"Amrizal - [North Duri Cogen]" <[EMAIL PROTECTED]> wrote:
YO TAU TAPI LAI MANGARATI
Assalamualaikum Wr.Wb.
Rami bana nan duduak dipalanta kini ko nampak no, ado angku Arman, angku Bandaro, angku T.Lare, Ibu Wis urang hotel pusako bagai, Ibu Eureka, cukuik sado no disiko yo……..!!! sato ambo ciek.
Apo garangan nan baotakan lamak bana raso no………? Kok buliah ambo manyorong katangah eh. Baa ado nan tamanuang, dek kabacarai jo taun 2002, takana doso jo umua nan alah batambah gaek, ndak baa tu doh, intropeksi namo no, planing di taun 2003, tu nan main kowa sunayan jo ari di no disuduik tun pabilo ka baranti kamaampehkan batu domino, itu nan ka ba ajakan ka kamanakan …………? Baa mamak ndak kamanjua pusako dek, kamanakan sibuk jo bamain dilapau sen. Batue tu, urang laki-laki minangkabau mampagunokan 3 (tigo) AU yaitu kasurAU, kalapAU, bagurAU tibo padusi 3 (tigo) UA yaitu kadapUA, kasumUA, kakasUA bak kato lagu nadi gampo tambah jo kantUA.
Baiaklah nak diurai carito pakan nan lapeh manganai ninik mamak nan ka memfungsionaliasikan peran no di tangah masyarakat atau ditangah kaum no. Lah banyak pulo nan mananggapi tampak no cantang parenang jawek dari angku-angku dipalantako, baa kok banantun, ciek sen sabab no, yo tau tapi lai mangarati. Nan tabaco di ambo banyak nan tau adaik tapi ndak mangarati adaik , mangarati jo adaik tapi ndak tau di adaik, kan bagedele namo no alias bagaludua sen. Samantang pun baitu ambo cubo pulo manjalehkan walaupun ambo indak urang santiang bacando angku angku nan basikola tinggi , tapi mintalah teh talua ciek nak badacak panjalasan ambo disiko, nan sebagai mamak kan ambo sen no, sabab ambo surang sen nan banamo mamak (mak aciak) dipalantako nan lain kamanakan di ambo sado no lai sasuai…………!
Kato urang saisuak sasek di ujuang jalan babaliak ka pangka jalan, ilia tali dapek dituruik, ilia aie ndak baujuang, arati no kok sasek dalam mengomentari masalah minangkabau babaliak awak ka asa minangkabau sabab awak generasi pelanjut dari minangkabau walau hasilno kini generasi pacarut dan manjadi kabau. 1. Minangkabau Nagari TigoLuhak jo Lareh nan duo. Sabagai urang minangkabau harus tau jo asa usua minangkabau indak sakedar tau sajo doh, tapi mangarati. Dalam minangkabau ado nan disabuik Luhak (kurang) nan tigo jo Lareh nan duo. Luhak nan tigo adolah Luhak Tanah Data arati no kurang tanah nan data, sabab babukik bukik jo banyak lambah antaro dataran jo ketinggian labiah banyak nan tinggi dari pado nan data. Luhak Agam arati no kurang “O” seharus no Agam(o) dek jaman kolonial daerah agamo kan manjadi sasaran Balando, a no malarang pangambangan agamo Islam, untuak manyiasati dihilangkan “O” seperti kaum Paderi dan berpusat no agamo maso itu di tanah rang kurai (Bukik Tinggi) sebagai bukti Nyiak Parabek, Nyiak Canduang, Nyiak Jambek, Bangkaweh tamasuk ujuang Koto Baru saisuak no. Jadi lah nagari Agam bacando kini ko tatingga bana dek agamo atau banyak nan kurang. Luhak 50 Koto arati no kurang dari 50 urang, dek urang koto sado no cako bajumlah no 50 urang, kutiko tasintak lalok pagi hari wa ano tingga 45 urang dek nan balimo lah bajalan ka arah Bengkalis, Siak Indera Giri Hulu/Hilir, Bangkinang malah ado nan sampai ka Nagari Sambilan di Malaya nten. Sampai kini Nagari 9 ntun manerapkan bana mengenai adaik minangkabau sabab di no bangga mampagunokan gala adaik sebagai identitas urang Nagari 9, di awak banyak kadang bacimeeskan, mamakai sen ndak amuah jan lai kamamaliharo. Sadangkan nan disabuikan Lareh (Datuak) arati no duo urang Datuak nan pegang peranan bukan bakuaso, nan manjadi Rajo kutiko tu yaitu Adityawarman. Duo lareh cako adolah Datuak Katumangguangan (Koto Piliang) jo Datuak Parpatiah Nan Sabatang (Bodi Caniago). Baa alah mulai nan ma akuak ndak katuju jo carito ko, kalau banantun bialah ambo pulang badomino jo bakowa sen lah karajo kalian bialah tagadai Ranah Minang sabab kampuang lah di aliah urang laludek transmigrasi, (kontraktor-kontraktor, konglomerat-konglomerat) mambangun rel estit . Sabana no Datuak tu batigo, surang li banamo Datuak Sidirajo jarang tasabuik na mo no, badunsanak kanduang jo Datuak Parapatiah Nan Sabatang tapi nan tasabuik iyo Datuak nan baduo nan badunsanak lain Bapak. 2. Minangkabau di tupang Adaik jo Budayo. Pabilo mancaritokan adaik awak harus mamahami apo itu adaik, yo tau adaik, lai mangarati nan disabuik adaik. “Adaik” arati no : Undang-undang, Aturan, Hukum, Norma nan tumbuah dalam kahidupan dan mangikek dan ditaati dek masyarakaikan no. Asa muasa kato Adaik dari bahaso Arab yaitu ‘Adab sahinggo barubah manjadi adaik. Kini ko lai ado awak nan duduak dipalanta bapacik atau mamegang taguah prinsip tun, sabab adaik diminangkabau mangatur sagalo no mulai baa badunsanak, bamasyarakaik, barang sumando, ba mamak, sampai duduak di palanta, kok ado nan ma angkek kaki bagai padahal sambuah nan tuo-tuo disiko baa mangecekan ano baradaik. Itu baru hukum dalam nagari nan dilangga, sadang hukum Negara sambuah pulo nan malangga tantu babaliak ka awak juo lai ko mangarati jo adaik kok iyo. Banyak nan korupsi, mamakan hak urang atau mamalsukan sertifikat tanah de es be. Mako no urang minangkabau harus paham jo adaik Sadangkan Budaya arati no suatu bantuak kahidupan na tumbuah dan bakambang ditengah masyarakaik ndak mangikek dan bisa di tiru seperti Tarian, Disko, Makanan, Rumah Makan, Dangduik, Organ Tungga kutiko baralek sampai saluang jo rabab tatingga itu disabuik budaya bisa ditarimo bisa indak sabab ndak mangikek sia sen buliah de el el. Budaya barasa dari bahaso Hindu yaitu Budha kehidupan agama Dhaiya yaitu manusia, dan kenyataan nya kehidupan urang budha banyak di tiru caliak pilem India. & nbsp; 3. Batagak Gala Jo Baagiah Gala
Kinyam juo lah kue dunsanak jan mandanga sen, atau paralu protes nak basuo rueh jo buku, baeko ambo maraso santiang surang sen. Biaso no di minangkabau tata caro mamakai gala ado duo bagian 1. Batagak gala yaitu suatu gala (gelar) nan dikukuahkan kapado seseorang nan alah mandapek mandat dari kaumnyo untuak menjadi pengemudi dalam sagalo macam bantuak masalah silang sangketo dalam kaum no dan penobatan no dilakukan ateh balai-balai adaik dihadapan para ninik mamak nan ado dikorong kampuang disimbolkan dengan marabahkan kabau sikua, bagua batabuah sarato kesenian atau buadaya sabagai alek nagari. Urang nan dikukuahkan manjadi Pangulu itulah nan dinamokan Tagak Gala arati no gala ntun mungkin alah lamo ndak tapakai, atau dek Pangulu nan lamo undur diri atau wafat. Sadangkan baagiah gala, baiak gala tu dari kaum no atau gala dari keluarga Bako (Bapak Kontan) yaitu pambarian gala taradok seseorang nan raso alah patuik diagiah gala dan kabanyak kapado marapulai sabab marapulai atau laki-laki nan alah barumah tanggo wajib mamakai gala, sambuah juo nan maraso malu atau kuno di Malaysia malah diagungkan. Gala marapulai tamasuak adaik untuak mambedakan antaro nan alah barumah tango jo nan alun. Bakambang dijaman kini maagiah gala sebagai penghargaan kapado para pajabat, apo tujuan jo mukasuik no awak ndak jaleh, atau rukun no dari ma awak ndak tau, kasudahan no tau adaik tapi lai mangarati. Adityawarman di angkek manjadi Rajo diminangkabau ndak ado diagiah g ala dek Datuak nan baduo tu walau wa a no surang rajo di minangkabau. Sabab gala diminangkabau alah manjadi adaik (aturan) ndak dipamurah-murah sen, mako no urang nan maagiah tu paralu dipatanyokan sajuah ma no mangarati adaik minangkabau. Sarupo angku Bandaro jo Ibu Eureka batanyo baa pangulu harus turun temurun atau bagantian mamakai no, caliak kabalakang. Bagi Datuak Katumangguangan atau urang Koto Piliang gala pangulu dilaksanakan secara balega arati no bagantian walau caro kapamimpinan cucua aie katampayan mukasuik no sagalo kaputusan dari ateh, sadangkan Datuak Parpatiah Nan Sabatang Bodi Caniago caro no turun temurun dari mamak ka kamanakan sagalo kaputusan diambia caro musyawarah sabab nan dipimpin no saparuik, apo bilo ndak ado lai kamanakan nan laki-laki mako habih lah peran pangulu sampai ado pulo katurunan laki-laki untuak diangkek/dinobatkan manjadi Pangulu/Datuak . Mako no urang Koto Piliang indak namuah di parentah ano ko dapek diateh taruih manjadi pamimpin itulah istilah no daulu wakatu parjanjian marapalam kalua pameo urang Koto Piliang, kok taimpik nak diateh, takuruang nak dilua, urang nan gagah dan parlente ndak tau samuik nan katapijak alias tau beres sen, baragiah gadang ka awak tapi aka santiang dan tasabuik sabagai arsitek minangkabau,pameo tu alah lakek ka urang minang sado no. Sadangkan urang Bodi Caniago adolah urang gigiah banyak karajo dari kecek kalua pulo pameo kutiko tu, urang Bodi Caniago urang tulang balabiah nan tau barek jo ringan no muluik manih kucindan murah, tau di batu kamanaruang, tau dialu nan kamaimpok, tau diatah katabuang dan urang sanang bamasyarakaik. 4. 4.Datuak/Pangulu Pandai di Nan Tigo &nbs p; Dalam minangkabau seseorang nan alah dinobatkan manjadi Pangulu dan bagala Datuak harus pulo mampu mengemban 3 (tigo) parakaro. 1. Datuak/Pangulu adolah surang ninik mamak dalam adaik nan tau anak jo kamanakan, nan mangarati bakampuang banagari, basawah baladang, bapimatang bapintalak, harato pusako jo harato rumah tanggo. 2. Harus mampu berperan sebagai seorang Ulamo apobilo kamanakan atau urang kampuang maminta untuak mambaco doa atau manggantikan Imam jo Khatib di surau. 3. Harus cadiak jo pandai nan tau alue jo patuik untuak mangimbangi kamampuan kamanakan nan banyak basikola tinggi, bukan hanyo batangan basi dan terbuka dalam sagalo parmasalahan taradok kamanakan. Pangulu/Datuak bisa pulo disabuik baju nan babagi duo, yaitu apabilo kau m tu kambang dan ndak pantaslah kiro no untuak dipangku dek surang Datuak a no bisa mambagi duo dengan indak mambuang asa contoh no Dt. Sati karano kaum no bakambang biak buliah managakkan gala ciek lai dan tatap mamakai gala partamo contoh no Dt. Sati Nan Jombang atau Dt. Sati Nan Tinggi bararti awak paham bahaso asa no balahan dari turunan Datuak Sati. Apabilo masing-masing berhalangan samantaro atau salamo no, malakik tagak nan baru buliah malakok kapado sia nan ado kutiko itu dan dapek maambiak sagalo masalah nan timbua. Dek hari alah rambang patang juo, rumah jauah di subarang nten, takuik hujan katibo biduak tirih pandayuang singkek, jambatan lapuak titian guyah baa pulo caro no baeko bialah nak ambo ansua-ansua juo pulang jan malam bana hari bangih pulo ama paja dirumah, nan kabadomino jo bakowa taruihlah tapi jan lupo kasurau. Rasiang dialiah pulo curito ko jo nan lain tapi tatap manyangkuik ka adaik minangkabau basaba dunsanak di pala ntako, iyo bak kato urang taracuang kanaiak, talantuang ka turun mungkin dek mancingangak sen atau sia nan manyuruah tagak dimuko pintu. Bari maaf ambo dek dipalanta namo no kok ado nan boneh pagunokan juo lah, tarimo kasih.
Wassalamualaikum Wr. Wb.
Assalamualaikum Wr.Wb. Dunsanak banyak juo nan batanyo sia sabana no max aciak ko, jadi malah ambo jalehkan tapi simak elok-elok. Ambo banamo F.St. Sarialam, Asa Minangkabau Luhak Agam, Suku Karuah Lahia 29 Februari 19…2 bararti umua ambo baru 7 ½ taun dek kabisat, Pandidikan es no ado 2 (Sekolah dasar dan Sekolah Menengah Pertama) karajo mambao tronton.. Alamat Jl. A.Yani No. 0 05 Alah sen tu yo.
Wassalamualaikum Wr.Wb.
With Yahoo! Mail you can get a bigger mailbox -- choose a size that fits your needs
