Bismillahirrahmanirrahim
Assalamu'alaikum w.w.
Kapado, Niniak dengan Mamak, Alim jo Ulamo, Cadiak Pandai, Bundo Kanduang Limpapeh Rumah nan Gadang sarato Rang Mudo Pamaga Nagari nan barado di RN nan ko
Pituah orang gaek kito
Tigo tali nan sapilin
Aturan dalam adaik budayo
walau talambek dari ambo
maaf dimintak lahia jo bathin
sakalian ma-ucapkan Salamaik Hari Rayo
Limbak nan dari pado itu
Bajalan babuah tangan, malenggang babuah batih, karano kapatangko ambo lai pulang kak kampuang, dan lai pulo sato acara Musyawarah Besar ke - 1 Perantau Agam Se Indonesia nan diadokan di Lubuak Basuang pado tanggal 28 s/d 29 Nopember, mako kok indak tabarikan "Karak Kaliang jo Karupuak Sanjai" bia carito Mubes nantun nan ambo sampaikan, kaganti "buah tangan"
Partamo, Susunan Acara
- Sakapua Siriah acara ko iyolah Bupati Agam,
- sambutan dan pambukaan oleh Gubernur Sumatera Barat
- Sasudah itu kato sambutan dari Pituo Rang Agam nan dibaokkan oleh Mamak / bapak H. Bachtiar Chamsyah, SE
kok diulua amuah panjang dipunta nak no singkek, diambiak sajo sado nan paralu,
Acara Mubes ko manyajikan makalah-makalah dibidang :
* SDM nan dibaokkan oleh Prof. Drs. Agustiar Syah Nur M.A. Ed.D dab Buya H. Mas'oed Abidin
* Pemberdayaan Perantau Agam dan Pembangunan Nagari nan disampaikan dek H.Amir Thaib, SH dan Ir. H. Syamsumar Dahlan Chaniago, MBA
* Peningkatan Ekonomi Anak Nagari, nan dibaokkan oleh Dr. Elfindri dan Ir. Zukri Sa'ad
* Pembinaan pemerintahan Nagari nan disampaikan oleh Drs. H. Mucthiar Mucthar dan Dr. Damsar, MA Dt. Beco.
Disampiang itu adopulo masukan dari Bapak Hasim Jalal. dan penyampaian presentasi Badan Amil Zakat (BAZ) Agam oleh Ketua BAZ Agam Buya Rusdi Imam Mulia.
Kaduo, Peserta Mubes
Peserta Mubes ko lai banyak nan datang, apolai kutiko ka mulai, iyo sambuah nampakno, basumangaik bana, peserta mubes ko ado nan datang dari Jakarta, Bogor, Medan, Lampuang, Palembang, Bangkahulu, Batam, Pakanbaru, Dumai, Padang, Pasaman dll. dan ado pulo wakia dari BPRN tiok-tio Nagari. tapi ka baa lah, acara nan harusno dimuloi jam 08.45 (rencana kadatangan Gubernur Sumbar) tanyato baundua labiah pado pukua sambilan. (mungkin macet dijalan ko eh). Dek lah talambek mulono, mako acara nan lain iyo maikuk-i pulo no.
Katigo, Panitia.
Kok kito mancalaiak kapado Panitia Mubes ko, iyo sabana lai ka tasusun acara nan kadibuek, ba dek baitu ? karano Panitia no iyo sangaik sambuah, 155 urang. cubolah bayangkan dek Sidang RN tu. Nan ciek lai, panitia ko iyo labiah banyak dipacik dek Pagawai Pemda Agam, mulai dari Bupati, Kabag, Kadis, Kasubid, Kasubag, Kasi, Kasubdin, Staf, dll.
mako kalualah sagalo oto BA Sirah tu
Kaampek. Pandangan Mato.
Dek acara ko dalam jadwal kadimuloi jam 08.00 tanggal 28 Nopember, mako ambo kajakan pagi-pagi bana barangkek dari Bukiktinggi, jam 06.00 alah dihiduikkan kontak kudo Japang tu, hari taraso dingin juo baru, tapaso pakai baju angek, apolai tibo di Matua tambah taraso, lah manjalan kelok "ampek puluah ampek" iyo agak badabok darak dino, kalabek-lambek kok indak takaja, kok capek lain pulo nan tibo, kabatulan ado pulo nan manyasak dibulakang, tiok sabanta tadanga juo kalason dari balakan, dek pasai mandanga kalason tu, iyo ambo mainda sen katapi. Lah tibo di Maninjau baru sanang kiro-kiro, dipupuah pulo lari oto tu, tapi di pasa Bayua (?) macet saketek, karano jalan dipakai untuak manggaleh jo parkir oto. Alhamdulillah lai takaja tibo di Lubuak Basuang tapekno di GOR Agam.
Wakatu Registrasi / Pendaftaran peserta, ambo manunjuakkan Undangan, sasudah dicatat, ambo dapek brosur macam-macam, nan mambuek ambo takajuk adolah brosur (iklan) tampaik manggaleh jo Almanak, nan manuruk ambo iyo kurang tapek, khususno brosur (iklan) tampaik manggaleh tu, karano indak ado hubungannno jo Mubes. Dek karano indak sasuai jo hati ambo, iyo jo taruh ambo tarang baliakkkan ka induak-induak nan manjago stand pandaftaran tu. Tantangan buku panduan atau makalah nan kadisampaikan baru dibagikan tiok makalah kadibaokkan dan adopulo nan dibagikan sasudah makalah disampaikan dek nan mambaokkanno. Tapi bialah, namono acara nan sagadang tu, tantu ado ciek jo duo nan indak taabehkan , nan paralu niaik tu lai kasampaian.
Adopulo duo nan takana-kana dihati, takilan dimato,:
Partamo = Tulisan (Papatah) nan ditulih di spanduk gadang, nan babunyi "Anaklah Samo di Pangku"
"Kamanakan nanlah elok samo Bibimbiang"
dst....
Disiko ado parubahan dari nan biaso, khususno kalimat nan kaduo ("Kamanakan nanlah elok samo Bibimbiang"), karano nan sabanano adolah "Kamanakan samo di Bimbiang", karano parubahan kalimat nantun tantuno marubah pulo arati atau mukasuk nan dikanduangno. kalau kalimat sarupo diateh tu, mako aratino barubah manjadi "kamanakan lah eloh dibimbiang, pabilo wakatuno kito lah elok mambimbiang kamanakan ? apokoh sajak ketek atau alah baumua ? sadangkan manuruk adaik kito, mambimbiang kamanakan iyo sajak ano ketek, kalau paralu sajak dalam kanduanggan, hal iko lai ambo sampaikan. dan lai pulo manjadi pambicaraan dinan hadir.
Kaduo = adolah dalam acara Pembentukan Komisi, khusuno Komisis D nan dibari Namo Komisi Pembinaan Pemerintahan Nagari yang Baik, Bersih dan Profesional. Dari namo komisi tu, ambo lai mausulkan untuak manambah Kata "Benar" (bana manuruk adaik), sahinggo manjadi Komisi Pembinaan Pemerintahan Nagari yang "Benar", Baik, Bersih dan Profesional. Hal iko abo sampaikan karano bardasarkan pamikiran, kalau kito iyo kabalaiak ka pamaritahan Nagari nan sabanano, tantu pamarintahan nagari kini ko alun sasuai jo nan manuruk adaik, tapi dek pimpinan sidang nan samantaro tu, dikatokanno bahwasono kato "benar" tu alah tamasuak dalam Kato "Profesional" dan sistm pemerintahan nagari kini ko, bana atau indak no adolah manuruk jo perda nan mambantuakno, bukan manuruk adaik.Jadi kalau lah sasuai jo Perda barati alah sasuai pulo tu kato baliau.
Sakitulah dulu dari ambo, lah bejelo-jelo pulo, untuang-untuang lai paguno, kok indak atakkan dibulakang
Ambo nan bukan cadiak pandai
ilimu di Tuhan adono
kok senteng mitak dibilai
tandono kito lai sa andiko
Rila jo maaf dimintak banyak-banyak
Wassalamu'alaikum w.w.
Sutan Bandaro Labiah
nb.
= Untuak Mamak Zul Amri, Insyaallah, bisuak VCD tu alah sampai di Bali, talambek yo Mak. maklumlah urang manggaleh babelok, nan paralu "lamo lambek lego lai kamanang, kadiano yo ?
= Untuak Heri Tanjuang (rang Tabiang), alamaik jo nomor talipon iyo alun dapek juo diambo kini tu, jadi indak tantu kama ka ambo antakan, maklumlah tantangan itu.
Download Yahoo! Messenger now for a chance to WIN Robbie Williams "Live At Knebworth DVD"
