Assalamu’alaikum wr.wb.,
Bainternet ria memang iyo managia. Ibaraik urang main bola, nan lapanganno sabalik bumi Allah, dari subaliak sinan sampai subaliak kamari, dari nan agak di ateh sampai ka nan di baruah sinan. Dari Tapi Riak nan badabua tampek rantau nyiak Sunguik sampai ka baruah tampek rantau angku Abrar. Nan surang maampok-an bola nan lain mampacokok-an. Mako cokok mancokok ko indak paralu pusiang-pusiang bana. Asa lai juo nan balabiah buliah disemba, lai juo nan tajumbai buliah makanan guntiang. Ka basambuang atau ka indak kaji biko di etong. Pokokno hondong aia hondong dadak.
Itulah sababno kadang-kadang taraso juo ado nan bapetai-petai. Kadang-kadang, walau awak bajauahan amuah juo saliang bakatasingguangan. Sabab banyak diantaro awak ‘cenderung’ maraso sagalono buliah di’campungi’. Mako ado juo diantaro awak nan kalau kecek enek ambo saisuak,’uju sanduak kadang, aia angek bacampungi juo’. Awak maraso awak tau sangaik sagalono. Tau sajak mulo dari ‘alif’ sampai ‘ya’. Tau diadaik, tau diugamo. Tau ditaratik tau di etiket. Pokokno apo sajo. Tapi kadang-kadang dek urang lain taraso bahaso ‘tau’ awak-ko sumbang. Nan surang maampok-an kaji nan sabana kaji. Kaji nan barasa dari Quran. Mungkin dek karano si panyampai maraso pulo paraluno kaji cako disampai-an.
Jarang bana awak nan batanyo. Tapi acok bana awak langsuang manyemba. Maagiah ragi jo apo nan takana di kapalo awak. Maagiah colok jo nan kabatulan singgah di agak-agak. Kadang-kadang jadi tambah indak bakarunciangan. Baa pulo kamauji isi Quran jo pandapek? Apo lai pandapek awak nan awam? Tapi disinan pulo latak sero jo lasuahno bainternet. Nan surang manyipak, nan lain manarajang, kadang-kadang ditambahno pulo jo ‘hep tah’ ciek dulu. Sia pulo nan kamalarang?
Wassalamu’alaikum wr.wb.
St. Lembang Alam
Do you Yahoo!?
Yahoo! SiteBuilder - Free, easy-to-use web site design software
