Assalamu’alaikum Wr. Wb, Untuak sanak,uda/uni,apak/amak RN sadonyo,
Maaf, kalau kesannyo sarupo manggurui, tapi indak ado mukasik saketek juo. Mancaliak pakambangan susana balerong nan kito harapkan manambah raso persaudaraan antaro kito sasamo urang minang, hari ka hari manjurus ka arah debat nan indak sehat dan malah dari kasus panggugek nan di “black list” dari balerong ko, ambo sacaro pribadi kurang simpatik jo caro pihak moderator, walaupun sacaro pribadi pulo ambo kurang suko masalah nan kito diskusikan (agamo jo keyakinan individu) mamancing ka arah kritikan-kritikan nan kurang sehat. Untuak itu ambo nan masih mudo iko maminta usul supayo untuak waktu kamuko 1. Labiah elok awak mandiskusikan ka hal-hal ado mamfaatnyo bagi kito rang minang sadonyo, tarutamo jo masalah kultur, sosial,ekonomi dan politik rang minang nan alah taimbas jo globalisasi iko. Baa supayo bangkik baliak batang nan tarandam tu?. Baa supayo sopan santun nan ado dalam budaya kito tabangkik baliak, urang santiang nan bamoral dan relegius sarupo urang dulu bisa hiduik baliak. Baa supayo raso persaudaraan kito tambah arek. Baa supayo urang nan miskin di kampuang atau di rantau bisa tatolong, dst. Barangkali, labiah rancak itu nan paralu awak diskusikan di balerongko basamo-samo untuak mancari solusinyo. Tantu indak sakedar jo diskusi di balerong sajo. Harus ado aksi tindak lanjutnyo. Kalau indak, NATO namonyo tu. (NATO =not action talk only). 2. Jikalau ado kato-kato dari salah satu sanak kito nan nuansanyo negatif dan kurang etis rasonyo, cukuik di paelok sajo, tanpa harus mamutuih daya kreasi dan hak intelektual sanak kito nan lain. Ijanlah tajadi pulo gaya-gaya para pamimpin Jawa nan feodal dari nan suko manyingkir-nyingkirkan urang nan indak sapaham. 3. Untuak sanak nan suko jo gaya bahaso nan acok maundang kontraversi pemahaman urang lain saeloknyo dipakurang, sabab tantu indak mungkin pulo kito mamaksakan jalan pikiran awak samo jo urang lain, khususnyo nan banuansa religius. Agamo buliah samo, tapi pamahaman dan kaimanan kito tantu ado nan babeda dan tiok pribadi awak pulo nan akan mampatangguang jawabkannyo di hadapan ALLAH. Tapi, ijan pulo sampai kayakinan kito, kito paksakan ka urang lain. Bukankah agamoko untuak urang nan bapikia dan ambo raso tiok urang tantu punyo jalan dan kamampuan pikia nan babeda pulo. Ambo raso sakitu sajo nan takana. Bilo ado kato-kato nan kurang pas atau pantas mohon dimaafkan sajo. Wassalam =fendi KOTO= -- GMX - Die Kommunikationsplattform im Internet. http://www.gmx.net RantauNet http://www.rantaunet.com Isikan data keanggotaan anda di http://www.rantaunet.com/register.php3 =============================================== Mendaftar atau berhenti menerima RantauNet Mailing List di http://www.rantaunet.com/subscribe.php3 ATAU Kirimkan email Ke/To: [EMAIL PROTECTED] Isi email/Messages, ketik pada baris/kolom pertama: -mendaftar--> subscribe rantau-net [email_anda] -berhenti----> unsubscribe rantau-net [email_anda] Keterangan: [email_anda] = isikan alamat email anda tanpa tanda kurung ===============================================