Tulisan sanak "Jo Angek" tantang Pariwisata cukuik manggalitik ambo untuk manulih hal nan lah lamo pulo manjadi parhatian ambo. Kekhawatiran ambo indak dek resiko-resiko tu sajo doh, tapi labiah mampatanyokan iyo lai sabananyo tapek mangatokan pariwisata tu sabagai salah satu unggulan pengembangan ekonomi Sumbar dengan budaya Minangnyo sarupo nan sering disabuik dek pejabat2 di Sumbar tu? Baa dek baitu? Pariwisata pada dasarnya adalah bisnis jasa/pelayanan. Kalau soal rancak nagari nan ka dicaliak urang, indak nagari awak se nan rancak doh. Urang nan pai malancong tu, inyo kan paralu kasangangan dek disanangkan. Di urang Minang nan babudaya egaliter ko, indak ado doh raso paralu manyanangkan urang to doh sabab diurang Minang balaku pameo : O kayo nyo awak indak kamaintak doh, o santiang nyo awak indak ka batanyo doh. Tagak samo tinggi, duduak samo randah. Kok ditinggikan sarantiangnyo, kok didahulukan salangkahnyo . Nah, dengan latar belakang budaya nan sarupo tu, baa ka maharokkan urang nan bisa mambarikan pelayanan yang memuaskan pelancong sebagai pelanggan. Bukti nyatonyo, pailah ka lapau atau rumah makan, lai awak manarimo pelayanan nan bisa manyanangkan urang. Memang ado keakraban caro awak, tapi lai bisa tu manyanangkan urang nan asiang jo caro awak tu. Apo lai kalau babicaro tantang palayan do hotel atau panginapan. Di urang awak, urang nan manginap di hotel atau panginapan tu indak urang nan ka basanang-sanang doh, tapi adolah urang nan kamalaman nan dipalakukan sabagai pasakitan. Ambo acok maagiah panataran nan mamaki tampek di babarapo hotel di Sumbar. Palayanannyo iyo sabana minta ampun. Labiah rancak awak makan dilapau-lapau ketek atau di los lambuang dari pado makan di hotel-hotel tu. Pado satu kali ambo maagiah panataran tu ka sanak2 kito dari wartawan di salah satu hotel rancak nan talatak di puncak bukik nan bapamandangan sangat indah, tapi sadonyo mangaluah tantang pelayanannyo, baiak makan-minumnyo maupun palayanan kamarnyo. Katiko ambo tau hotel tu manyadiokan minuman sorbat, ambo iyo lah nio malapehkan taragak jo minuman kampuang ambo tu. Tapi katiko ambo mamasan minuman tu, pelayannyo mangatokan, sorbat indak adoh pak, tapi bandreks lai. Kecek ambo, samonyo tu, badreks tu namonyo di Sunda. Katiko inyo manawarkan pakai talua, ambo iyokan. Tapi katiko pasanan tu datang, ondek mak, minta ampun ambo. Nan sorbat tu dingin, kuniang taluanyo marapuang se di dalam sorbat tu, rasonyo indak ado saketek juo bau jahenyo doh. Iyo mambaliak-baliak paruik deknyo. Nan palayan tadi hilang antah ka ma. Ambo kecekkan, ikolah bukti/kenyataan nan acok disabuik sabagai kaunggulan Sumbar tu. Sudah tu, kok iyo Sumbar ka maunggulkan pariwisata tu, rasonyo awak alun mandanga baa bana master plan pariwisata ko di Sumbar. Nan ado baru usaho-usaho lapeh dari babarapo pengusaha nan indak mambarikan manfaat lansuang ka masyarakat. Hampir di satiok objek wisata nan rami dikunjuangi, indak ado doh sesuatu dari karajinan masyarakat setempat nan bisa dibao urang sebagai kenang2-an dan panambah penghasilan anak nagari tu. Indak ado doh nan mandorong masyarakat untuk manyadiokan apo nan khas dari daerah tu untuk dijua ka palencong. Caliaklah di Ustano Pagaruyuang, Tabek Patah, Maninjau, Puncak Lawang, atau kama sajo tampek nan banyak dikunjuangi turis. Pado hal indak ado doh aratinyo pariwisata tu sacaro ekonomi kalau indak diiringi jo partisipasi masyarakat setempat untuak manyadiokan/manjua hasil karya, kapandaian atau jasonyo. Supayo jan dikecekkan awak cuma bisa manggarutu se, ambo punyo usul : Dinas Pariwisata nan lah ado kini, cubolah baiyo-iyo bana awak mainventarisir apo bana nan ka awak jua dari masyarakat dalam kaitan pariwisata ko. Bantuak baiyo-iyonyo bisa dalam bentuk seminar nan malibatkan seluruh komponen masyarakat. Iko seminar nan batua2 batuka pikiran, indak untuk sakadar untuak mandanga khotbah angku2 nan sadang mamacik se doh. Seminar tu handaknyo bisa manghasilkan suatu rencana dan keputusan konkrit, indak sakadar kumpulan pandangan sajo doh. Sagitu dulu sakadar pambuka pangana. Kok panjang bana, beko dikecekkan ambo bakhotbah pulo. Wassalam.
RantauNet http://www.rantaunet.com Isikan data keanggotaan anda di http://www.rantaunet.com/register.php3 =============================================== Mendaftar atau berhenti menerima RantauNet Mailing List di http://www.rantaunet.com/subscribe.php3 ATAU Kirimkan email Ke/To: [EMAIL PROTECTED] Isi email/Messages, ketik pada baris/kolom pertama: -mendaftar--> subscribe rantau-net [email_anda] -berhenti----> unsubscribe rantau-net [email_anda] Keterangan: [email_anda] = isikan alamat email anda tanpa tanda kurung ===============================================