ka anak/kamanakan awak surang, samakin capek diajaan samakin
rancak. Kecek urang, kalau lah dari ketek anak lah diaja jo agamo atau diajari jalan
nan bana, kalau lah gadang kok nyampang tasasek jalan bana, paliang kurang lai tau nyo
jalan pulang.
8. Maningkekkan pandidikan
Sikola nan padek ketrampilan nan batua-batua baguno dibangun di kampuang-kampuang,
supayo anak kamanakan awak ndak paralu pai ka kota gadang, tampek nan rawan maksiat
nan alun katalok jo mental nyo, apolai kalau indak ado nan maawasinyo
Sakian dulu dari ambo, mohon maaf dek panjang bana curito ambo dan juo kok ado nan
indak tapek dalam panyampaian ambo,
wabillaahi Taufiq wal Hidaayah
Wassalamualaikum warahmatullah wabarakatuh
Sutan Sati Batuah
Subarang tabek maco
------------------------------------------------------------
Bergabunglah dengan Free Email @mimbarminang.com
Klik berita terbaru ranah minang di http://www.mimbarminang.com
RantauNet http://www.rantaunet.com
Isikan data keanggotaan anda di http://www.rantaunet.com/register.php3
===============================================
Mendaftar atau berhenti menerima RantauNet Mailing List di
http://www.rantaunet.com/subscribe.php3
ATAU Kirimkan email
Ke/To: [EMAIL PROTECTED]
Isi email/Messages, ketik pada baris/kolom pertama:
-mendaftar--> subscribe rantau-net [email_anda]
-berhenti----> unsubscribe rantau-net [email_anda]
Keterangan: [email_anda] = isikan alamat email anda tanpa tanda kurung
===============================================