Assalamu'alaikum, wr. wb
Manolah Datuak/Sutan .....
Sapihak dek kami ko nan datang, Nan sararak langkah dari
rumah
Sarayun lenggang di nan goloang, Manuju ranah kampuang nangko
Kampuang nan endah katinggian, Dipaga bukik bakuliliang
Disalo gunuang tungku tigo, Tigo nan cukuik sajarangan
Batang karambia linggayuran, Rumpuiknyo gatia-gatialan
Sawah bapiriang di nan data, Ladang bapetak di nan lereang
Bacando dusun batumpak-tumpak, Ma-ijau rono parak
mudo
Jaguang maupiah bilang tangkai, Bak timah bungo
ladonyo
Buah taruang ayun-ayunan, Salo manyalo kacang panjang
Mantimun mangarang bungo
Mako diiliakanlah labuah nan panjang, Jalan rayo
titian batu
Labuah gadang cindai tajelo, Kasiaknyo mipih bak bapipia,
Pasianyo haluah bak dipimpiang, Batu bulek susun basusun,
Paga iduik baliak batimba, Pudiang ameh sabalah lua,
Pudiang itam sabalah dalam, Ba luang babatang-batang
Babelok lalu ka ilaman, Laman nan indak panjang amek
Malayah bungo saliguri, Marumbai bungo tali-tali
Bungo tinjau sapajangkauan, Tabik ka rono
randah-randah
Mako babunyilah bunyi-bunyian, Maringiah si balang
tandai
Bakukuak kinantan sati, Marentak balam bungo tungga
Melengoang ka dalam parak, Cubadak lalaian baruak
Kamuniang sandaran alu, Limau manih pauitan kudo
Tabek nan bunta bakiambang, Aie janiah ikannyo jinak
Kulari babondoang-bondoang, Bada sapek basikua-sikua
Bada puyu baradai ameh, Gariang malinteh-linteh juo
Saloroang di badan diri kami, Nan bak samisa buruang
bondo
Tabang sakawan di udaro, Balega di rimbo nan satumpak
Maraok di kayu rimbun, malayang di salo angin
Lalu tatagun maliek rantiang, Lai koh suko diinggok-i
Kanari bukan kanari sajo
Sikajuik tumbuah jo ilalang
Kamari bukan kamari sajo
Gadang mukasuik nan bajalang
Badia japun di bangkahulu
Panembak kapa di muaro
Bari ampun ambo dek pangulu
Sambuklah salam dek juaro
Wassalam Damrus Lukman Pakieh Sutan Muaropaneh,
Solok di Bekasi
Bahan dari : Kaset Pasambahan Alek Marapulai
Oleh : Yus Dt.
Parpatiah
|