Mak Band & Dunsanak Rantaunet,
Hadis badalia kato bamisa, kok hadis apolah ka dalia, kok kato apolah kamisa
dimisakan nan bak ayam panaiak, bago dihalau jo tangkelek, mato tapico
kukuak tibo lah batenggek sajo mako ka-tau
Baa kini lai, alah sataun duo taun cukuik taun nan katigo nan lah bak ayam
putiah, dima lasuang disinan tampak, tiok sabuang tiok bakukuak dek tuah
sisiak nan elok, tido kukuak nan tak ma-alahkan, mako tasabuik si ayam
putiah pamenan galanggang nan bajuaro, pamenan anak rajo2
Mak Band di Bogor, alumni petropolis.
(eh... gala kito ma-arah2 samo, ambo Malin Bandaro, kok mak Band apo garan?
Kadang2 dari gala bisa ditakok sukunyo, apoko iyo mak Band Piliang -
(Pilihan (para) Hyang-pilihan para dewa) pulo?
Itulah dek Mak band, kok dikampuang "Ma-angkek pangulu sakato kaum" Pangulu
nyo bapangkek datuak, dirantau ? Itulah nan marusuah dek saya. Saisuak
kutiko sumangaik sadang namuah, indak ado labuah nan golong nan indak
bajalani, indak ado jalan nan pasa nan indak batampuah, indak ado mujilih
nan indak sahamparan duduak, indak pulo balai(rung) nan tidak sato jo
rundiang, nan bak ayam kukuaknyo panjang, ikua malepai awan putiah.
Dek urang nan banyak lai sakato, diangkek pangulu sakato kaum, sajak nan
mudo ka nan tuo, indak taetong gadih jo biay lah samo ba "mamak" urang
kabakeh ambo, manyo urang nan banyak, dietong candonyo padi, dibutia ciek2
tasabuik sanak jo kamanakan, baiak nan datang dari luhak nan 3 sampai
pasisia panjang sahinggo rantau nan laweh nan badomisili di Petropolis
umumnyo nan tagabuang dipaguyuban "Piliang Maimbau" pado khususnyo, tapi
samantang pun baitu, ditiliak langgaman adat ditimbang aluran cupak, cupak
buatan rang piawai mareco ukunannyo adia, indak buliah balabiah kurang,
pihak "imbauan pangulu" nan lah tibo, duduak tamanuang badan ambo sipat
mananti kito daulu.
Baa ruponyo kini, dek lamo ba-kalambek-an, lah 10 rayo hinggonyo kini, duduk
nan tidak bakesong lai, tagaknyo disinan juo, lakeklah gala "Pangulu
Piliang", mak pangulu urang imbaukan baiak nan tidak sasuku sarumpun
Piliang, kununlah pulo lai sasuku, talabiah urang sumando samo tidak namuah
katinggalan samo maimbaukan
Baa mangko marusuah, disabuik pangulu tapi indak bapangkek datuak, kabau
balun babantaikan, darah balun baserakan, panji payuang kabasaran tando
urang gadang bapangiriang balun bakambangkan, ditulak indak tatulak, mailak
indak tailakan, lah tibo sajo mako taraso, tapi sungguahpun baitu baban lah
tibo kabahu, didagang sajo salagi takao dijalankan sajo dima tibonyo salagi
badan lai baraso sehat2 sajo, insya Allah
Wasalam
ABP Malin Bandaro
"Pangulu Piliang"
Ketua Umum Piliang Maimbau di Luhak Sakai Petropolis
-----Original Message-----
From: [EMAIL PROTECTED] [mailto:[EMAIL PROTECTED]]
Sent: Wednesday, January 16, 2002 1:44 PM
To: Arman Bahar
Cc: '[EMAIL PROTECTED]'
Subject: Sakai Mandau (Re: [RantauNet] GEBU MINANG)
Mancaliak gala dibawah, io batanyo dlm hati.
Apokoh Malin Bandaro diangkek pangulu dek Luak Sakai Mandau ???
Kok iyo, lai buliah kami dapek caritono ???
Wass
mak Ban
Bogor Asinanpolis
RantauNet http://www.rantaunet.com
Isikan data keanggotaan anda di http://www.rantaunet.com/register.php3
===============================================
Mendaftar atau berhenti menerima RantauNet Mailing List di
http://www.rantaunet.com/subscribe.php3
ATAU Kirimkan email
Ke/To: [EMAIL PROTECTED]
Isi email/Messages, ketik pada baris/kolom pertama:
-mendaftar--> subscribe rantau-net [email_anda]
-berhenti----> unsubscribe rantau-net [email_anda]
Keterangan: [email_anda] = isikan alamat email anda tanpa tanda kurung
===============================================
