Assalamu’alaikum wr.wb.,
Dek di kandak-an Bandaro juo ambo japuik bana mak Marah. Ko baliau sadang barundiang di Lapau Randah.
Wassalamu’alaikum wr.wb.,
Salapeh Alek
Alah salasai alek katam kaji. Anak sikola alah muloi masuak pulo baliak. Dan urang rantau alah barangkek ciek-ciek, kumbali ka tampek masiang-masiang. Tamasuak Syamsudin Sutan Rajo Endah nan alah barangkek ari Akaik kapatang. Ibo ati si Kamisah, kamanakanno nan sabana arek bana bakawan jo si Marni anak Rajo Endah. Sajak babaua babarapo ariko alah baransua pandai si Kamisah babahaso Indonesia. Walaupun kapatang-kapatang babarapo kali tajadi ‘salah pangaratian’ antaro mareka katiko bamain .
‘Nah –a Marni. Katanya kamu mau pergi mencalit sawah,’ kecek si Kamisah.
‘Nggak ah. Capek,’ jawek si Marni.
‘Eee. Meronggoh dia di sinan, indak bagai berjalan doh, dikecatkannya dia capek. Nan capek tu kalau kita berlari. Capek kita sampai di sawah,’ jawek si Kamisah pulo.
Ado pulo sudah itu.
‘Saya mau liwat sana aja,’ kecek si Marni
‘Mau liwat kemana kamu?’ tanyo si Kamisah.
‘Mau liwat tangga sana aja,’ kecek si Marni lo baliak.
‘Apa yang tangga di kamu ni. Jangan di tanggai pula. Bangis inyik Marah nanti,’ kecek si Kamisah.
Tapi kini kasadoanno alah pai. Dimalah ati ndak kaibo.
Ado nan tingga nan di tiru dek si Kamisah. Sajak bakawan jo si Marni ano alah pulo pakai jilbab kini.
Jaan – an si Kamisah. Mak Marah sajo sarupo urang dilarian antu aru-aru dek ditinggaan kamanakan, minantu, cucu. Raso dibao tabangno aruah rasono. Ka pailang-ilangan ‘raso’ kailangan, kama pulo kapai lai kalau indak ka lapau randah, tampek ‘kanti-kanti’ mak Marah biaso barundiang.
‘Lah langang lo awak baliak yo Marah,’ kecek Malin Ameh
‘Kan itulah, Malin. Sanang ati katiko barami-rami kapatangko. Kini lah abih barangkek paja-paja, lingau bana awak rasono,’ jawek mak Marah.
‘Kadipangaan. Urang sawahno tingga pulo. Tantu iyo indak mungkin balamo-lamono di rumah,’ Malin Ameh bijak.
‘Iyo. Bana nan sarupo itu,’ kecek mak Marah.
‘Di den tamakan bana kaji Rajo Endah katiko malam mambagi peres kapatang Marah. Baa gak ati Marah?’ Malin Ameh mamanciang.
‘Kaji nan maa jano Malin go?’
‘Ee ee. Talalok Marah katiko kamanakan manyampaian pasan jo kasan malam urang mambagi peres Katam Kaji kapatang?’
‘Ooo, Aden talambek tibo. Tapi aden pai mangawani pak Camat makan. Aa jano si Rajo Endah garan?’ tanyo mak Marah.
‘Eey alah. Mangko jano. Nagari awak ko lai santiang. Parayaan katam kaji alah nan ka ampek puluah limo kali diadoan. Indak panah absen tiok taun. Tapi sayangno, jano. Sajak saisuak, sajak awakno bakatam kaji saisuak sampai kini, indak ado parubahan. Indak usahlah kadisabuik paningkatan. Baraja mangaji alif-ba-ta, sampai pandai mangaji, sudah itu bakatam kaji, baarak-arak jo durum ben, jo rabano, balomba mangaji, dibagi peres. Tapi sasudah itu indak ado tadanga apo-apo lai doh. Kalau sikola dasar disiko misalno, lai juo tadanga urang nan alah tamaik sikola di Padang, di Medan, di Banduang, di Jakarta. Nan lah jadi insinyua, nan lah jadi doto, nan alah jadi angku jasa. Tapi nan tamaik mangaji, nan di arak-arak cako indak ado nan tadanga nan kamanjadi pangganti nyiak Canduang doh, atau nan kapangganti buya Hamka doh. Iko sangaik bana paralu dipikia-an apo kolah
nan salah. Baitu jano Rajo Endah samalam tu,’ Malin Ameh mancubo manarangan.
‘Jadi mantun jano yoh?’ tanyo mak Marah.
‘Ee.ee. Indak den labiahi, indak den kurangi bagai doh nan dikecek-anno. Baa gak ati Marah?’
‘Ka baa pulolah agak ati den. Kok iyo itu nan disampai-anno, kan iyo baitu kaadaanno,’ jawek mak Marah.
‘Jadi suai Marah jo nan di kecek-anno tu?’
‘Bukan pakaro suai atau indak suai. Kan kabanaran nan dikecek-anno tu. Tapi itu sain nan dikecek-anno? Indak ado no mausua bagai baa mustino mameloki kaadaan?’
‘Lai. Nan jano mah, andakno baraja mangajiko indak hanyo sampai pandai mambaco Quran tu sajo doh. Tapi paralu ditaruih-an. Paralu anak-anak nan alah pandai mangajitu diaja jo pangatahuan agamo nan labiah langkok. Diajano paham jo Quran nan dibacono tu. Bukan sakadar untuak dilagu-lagukan. Bukan sakadar untuak dipatandiangkan. Tapi untuak dipahami sudah tu diamalkan. Bitu jano,’ tambah Malin Ameh.
‘Kan lah iyo nan dikecek-anno du Malin. Jadi Taman Baca Al Quran ko iyo paralu di rubah namono goh manjadi Taman Pemahaman Al Quran. Tampek murik-murik diaja jo dilatiah mamahami sampai maamalkan isi al Quran. Jadi mantun jano Rajo Endah yoh? Iyolah rugi den ndak mandanga curitono. Jadi baa jano urang nan mandanga?’
‘Ma angguak-angguak sarupo biaso. Tapi antah lai mangarati antah indak, indak lo jaleh di den.’
‘Tapi kalau di Malin kan lai jaleh bana du.’
‘Jaleh.’
‘Baa pandapek Malin?’
‘Sasuai den.’
‘Kalau baitu samo wak. Aden sasuai pulo. Aden ka pai dulu Malin, biko disambuang ota,’ mak Marah tagak kapai.
‘Ka kama Marah?’
‘Ka pai makan. Karumah anak sutan Mantari. Malin alah pai kian?’
‘Alah kapatang.’ Jawek Malin Ameh
******
St. Lembang Alam
Do you Yahoo!?
SBC Yahoo! DSL - Now only $29.95 per month!
